وسىنداي كورىنىستەر بۇگىنگى كۇنى اقتوبە ايماعىندا دا بايقالىپ قالىپ جۇرگەنى ەشكىمگە دە قۇپيا ەمەس. مۇنداي جاعدايدا جاق اشپاي ءۇنسىز قالۋدىڭ دا ءجونى جوق. مۇنى دا بەينە ءبىر دەرتتىڭ العاشقى كورىنىسى دەسەك, سول دەرتتى اسقىندىرماي, ۋشىقتىرماي دەر ۋاقىتىندا ۋىتىن قايتارۋدىڭ جولدارىن ىزدەستىرە بىلگەننىڭ پايداسى مول بولماق. اقتوبە وبلىسى اكىمىنىڭ ورىنباسارى مارات توعجانوۆتىڭ ايتۋىنشا, بيىل بۇل ماسەلەگە قاتىستى جۇمىستاردى ءۇش باعىتتا اتقارۋ كوزدەلگەن.
ياعني مۇنىڭ العاشقىسى بولۋى مۇمكىن تەرىس قۇبىلىستاردى الدىن الا ءبىلۋ بولسا, ەكىنشىدەن, اقپاراتتىق-ءتۇسىندىرۋ جۇمىستارىنىڭ مازمۇنىن بايىتا ءتۇسۋ بەلگىلەنگەن. ال ءۇشىنشى كەزەكتە وڭتايلاندىرۋعا قاتىستى جۇرگىزىلەتىن ىستەردى ءبىر ىزگە ءتۇسىرۋ قاراستىرىلعان. تەرىس ءدىني اعىمدا اداسىپ جۇرگەن جانداردىڭ بەتىن بەرى بۇرۋ, ولارمەن ورتاق ءتىل تابىسىپ سويلەسە ءبىلۋ ۇستىرتتىكتى كوتەرە المايدى. بۇعان دا ارنايى ازىرلىك, تەرەڭ دۇنيەتانىم جانە دەرەكتەردى جان-جاقتى زەردەلەي ءبىلۋ قاسيەتتەرى قاجەت.
ءتيىستى ءتۇسىندىرۋ جۇمىستارى سەنىمدى, ورنىقتى ءارى دالەلدى بولعان جاعدايدا عانا ساپالىق قاسيەتكە يە بولا الادى. ايتسە دە وڭىردە ءدىن ىستەرىن قاداعالاپ, وعان تىكەلەي جەتەكشىلىك جاسايتىندار كوپ جاعدايلاردا ساپالىق دەڭگەيدى الدىڭعى كەزەككە قويۋدان گورى, وتكەن جىلى پالەنباي ادامدى قامتىعان پالەنباي ءىس-شارا مەن كەزدەسۋلەر وتكىزىلىپ, بيىل مۇنشاما ءىس-شارالار وتكىزۋدى جوسپارلاپ وتىرمىز دەگەن سىنايداعى سان قۋالاۋ اياسىنان اسا الماي جۇرگەنى دە قىنجىلتپاي قويمايدى.
«اداسقاننىڭ ايىبى جوق, قايتىپ ءۇيىرىڭ تاپقان سوڭ» دەگەندەي, وڭىردە تەرىس جولعا تۇسكەندەردىڭ اراسىندا ءداستۇرلى يسلام دىنىنە قايتادان بەت بۇرىپ جاتقاندار دا بار. مۇنى جوققا شىعارا المايمىز. ايتسە دە ايماقتا دەسترۋكتيۆتى ءدىني اعىمدا جۇرگەندەردىڭ جالپى نوبايى بويىنشا العاندا بۇل بورىكتى اسپانعا اتا قوياتىنداي بيىك ناتيجە دەۋگە دە اۋىز بارا بەرمەيدى.
بۇعان دەيىنگى جاسالعان جۋرناليستىك زەرتتەۋلەر مەن تالداۋلار «قايتىپ ءۇيىرىڭ تاپقانداردىڭ» دەنى نەگىزىنەن اقتوبە قالاسىندا ەكەنىن كورسەتەدى. الايدا تۇتاستاي وبلىس اۋماعىندا, سونىڭ ىشىندە مارتوك, ويىل, ايتەكە بي جانە قوبدا اۋداندارىندا دەسترۋكتيۆتى ءدىني اعىمدى ۇستانىپ جۇرگەن بىردە-ءبىر ادامنىڭ ءداستۇرلى دىنگە قايتادان كىرمەگەنى ءتيىستى تۇسىنىك جۇمىستارىنىڭ جارتىكەشتىگىن كورسەتىپ جۇرمەسىن. وسى ورايدا وبلىستىڭ تەمىر, حرومتاۋ جانە بايعانين اۋداندارىندا دا ءدىني احۋال ازىرگە كۇردەلى كۇيىندە قالىپ وتىر.
