كەشە, 4 تامىز كۇنى باتىس قازاقستان وبلىسىنىڭ پوليتسەيلەرى جەرگىلىكتى كاسىپكەر امانعالي بايعۋانىشەۆتى ءولتىردى دەگەن ايىپ تاعىلىپ وتىرعان كۇدىكتى حاسان گۋبزاەۆ رەسەيدىڭ ايماقپەن قاتارلاس جاتقان سامارا وبلىسىندا قولعا ءتۇستى. بۇل تۋرالى «ۋرالسكايا نەدەليا» حابارلادى.
اڭگىمە ۇستىمىزدەگى جىلعى 19 اقپان كۇنى جۇمىسشى كەنتىندە ورىن العان اتىس تۋرالى بولىپ وتىر. وسى كۇنى «بەرەزكا» دۇكەنىنىڭ جانىندا بەلگىسىز بىرەۋلەر ماركاسى انىقتالماعان قارۋمەن 37 جاستاعى امانعالي بايعۋانىشەۆتى اتىپ, كوزدەن تاسا بولادى. كاسىپكەر وسى العان جاراقاتى سالدارىنان «جەدەل جاردەم» كولىگى ىشىندە اۋرۋحاناعا اپارا جاتقاندا قايتىس بولادى.
وقيعانىڭ سوڭىن الا تەكسەرۋگە كىرىسكەن پوليتسەيلەر مارقۇم امانعالي بايعۋانىشەۆتىڭ 2004 جىلى بوپسالاۋ فاكتىسى بويىنشا سوتتى بولعانىن, بىراق باس بوستاندىعىنان ايرىلماعانىن, تەك شارتتى مەرزىممەن قۇتىلعانىن انىقتادى. وسىدان كەيىن ول بيزنەسپەن اينالىسىپ, ءوزىنىڭ ۆاليۋتا ايىرباستايتىن بەكەتىن اشىپ الىپتى.
جەدەل مالىمەتتەر بويىنشا بايعۋانىشەۆتىڭ 22-25 جاستار ارالىعىنداعى جىگىتتەردەن شاعىن توپ قۇرعانىن دا جەتكىزدى. امانعالي سولاردىڭ كومەگىمەن باسەكەلەستەرىن قورقىتىپ كەلىپتى. ونىڭ ولىمىنە دەيىن بىرنەشە كۇن بۇرىن كۇدىكتى حاسان گۋبزاەۆتىڭ ءىنىسى حۋسەين ءوز جىگىتتەرىمەن بىرگە مۇنىڭ توبىنداعى جىگىتتەردىڭ ءبىرىن ۇرىپ تاستاپتى. وسىدان كەيىن حۋسەين گۋبزاەۆتى كەزدەستىرگەن بايعۋانىشەۆ قارۋمەن اتىپ, ونى قولىنان جاراقاتتاعان ەكەن.
«سول كۇنى «بەرەزكا» دۇكەنىنىڭ جانىندا حۋسەيننىڭ اعاسى حاسان گۋبزاەۆ انىقتالماعان قارۋمەن وزدەرىن جابىرلەۋشى بايعۋانىشەۆتى اتىپ كەتەدى, - دەيدى پوليتسەيلەر. – وسىلايشا ءىنىسىنىڭ قولىن جاراقاتتاعانى ءۇشىن اعاسى ودان كەك قايتارادى».
پوليتسەيلەر كىسى ولىمىنە كۇدىكتى حاساننىڭ وسى وقيعادان ءۇش كۇننەن كەيىن قازاقستان-رەسەي شەكاراسىنان ءوتىپ, ورىنبور وبلىسىنا بەت العانىن انىقتايدى.
«4 تامىز, جەكسەنبى كۇنى ايىپ تاعىلۋشى گۋبزاەۆ سامارا قالاسىندا قولعا ءتۇستى, - دەپ حابارلادى وبلىستىق ىشكى ىستەر دەپارتامەنتىنىڭ ءباسپاسوز قىزمەتىنەن. – ۇستاۋ كەزىندە پوليتسيا قىزمەتكەرلەرى گۋبزاەۆتان رەسەيدىڭ جالعان پاسپورتىن الدى. قازىر ونى ورال قالاسىنا جەتكىزۋ ماسەلەسى قارالىپ جاتىر».
قۇرىش نۇرىمبەت.
