قادىر ءتۇنى رامازان ايىنىڭ سوڭعى ون كۇنىنىڭ بىرىندە بولادى. بۇل ءتۇن تۋرالى قۇران كارىمنىڭ «قادىر سۇرەسىندە» ايتىلعان. بەس اياتتان تۇراتىن سۇرەدە قۇراننىڭ قادىر تۇنىندە تۇسىرىلگەنى, ونىڭ مىڭ ايدان قايىرلى ەكەنى, بۇل تۇندە جابىرەيىل پەرىشتە اللا امىرىمەن جەر بەتىنە ءتۇسىپ, ادامدارعا قىزمەت ەتەتىنى جانە تاڭعا دەيىن تىنىشتىق بولاتىنى ايتىلادى. قادىر ءتۇنى پەرىشتەلەر مۇسىلماندارعا دۇعا وقىپ, تىلەۋلەس بولادى. جاسالعان عيباداتتىڭ مىڭ ايعا, ياعني سەكسەن ءۇش جىلعا تەڭ بولاتىنىنا بايلانىستى مۇسىلماندار قادىر ءتۇنىن قۇلشىلىقپەن وتكىزۋگە تىرىسادى.
تامىز ايىنىڭ ۇشىنەن تورتىنە قاراعان ءتۇنى ەلوردامىزدىڭ ورتا ازيادا ەڭ ۇلكەن سانالاتىن كورىكتى مەشىتى – حازىرەت سۇلتانعا جينالعان مۇسىلمان قاۋىم قادىر ءتۇنىن كۇتتى. جاساعان كۇنالارىنا كەشىرىم سۇراپ, جاراتقاننان دۇعا تىلەپ قۇلشىلىق ەتتى.
حازىرەت سۇلتان مەشىتىنە قادىر ءتۇنىن كۇتۋگە كەلگەن استانا قالاسى الماتى اۋدانى اكىمىنىڭ ورىنباسارى ءسوز سويلەپ, يگى تىلەكتەر تىلەدى. بۇل ءتۇنى مەشىتتە قازاقستان ەستراداسىنىڭ بىرقاتار جۇلدىزدارى دا قۇلشىلىق جاسادى. سونداي-اق ەلىمىزدىڭ تانىمال ايتىسكەر اقىنى حالىقتىڭ جۇرەگىنە يمان ۇيالاتىپ, رۋحاني ازىق سىيلايتىن جىرلارىن تارتۋ ەتتى.
ايدار ورىسباەۆ.