جۇرگىزىلەتىن ءىس-شارالاردىڭ ىقپالدى اسەرى مەن تيگىزەتىن پايداسىن تەرەڭدەتە ءتۇسۋدىڭ قاجەتتىلىگى دە وسىندا دەسەك شە؟ مۇنداي كەزدە اتالعان ءىس مەنىڭ قۇزىرەتىمە كىرمەيدى, بۇل تەولوگتىڭ اتقاراتىن شارۋاسى دەپ جاۋاپكەرشىلىكتى وزدەرىنەن الا قاشاتىن وكىلەتتى ورگانداردىڭ وكىلدەرى دە كەزدەسپەي قالمايدى. مۇنداي سىڭارجاق كوزقاراس جاعدايىندا وڭىردەگى ءدىني احۋالدى سارالاۋ ءىسى تولىققاندى بولا المايتىنى اللاعا دا, امبەگە دە ايان بولسا كەرەك. ارينە, اقپاراتتىق-ءتۇسىندىرۋ جۇمىستارى مەن ءارتۇرلى الەۋمەتتىك تەكتەر مەن توپتاردى نەعۇرلىم كوبىرەك قامتي ءبىلۋ ەشقانداي ارتىقتىق ەتپەيدى. بۇل رەتتە وبلىستاعى «انسار» اقپاراتتىق-تالداۋ ورتالىعىنىڭ اتقارىپ جۇرگەن قىزمەتى قۇپتاۋعا تۇرارلىقتاي.
ونىڭ جەتەكشىسى نۇرسۇلتان ءجانشيننىڭ ايتۋىنشا, بۇل باعىتتاعى اتقارىلاتىن ىستەردىڭ ارناسى تارىلىپ كورمەپتى. وعان جاستار مەن جاسوسپىرىمدەر, بازاردا ساۋدا جاسايتىندار, ساۋدا-ساتتىقپەن اينالىساتىن وزگە دە جەكە تۇلعالار, ورالماندار مەن سىرتتان كەلگەن جۇمىسشىلار, ۆاحتالىق ادىسپەن ەڭبەك ەتەتىندەر جانە تۇزەتۋ مەكەمەلەرىندەگى جازاسىن وتەپ جۇرگەندەر قامتىلعان ەكەن.
بۇگىنگى كۇنى تۇرعىنداردىڭ باسىم بولىگى الەۋمەتتىك جەلىنى پايدالاناتىنى بەلگىلى. وسى كەڭ كەڭىستىككە دە ورتالىق ءۇنى تۇراقتى تۇردە ەستىلىپ تۇرادى. ءسويتىپ, «انساردىڭ» ماماندارى ۆكونتاكتە, ينستاگرام جەلىلەرىنە باقىلاۋ جۇرگىزۋدى قولعا الىپتى. بۇل ىستە ورتالىق پاراقشاسىنىڭ تيگىزىپ جۇرگەن پايداسى دا از ەمەس. وسى ارقىلى تۇرعىندار ءدىني قارىم-قاتىناستاردا وزدەرىن تولعاندىرعان ماسەلەلەر بويىنشا سۇراقتار بەرىپ, كەڭەستەر الا الادى. سونداي-اق اقپاراتتىق توپتىڭ اتقارىلعان شارالارى دا جەلى پاراقشالارىنان كورىنىس تاۋىپ تۇرادى.
ارينە, الەۋمەتتىك جەلىدە وكىلەتتى ورگان وكىلدەرىنىڭ بەلسەندىلىك تانىتىپ, كەرى بايلانىس جاساپ وتىرۋىنىڭ پايداسى مەن تيىمدىلىگى جوعارى. مۇنسىز ماسەلەنى تۇبەيگەيلى شەشۋ ەش مۇمكىن ەمەس. ايتسە دە بۇل تۇرعىدا ولاردىڭ ءۇنسىز قالىپ جۇرگەنىن قوستاي قويۋ قيىن-اق.
ورتالىقتىڭ دەسترۋكتيۆتى ءدىني كوزقاراستاعى ازاماتتارمەن جۇرگىزىلەتىن جۇمىستارى تەك مۇنىمەن شەكتەلمەيدى. سونداي-اق ولار مۇنداي توپقا كىرەتىندەر اراسىندا سپورتتىق سايىستار ۇيىمداستىرۋ ىسىنە دە ۇيىتقى بولا ءبىلىپتى. وسىلايشا, انسارلىقتار تەرىس جولدا جۇرگەندەرمەن جەتە تانىسىپ, ولارمەن تەرەڭىرەك تۇردە ءتۇسىنىسۋدى ماقسات ەتىپتى. مۇنداي سيپاتتاعى جۇمىستار ايەلدەر اراسىندا دا قولعا الىنعان.
وڭىردە ءدىن ىستەرىن ۇيلەستىرىپ وتىراتىن ۇيىمدار تاراپىنان: وبلىستا ءدىني احۋال تۇراقتى دەگەن تۇجىرىمدار ۇنەمى ايتىلىپ ءجۇر. راسىندا دا سولاي ما؟ ارينە, ءدىني احۋال مەن قارىم-قاتىناستاردىڭ تۇراقتى بولعانىنا نە جەتسىن؟ بارشا تۇرعىندار مەن جۇرتشىلىق جانە جەرگىلىكتى اتقارۋشى ورگانداردىڭ كوزدەپ جۇرگەن باستى ماقساتى دا وسى ەمەس پە؟ ايتسە دە ءدىني احۋال تۇراقتى دەي تۇرساق دا, بۇل ماسەلەدە, جوعارىدا ايتالعانداي, ءالى دە بولسا شەشىمىن تابا الماي جۇرگەن جايتتار مەن ماسەلەلەر بار ەكەنى نازاردان تىس قالماسا بولعانى دا.
