جەرگىلىكتى اقپارات قۇرالدارىنىڭ حابارلاۋىنشا, ۇشاق Ariana Afghan Airlines اۋە كومپانياسىنا تيەسىلى. الايدا اتالعان اۋە كومپانيا ۇشاعىنىڭ قۇلاماعانىن, بۇل اپاتتىڭ كومپانياعا قاتىسى جوعىن ايتتى. كومپانيا باسشىسى ميرۋەي ميرزاكۋال Reuters اگەنتتىگىنە كابۋلدان گەراتقا ۇشقان ۇشاعىنىڭ ءساتتى قونعانىن, ەكىنشى رەيستىڭ دە جوسپار بويىنشا ۇشاتىنىن مالىمدەدى. گازني پروۆينتسياسىنىڭ گۋبەرناتورى اريف نۋري اپاتتىڭ دەح ياك اۋدانىندا بولعانىن مالىمدەدى. ونىڭ ايتۋىنشا, ۇشاق قۇلاعاننان كەيىن, ءورت شىققان.
اپات جەرگىلىكتى ۋاقىت بويىنشا شامامەن 13:10-دا بولعان. اۋە كەمەسى اۋعان ارمياسىنا تيەسىلى دەگەن اقپارات تا بار. Tolo News اگەنتتىگى ۇشاقتىڭ «تاليبان» قوزعالىسىنىڭ باقىلاۋىنداعى اۋماققا قۇلاعانىن جازادى. بۇل مالىمدەمە نەگىزسىز ەمەس. ويتكەنى اپات ورنىنا «تاليباننىڭ» جاۋىنگەرلەرى العاشقى بولىپ كەلگەن. ولار ورتەنگەن ۇشاقتى سوندىرۋگە تىرىسقان. «تاليبان» قوزعالىسىنىڭ وكىلى زابيۋللا مۋدجاحيد كەلىپ تۇسكەن حابارلامانى تەكسەرۋ ءۇشىن وقيعا ورنىنا قوزعالىستىڭ ادامدارى بارعانىن جەتكىزدى. مەملەكەتتىڭ توتەنشە جاعدايلار كوميتەتى قىزمەتكەرلەرى دە اپات ورنىنا جىبەرىلەتىنى حابارلاندى.
اۋعانستاندا ءىرى ۇشاق اپاتى سوڭعى رەت 2005 جىلى بولعان. ول كەزدە دە گەراتتان كابۋلعا بەت العان Kam Air كومپانياسىنىڭ ۇشاعى تاۋعا جاقىن ماڭدا قۇلاعان بولاتىن.
