اقش-تا بەلگىسىز بىرەۋ اۆتوكولىگىمەن ءبىر توپ ادامدى قاعىپ كەتتى. بۇل تۋرالى «Lifenews.ru» حابارلادى.
وقيعا 3 تامىز كۇنى تۋريستەردىڭ اراسىندا كەڭىنەن تانىلعان كاليفورنيا شتاتى ۆينۋس-بيچ جاعالاۋى اۋدانىندا ورىن الدى. كەشكى ساعات التى شاماسىندا جاعالاۋ دەمالۋشىلارعا تولى كەزدە بەلگىسىز بىرەۋ اۆتوكولىگىمەن ادامداردى باسا جونەلگەن. كۋاگەرلەردىڭ ايتۋى بويىنشا, اۆتوكولىك جۇرگىزۋشىسى بۇل ارەكەتكە ادەيى بارعان كورىنەدى.
«جۇرگىزۋشى ءبىر توپ ادامدى سوققان سوڭ توقتاي قويمادى, كەرىسىنشە, ارى قاراي باسا جونەلىپ ناقتى بىرەۋدى ىزدەپ جۇرگەندەي كورىندى», – دەدى كۋاگەرلەردىڭ ءبىرى.
وقيعا سالدارىنان 12 ادام جاراقات العان. كەيىنىرەك ولاردىڭ ءبىرى العان جاراقاتتاردان اۋرۋحانادا كوز جۇمدى. بەلگىلى بولعانداي, قازا بولعان كەلىنشەك جاقىندا عانا تۇرمىسقا شىعىپ, كاليفورنيا جاعالاۋىنا كۇيەۋىمەن بال ايىن وتكىزۋگە كەلگەن ەكەن. قاسكويدىڭ ارەكەتىنەن جاپا شەككەن تاعى ءتورت ادام اۋىر حالدە جاتقان كورىنەدى.
«اۆتوكولىك ەرتەسى كۇنى وقيعا ورنى ماڭىنان تابىلدى. الايدا, جۇرگىزۋشى قاشىپ كەتكەن, – دەپ حابارلادى لوس-اندجەلەس ءورت ءسوندىرۋ قىزمەتىنىڭ وكىلى. – كەيىنىرەك كۇدىكتى قولعا ءتۇستى».
پوليتسيا كۇدىكتىنىڭ جەكە باسىن انىقتاۋدا. وقيعا ورنىندا تەرگەۋشىلەر جۇمىس اتقارۋدا.
ايدار ورىسباەۆ.
