سوڭعى كەزدە ادامداردى الاڭداتقان, قوعامدى قوبالجىتقان وقيعالار از بولىپ تۇرعان جوق. ەلوردانى قۇرساۋىنا العان بوران, الماتىنى قايتا-قايتا سىلكىپ وتكەن ءزىلزالا, ىرگەمىزدەگى كورشىگە كەلگەن ىندەت, وسىنىڭ بارلىعى دا ادامزاتتىڭ تابيعات الدىنداعى دارمەنسىزدىگىنىڭ ءبىر بەلگىسى عانا. سەبەبى جاراتقان يەمىز ادامداردىڭ يمانى مەن ءناپسىسىن تارازىعا سالىپ وتىراتىن سەبەپتەردى ۇدايى الدان توسادى. بۇكىل عالامدى ءبىر تارىنىڭ قابىعىنا سىيدىرا الاتىن تىلسىم قۇدىرەتتىڭ پەندەلەرىنە بەرگەن سىناعىنان سىتىلدىرىپ شىعاراتىن جالعىز جول – ساۋاپتى ءىس.
كەز كەلگەن كۇردەلى جاعدايدا ادامدار ءوز قىلىعىنان پيعىلىنىڭ ايناسىنا قارايدى. ماسەلەن, قازىر سولتۇستىك وبلىستارداعى ومبى قاردا قاڭتارىلعان كولىكتەردى شىعارىسىپ, جولداردى كۇرەپ, قار قۇرساۋىندا قالىپ قويعان جاندارعا تاماق تاسىپ جۇرگەندەردى كورگەندە جۇرەگىڭ جىلىنىپ, تىرشىلىكتىڭ ءمانى تابىلعانداي كۇي كەشەسىز. ماسەلەن, بىلتىر دا ەل استاناسىن اياز قىسقاندا كەيبىر كولىكتەردىڭ جولاي تەگىن ادام تاسىپ جۇرگەنىن ەستىپ, جاساسىن ادامدىق دەپ قۋانعانىمىز ەستە. ەسەسىنە قاقاعان ايازدى كۇندەرى امالسىز جولعا شىعۋعا, جۇمىسقا بارۋعا ءماجبۇر بولعانداردىڭ مۇقتاجدىعىنان ەسەلەپ پايدا تابۋعا ۇمتىلعان تاكسيلەردىڭ قىلىعى جانىمىزدى جاۋراتادى.
تاكسي دەگەننەن شىعادى. كەز كەلگەن مەملەكەت اۋەجايدان باستالادى. ۇشاقتان تۇسكەندە ءسىزدى اۋەجايدان سول حالىقتىڭ وكىلدەرى, كەلبەتى, اۋا رايى, مادەنيەتى كۇتىپ تۇرادى.
اقيقاتىن ايتۋ كەرەك, بۇرىن الماتىعا اياعىمىز تيگەندە جان-جاقتان تاكسيلەر قولىڭنان تارتقىلاپ, انتالاعاندا قايدا قاشىپ قۇتىلارىڭدى بىلمەي, ىڭعايسىز كۇي كەشسەك تە قالىپتى جاعداي, ياكي ەل ىشىندەگى ۇساق-تۇيەكتەردىڭ ءبىرى دەپ قاراپ كەلدىك. ۇشاقتان وزىڭمەن ىلەسە تۇسكەن شەتەلدىك قوناقتاردىڭ الدىندا قارادان قاراپ تۇرىپ قىسىلاسىڭ. ارينە قازىر اۋەجايلاردا بيزنەستىڭ مۇنداي جابايى ءتۇرى رەتتەلىپ كەلەدى. وسىدان بۇرىنعى ەكى-ءۇش جىلمەن سالىستىرعاندا ءتارتىپ بار. الايدا, ادامداردىڭ اشكوزدىگىنەن بولعان كەلەڭسىز جايتتار ءالى دە بار. كەيبىرەۋلەر مۇنى الميساقتان كەلە جاتقان پەندەشىلىك ارپالىس دەر. بىراق تەمىر ءتارتىپ, قاتاڭ زاڭ عانا مۇنداي بەي-بەرەكەتتىكتى جۇيەلەندىرە الادى.
