ال مەكتەپ كىتاپحاناسىندا وقۋشىلار وزدەرى وسىرگەن گۇل اعاشىنىڭ بۇتاقتارىنا اباي اتانىڭ ناقىلدارى جازىلعان جۇلدىزشا قاعازدار ىلەدى.
جۇلدىزشالاردا «قىس», «كۇز», «جاز», «جازعىتۇرى» سەكىلدى ولەڭدەرى جازىلعان.
اسەمپاز بولما ارنەگە,
ونەرپاز بولساڭ ارقالان.
سەن دە ءبىر كىرپىش دۇنيەگە,
كەتىگىن تاپ تا, بار, قالان,
دەپ ەكىنشى ءبىر جۇلدىزشاعا جازىلادى.
– ءاربىر جۇلدىزشا قاعاز بۇتاقتارعا زيان كەلتىرمەيتىندەي جىڭىشكە جىپتەرمەن بايلانادى. قاعازعا جازىلعان «بەس نارسەدەن قاشىق بول, بەس نارسەگە اسىق بول, ادام بولام دەسەڭىز. وسەك, وتىرىك, ماقتانشاق, ەرىنشەك, بەكەر مال شاشپاق – بەس دۇشپانىڭ بىلسەڭىز. تالاپ, ەڭبەك, تەرەڭ وي, قاناعات, راقىم ويلاپ قوي, بەس اسىل ءىس كونسەڭىز» دەگەن ناقىل سوزدەرى جاتتاۋعا جەڭىل ءارى بىردەن وقۋشىلار ەسىندە قالادى, – دەيدى كىتاپحاناشى.
قازاق تىلىندە وقيتىن وزگە ۇلت وكىلدەرىنىڭ ۇل-قىزدارى ماريام ابين, مۇرات گروسس, مۋمادي, ميلانا ابۋباكاروۆتار, نيلۋفار گانيەۆتەر دە «قان سوناردا بۇركىتشى شىعادى اڭعا», «قالىڭ ەلىم, قازاعىم, قايران جۇرتىم», «جەلسىز تۇندە جارىق اي» سەكىلدى اباي ولەڭدەرىن, ناقىل سوزدەرىن جاتقا بىلەدى.
وقۋشىلار ءبىر ۋاق قولدارىنداعى ۇيالى تەلەفوندارىن تاستاپ, ادەبي كىتاپتار وقۋدى ادەتكە اينالدىرعان.
گۇل اعاشىنداعى جۇلدىزشالارعا جازىلعان ناقىل سوزدەردى, ولەڭدەردى كەزەكتەسىپ اۋىستىرىپ وتىرادى. بارلىعى دا «كىتاپ جاناشىرلارى» ۇيىرمەسىنىڭ مۇشەلەرى.
– كىتاپحانامىزدا وقۋلىقتار, ادەبي كىتاپتاردىڭ 14406 دانا قورى بار. توكەن گۇلزادا, ەسقالي ايىم, سوتسيال زارينا, تەمىر جارقىن, ەلۋباي نۇراي, جانەركە بەكتۇروۆا, تۇسىپبەك جەڭىس, زەينىش بەكزات, مۇحامەدجان سامات, التىناي قالەلوۆا سياقتى وقۋشىلار – تۇراقتى وقىرماندار, – دەيدى ۋلفات قوجانباەۆا.
مەكتەپ كىتاپحاناسىندا جاڭا كىتاپتاردى تانىستىراتىن «اۋىزشا جۋرنال» كۇنى, رۋحاني-مادەني تاقىرىپتاعى كورمەلەر, وقىرماندارعا ارنالعان سۇحبات-كەزدەسۋ كۇندەرى وتكىزىلەدى.
– اباي اتامىزدىڭ مەرەيتويىنا ارنالعان شارالار مەكتەبىمىزدە جىل بويى جالعاسادى. ونەگەلى ءسوزى, ۇلگىلى وسيەتى كوپ. تاۋسىلماس رۋحاني قازىناسىن وقۋشىلار جادىنا سىڭىرە ءبىلۋىمىز كەرەك, – دەيدى مەكتەپ ديرەكتورى ءاليا انافينا.
پاۆلودار وبلىسى,
ماي اۋدانى
