تەاتر ۇجىمى ۇلى اقىننىڭ 175 جىلدىق مەرەيتويىنا ارناعان ءىس-شارالارىن احمەت جۇبانوۆ پەن لاتيف ءحاميديدىڭ ايگىلى «اباي» وپەراسىنان باستاپ ۇلتتىق كلاسسيكا جاۋھارى كورەرمەنگە ۇسىندى.
«اباي» وپەراسىندا باستى كەيىپكەر اباي پارتياسىن قازاقستاننىڭ ەڭبەك سىڭىرگەن قايراتكەرى جانات شىبىقباەۆ ورىندادى. الەۋمەتتىك ادىلەتسىزدىكتىڭ قۇربانى ايدار پارتياسىن ورىنداعان – قازاقستاننىڭ ەڭبەك سىڭىرگەن قايراتكەرى مەيىر باينەش.
ال ۇستەم تاپتىڭ وكىلى, وزبىرلىعىمەن, ادىلەتسىزدىگىمەن تانىلعان جيرەنشە بەينەسىن – تالعات عالەەۆ سومدادى.
كورگەن كۇنى ازاپ پەن اۋىرتپالىققا تولى كەيىپكەر اجار بەينەسىندە تەاتر ءسوليسى «قۇرمەت» وردەنىنىڭ كاۆالەرى ايزادا كاپونوۆانىڭ دەبيۋتى ءساتتى شىقتى.
وپەرادا شىنايى ومىردەگىدەي وزىندىك وي پىكىرى جوق, سىرتى «ادەمى» كورىنگەنىمەن, ءىشى كورەالماۋشىلىققا تولى, ءباز بىرەۋلەردىڭ ايتاعىمەن ءجۇرىپ, تەك كەرەعار تىرلىك جاساپ, زيان ىسپەن اينالىساتىن كەيىپكەر بار. ول - ءازىم. ا.جۇبانوۆ شىعارماسىندا ءازىم ءرولىن تەاتر ءسوليسى – بەيىمبەت تاڭارىقوۆ ۇسىندى. قارلىعاش ءرولىن – سالتانات مۇراتبەكوۆا, كوكبايدى – ەرجان سايپوۆ, سىرتتاندى – بولات ەسىمحانوۆ, نارىمبەتتى – ەرۇلان كامەل, مەستى – شىڭعىس راسىلحان سىندى سوليستەر ورىندادى.
«استانا وپەرا» سيمفونيالىق وركەسترى مەن حورى حالىقارالىق بايقاۋلاردىڭ لاۋرەاتى رۋسلان ءبايمۋرزيننىڭ جەتەكشىلىگىمەن ونەر كورسەتتى.
ايتا كەتەيىك, «استانا وپەرادا» مۇحتار اۋەزوۆتىڭ ليبرەتتوسىنا ساحنالانعان سپەكتاكلدىڭ پرەمەراسى 2015 جىلدىڭ 25 قىركۇيەگىندە وتكەن بولاتىن.
قويىلىمنىڭ مۋزىكالىق جەتەكشىسى – تەاتردىڭ باس ديريجەرى, قازاقستاننىڭ ەڭبەك سىڭىرگەن قايراتكەرى, قر مەملەكەتتىك سىيلىعىنىڭ لاۋرەاتى الان بورىباەۆ, قويۋشى رەجيسسەر – دجانكارلو دەل موناكو (يتاليا). كەڭەسشى رەجيسسەر – قازاقستاننىڭ حالىق ءارتىسى ەسمۇقان وباەۆ. باس حورمەيستەر – قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆ. قويۋشى رەجيسسەردىڭ اسسيستەنتى – ەرەنباق تويكەنوۆ, جاۋاپتى كونتسەرتمەيستەرلەر – ەلەنا ساحنو, يرينا كۋرگۋزكينا.
وپەرانىڭ كوركەمدىك بەزەندىرىلۋىن جاساعان شىعارماشىلىق تاندەم – تانىمال ستسەنوگراف ەتسيو فريدجەريو مەن «وسكار» سىيلىعىنىڭ لاۋرەاتى, كوستيۋمدەر بويىنشا سۋرەتشى فرانكا سكۋارچاپينو (يتاليا).
