العاشقى كۇنى ترۋپپا ءوزىنىڭ نەگىزگى باعىتىن – نەوكلاسسيكا مەن زاماناۋي حورەوگرافيانى ءۇش ءبىر اكتىلى بالەت ارقىلى ۇسىنادى. «Astana Ballet presents» باعدارلاماسىنا دجوردج ءبالانچيننىڭ«Concerto Barocco»,ر.رەبەكتىڭ«A Journey of Memory» جانە ن.فونتەنىڭ «Love’s Lost Idols» تۋىندىلارى ەنگەن.
ال 21-23 اقپاندا «كۇلشە قىز» بالەتىنىڭ الماتىلىق پرەمەراسى وتەدى. سەرگەي پروكوفەۆتىڭ عالامات مۋزىكاسى, اۋقىمدى دەكوراتسيا, عاجايىپ كوستيۋمدەرى بارشامىزعا بالا كەزدەن بەلگىلى. حورەوگراف نادەجدا كالينينا ءساتتى سپەكتاكلدىڭ سيۋجەتتەرىن ءبىر ارناعا توعىستىرا كەلە, ۇتىمدى ءازىلدى قولدانا وتىرىپ, ەرەسەكتەر مەن بالالاردىڭ كوزايىمىنا اينالعان ەرتەگى-بالەتىن جاسادى.
ەكى كورىنىستى بالەت اباي اتىنداعى ماوبت ساحناسىنا ىڭعايلانىپ, ىقشامدالدى. بىراق, سپەكتاكل اۆتورلارى بالەتتىڭ بىردە-ءبىر عاجايىپ دەتالى ۇمىت قالمايتىنىن, الماتىلىقتار بۇل سپەكتاكلدىڭ عالاماتىن سەزىنە الاتىنىن ايتادى. كۇلشە قىز پارتياسىن قازاقستاننىڭ ەڭبەك سىڭىرگەن قايراتكەرى تاتيانا تەن, نازەركە ايمۇحامەتوۆا, دارينا قايراشەۆالار ورىنداسا, حانزادانى قازبەك احمەدياروۆ, سۇندەت سۇلتانوۆ جانە فارحات بوريەۆ سومدايدى.
ء«سوز جوق, الماتىدا ونەر كورسەتۋ زور جاۋاپكەرشىلىك جۇكتەيدى. سەبەبى, بولاشاق كاسىبي ماماندار الماتىداعى بالەت مەكتەبىنەن تۇلەپ ۇشادى. مۇندا ءبىزدىڭ ۇستازدارىمىز قىزمەت ەتەدى. تۋعان-تۋىستارىمىز دا وسىندا تۇرادى. بۇل قالانىڭ كورەرمەنى دە ەرەكشە – زەردەلى, تالعامپاز ءارى زيالى» دەيدى, تەاتردىڭ باس بالەتمەيستەرى مۋكارام اۆاحري.
سونىمەن قاتار كورەرمەن نازارىنا بالەت الەمىندەگى زور سۇرانىسقا يە فوتوسۋرەتشى الەكسەي كريۆتسوۆتىڭ فوتوكورمەسى ۇسىنىلادى. «استانا بالەت» تەاترىمەن بىرلەسە جاساعان جۇمىستارى, بالەرينا مەن بيشىلەرگە وزگە قىرىنان, كەيدە ءتىپتى, توسىن راكۋرستان قاراۋعا مۇمكىندىك بەرەدى. بۇل كورمەنىڭ ءار فوتوسۋرەتى – بالەت عالاماتى مەن بيشىلەردىڭ شەبەرلىگىن اسپەتتەيتىن, قازاقستاندىق بالەتتىڭ ەرەكشەلىگىن, سونىڭ ىشىندە, ءار ءارتىستى دارالايتىن ناعىز ونەر تۋىندىسى.
ورايى كەلىپ تۇرعاندا, «استانا بالەت» 2012 جىلى قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ باستاماسىمەن قۇرىلعانىن ايتا كەتۋ كەرەك. تەاتردىڭ بولەك عيماراتى 2016 جىلعى 10 جەلتوقساندا پايدالانۋعا بەرىلدى.
ساحنانى ترانسفورماتسيالاۋ ءۇشىن جىلجىمالى جانە كوتەرىپ-ءتۇسىرۋ مەحانيكاسىنىڭ سوڭعى ۇلگىلەرى قولدانىلادى. ساحنا ءتورت كوتەرىپ-ءتۇسىرۋ پلانشەتى مەن ءتورت ارتىستىك كوتەرگىشپەن جابدىقتالعان. جارىق بەرۋ كەشەنىندە ءداستۇرلى تەاتر قوندىرعىلارى جانە جۇيەلەرىمەن قاتار, وسى سالاداعى سوڭعى يننوۆاتسيالىق جاڭالىقتار قولدانىلعان. 800 جارىق جابدىقتارى ورناتىلىپ, سونىڭ ارقاسىندا كوركەمدىك جارىقتى جوعارى ساپادا جاساۋ مۇمكىندىگى بار.
تەاتردىڭ العاشقى كونتسەرتى 2013 جىلدىڭ شىلدە ايىندا كورسەتىلىپ, جاڭا شىعارماشىلىق ۇجىمدى كورەرمەن قاۋىم جىلى قابىلداعانى بايقالدى.
تەاتردىڭ ءتۇرلى جانرداعى رەپەرتۋارى الەمدىك جانە وتاندىق شەدەۆرلەرمەن, بىرەگەي حورەوگرافيالىق قويىلىمدارمەن ۇنەمى تولىسىپ كەلەدى. وسى رەپەرتۋاردا 22 سپەكتاكل بار. سونىڭ ىشىندە, «ماحاببات تۋرالى اڭىز», «سەرەنادا», «جيزەل», «شەرتكىش», «سالومەيا» جانە ت.ب. سونىمەن قاتار, ەكى كونتسەرتتىك باعدارلاما دا بار: «Astana Ballet Gala» جانە « ۇلى دالا مۇراسى».
