كەشە ءبىز الدىمەن ايەلىن, سوسىن ەكى قىزىن ءولتىرىپ, سوڭىنان ءوزى ورمانعا بارىپ اسىلىپ قالعان ەركەك تۋرالى جازعان ەدىك. بۇگىن وسىعان قاتىستى قوسىمشا دەرەكتەر بەلگىلى بولىپ وتىر.
Tengrinews.kz ءتىلشىسى حابارلاعانداي, اقمولا وبلىسىنىڭ پوليتسەيلەرى بۇل ءۇش جاقتى كىسى ءولتىرۋ مەن ءوزىن ءوزى ءولتىرۋدىڭ جاي-جاپسارىن تولىق انىقتاپ شىعىپتى.
ىشكى ىستەر دەپارتامەنتىنىڭ دەرەگى بويىنشا, 3 تامىز كۇنى ساعات 08-30 شاماسىندا قورعالجىن اۋدانىنىڭ ارىقتى سەلوسى ماڭىندا Volkswagen Passat كولىگى تابىلادى. ونىڭ سالونىنان 2006 جانە 2009 جىلدارى تۋعان ەكى كىشكەنتاي قىز بالانىڭ مايىتتەرى شىعادى. ال كولىكتىڭ جۇك سالعىشىندا جەلكەسىنەن ءۇش جەردە جاراقاتى بار ايەلدىڭ دەنەسى الىنادى. بۇلاردان 30 مەتردەي جەردە ءىلىنىپ تۇرعان ەر كىسى كەزىگەدى.
پوليتسيا قىزمەتكەرلەرى بۇل وتباسىنىڭ استانا قالاسىندا تۇرعانىن, جازدا بالالاردىڭ ارىقتى سەلوسىنداعى اكەسىنىڭ اتا-اناسى قولىنا كەلەتىنىن انىقتادى. تۋعان-تۋىستارى مەن ارىپتەستەرىنىڭ سوزىنە قاراعاندا, جۇبايلاردىڭ اراسى وتە شيەلەنىستى بولعان. بۇدان بۇرىن ەركەك قىزعانىشتىڭ سالدارىنان ۇيىندە بىرنەشە رەت جانجال دا شىعارىپتى.
ىشكى ىستەر دەپارتامەنتىنىڭ دەرەگىنشە, 2 تامىز كۇنى ەركەك ايەلىن جۇمىسىنان الىپ شىعىپ, ارىقتى سەلوسىندا تۇراتىن اتا-اناسىنا كەلگەن. وسى جەردە بالالارىن الىپ شىققان. جەدەل-ىزدەستۋرى شارالارى بارىسىندا ماشينەنىڭ كەشكى 19 ساعات شاماسىندا نۇرا وزەنى جاققا قاراي بارا جاتقانىن كورىپ قالعان كۋا تابىلدى. ول ەكى ساعاتان كەيىن سول كولىكتىڭ كەرى باعىتقا قاراي كەلە جاتقانىن تاعى كورگەن.
قازىر وسىعان بايلانىستى سوت-مەديتسينا ساراپتاماسى تاعايىندالدى.
قۇرىش نۇرىمبەت.