الماتىدا بىلتىر تاكسي جۇرگىزۋشىسى شەتەلدىك قوناقتى حالىقارالىق اۋەجايدان باراتىن جەرىنە جەتكىزىپ, باقانداي 33 مىڭ تەڭگەسىن قاعىپ العانى ءبىراز قوعامدىق پىكىر تۋعىزعانىن بىلەمىز. بۇل وقيعا الدىمەن الەۋمەتتىك جەلىنى قولدانۋشىلار ارقىلى جاريا بولدى. سول سياقتى كەلەسى جۇرگىزۋشى كليەنتىنەن 15 مىڭ تەڭگە الىپ, «رەگيون» دەگەن كومپانيا اتىنان جالعان تۇبىرتەك بەرىپ كەتكەن.
اسىعىستىعىمىزدى پايدالانىپ, اۋەجايعا اكەسىنىڭ قۇنىن سۇراعانداي قىمباتقا اكەتىپ بارا جاتقان كولىك جۇرگىزۋشىسىنەن وسى قاناعاتسىزدىقتىڭ ءتۇپ-توركىنىن بىلگەنىمىزدە: «بىلتىر مەنىڭ ءبىر تانىسىم شەتەلدىك سپورتشىلاردى اۋەجايدان دوستىق داڭعىلىنىڭ جوعارى جاعىنداعى «Royal Tulip» قوناقۇيىنە 25 مىڭ تەڭگەگە جەتكىزگەن» دەپ, جەردەن جەتى قويان تاپقانداي قۋانا «مالىمدەدى».
تۋريزم – ءبىرىنشى كەزەكتە شەتەلدەن كەلگەن قوناقتىڭ قاۋىپسىزدىگى, باس اماندىعى. ەسىگىنەن ەنبەي جاتىپ, الاياق تاكسيلەرى قالتاڭدى سىپىرىپ الاتىن ەلگە ادام كەلە مە؟!
ماسەلەن, الماتى حالىقارالىق اۋەجايىنىڭ ءباسپاسوز قىزمەتى جوعارىدا شەتەلدىك قوناقتاردىڭ 15, 33 مىڭ تەڭگەسىن قالتاسىنا باسقان تاكسيلەردىڭ ىزدەستىرىلىپ جاتقانى جايلى حابار تاراتتى, بىراق ناتيجەسى بەلگىسىز.
راس, وسىعان دەيىن اۋەجايداعى تاكسي قىزمەتى جۇيەلەنبەگەن بولاتىن. بۇگىنگى تاڭدا اۋەجايعا تاكسي قىزمەتىن ۇسىنعىسى كەلگەندەرگە تالاپ ورتاق. تەك پاتەنتتەلگەن جانە تىركەلگەن كولىكتەرگە عانا ورىن بار. سوندىقتان ساراپشىلار تاكسي قىزمەتى ءۇشىن تاريفتىك باعانى دا ءبىر جۇيەگە كەلتىرۋ كەرەكتىگىن ايتادى. سول كەزدە قالا قوناقتارى ىنساپسىز كولىك جۇرگىزۋشىلەرىنىڭ قاقپانىنا تۇسپەس ەدى.
«جول مۇراتى – جەتۋ» دەمەي مە؟ دىتتەگەن جەرىنە جەتكەنشە جولاۋشىنىڭ تاعدىرى جۇرگىزۋشىنىڭ قولىندا. قاشان دا اماناتقا قيانات جۇرمەيدى. تاكسي دە كولىگىنە وتىرعان جولاۋشىنى جاراتۋشىنىڭ اماناتى دەپ ءتۇسىنۋى كەرەك.
