ورال قالاسىندا وڭىرگە بەلگىلى ازامات, جازۋشى الپامىس بەكتۇرعانوۆقا بۇگىن بيلىككە باعىنعىسى كەلمەدى دەگەن ايىپ تاعىلدى. بۇل تۋرالى «ۋرالسكايا نەدەليا» حابارلادى.
ەسكە سالا كەتەيىك, 21 شىلدە كۇنى پوليتسيا ورال اۋەجايىندا ورال-استانا باعىتىندا ۇشقالى تۇرعان «Kسس» جشس ۇجىمى وزدەرىنىڭ اتىنان بيلىكپەن كەلىسسوز جۇرگىزۋدى سەنىپ تاپسىرعان ازاماتتاردى قورعاۋ جونىندەگى «مارحابات» قوعامدىق ۇيىمىنىڭ توراعاسى الپامىس بەكتۇرعانوۆتى ۇشاقتان الىپ قالدى.
پوليتسيا ءوزىنىڭ بۇل ارەكەتىن قوعامدىق قىزمەتكەردىڭ ۋاقىتى ءوتىپ كەتكەن سەنىمحات بويىنشا كولىك جۇرگىزىپ جۇرگەنىمەن بايلانىستىردى. ال ۇستاپ قالۋ ارەكەتىنىڭ ءوزى بەكتۇرعانوۆ پاسپورتتىق باقىلاۋدان ءوتىپ, رەيسكە تىركەلىپ قويعاننان كەيىن اۋەجاي تەرمينالىندا ورىن الدى.
ال ايتۋلى ازامات بۇل كۇنى «كسس» جشس-ىنا قاتىستى قارجى پوليتسياسىنىڭ زاڭسىز ارەكەتتەر جاساۋىنا باتىس قازاقستان وبلىسىنىڭ اكىمى نۇرلان نوعاەۆتىڭ قاتىسى بار ەكەنىن مالىمدەمەۋدى ماقسات ەتكەن ءباسپاسوز ءماسليحاتىن وتكىزۋ ءۇشىن ەلورداعا بارا جاتىر ەكەن. الايدا, الپامىستىڭ استاناعا ارنايى ساپارى وسى جەردە كىلت ءۇزىلدى.
كەشە ا.بەكتۇرعانوۆقا پوليتسيا قىزمەتكەرلەرىنىڭ وكىمدەرىن قاساقانا ورىندامادى دەگەن ايىپپەن سوتقا شاقىرۋ ايتىلىپ, ونىڭ 5 تامىز كۇنى ساعات 16.00-دە كەلۋى تاپسىرىلىپتى.
ال بۇگىن ا.بەكتۇرعانوۆ سوتتا كۇتپەگەن جەردەن وزىنە قاتىستى الدىن الا تەكسەرۋ جۇمىستارىنىڭ جۇرگىزىلگەنىن, ول بويىنشا مۇنىڭ ۇستىنەن قىلمىستىق ءىس قوزعاۋدان باس تارتىلعانىن بىلەدى. سوتتاعى تىڭداۋ كەزىندە كۋا رەتىندە شاقىرىلعان ەكى ايەل قۇقىق قورعاۋشى پاۆەل كوچەتكوۆ قۇجاتتارىن كورسەتۋدى تالاپ ەتكەن كەزدە زالدان شىعىپ, پروتسەستەن كەتىپ قالادى.
«بۇل ءاۋ باستان پوليتسەيلەردىڭ زاڭسىز ارەكەتتەرىنەن باستالعان تىرلىك بولدى», - دەيدى قورعاۋشى.
ەرتەڭ ا.بەكتۇرعانوۆ وسى ءىس بويىنشا اكىمگەرشىلىك سوتقا باراتىن بولىپتى.
«ءبىز جاقىن ارادا بۇۇ-عا شاعىم جاساپ, وسىنداي زاڭسىز ارەكەتتەردىڭ ورىن الىپ جاتقانىن جەتكىزەمىز», - دەدى پ.كوچەتكوۆ.
قۇرىش نۇرىمبەت.
