بۇگىن ىستامبۇل سوتى «ەرگەنەكون» ءىسىنىڭ 15 فيگۋرانتىن مەملەكەتتىك توڭكەرىستى دايىنداعاندارى ءۇشىن ءومىر بويىنا تۇرمەدە وتىرۋ جازاسىنا كەستى. بۇل تۋرالى يتار-تاسس حابارلادى.
سوتتالعانداردىڭ ىشىندە تۇركيا باس شتابىنىڭ بۇرىنعى باستىعى گەنەرال يلكەر باشبۋگ تا بولدى. وعان «مەملەكەتتىك توڭكەرىستى جاساۋعا ارەكەت ەتكەنى ءۇشىن» دەگەن ايىپ تاعىلدى. ودان باسقا تاعى ون وفيتسەر مەن گەنەرال ومىرلىك قاپاس مەرزىمىنە قامالدى. ولاردىڭ اراسىندا جاندارمەريانىڭ, ءبىرىنشى جاياۋ اسكەر ارمياسىنىڭ قولباسشىلارى, ءارتۇرلى اسكەر بولىمدەرىنىڭ وكىلدەرى بار.
جالپى, بۇل ءىس بويىنشا 275 ادام تەرگەۋدەن ءوتتى. ولاردىڭ 66-سى پروكۋراتۋرانىڭ شەشىمى بويىنشا قاماۋعا الىندى. ازىرگە ولارعا بايلانىستى ۇكىم شىعارۋ جالعاسىپ جاتىر.
«ەرگەنەكون» - بىلايشا «كولەڭكەدەگى ۇكىمەت» اتانعان قۇپيا ۋلتراۇلتتىق ۇيىم. ونىڭ نەگە «ەرگەنەكون» اتانعانى دا تۇسىنىكتى. تاريحي دەرەكتەر بويىنشا, ەرگەنەقون, ەرتەدەن كەلە جاتقان اڭىزدار بويىنشا, التاي تاۋىنىڭ ءبىر مۇيىسىندە ورنالاسقان ەجەلگى تۇركىلەردىڭ ۇجماقتاي بولعان قاسيەتى مەكەنى, العاش ءونىپ شىققان ورنى بولىپ تابىلادى. ماتەريالدار بويىنشا, بۇل ۇيىمنىڭ ماقساتى 2003 جىلى پرەمەر-مينيستر تايپ ەردوگاننىڭ ۇكىمەتىن تاقتان تايدىرۋ بولعان. وسىعان بايلانىستى تەرگەۋ 2007 جىلى باستالدى. بۇل جۇمىستار قوعام تاراپىنان قاتتى سىنعا ۇشىرادى. بيلىك پارتياسىنا قارسىلار جاعى مۇنى ەردوگانعا قولايسىز, جاقپايتىن تۇلعالاردى «قۇرتىپ» جىبەرۋدىڭ امالى سانايدى.
ساكەن مايلىباي.
