ايماقتار • 23 قاڭتار، 2020

الماتىدا پەداگوگتاردىڭ رەسپۋبليكالىق فورۋمى ءوتتى

95 رەتكورسەتىلدى

قازاق ۇلتتىق قىزدار پەداگوگيكالىق ۋنيۆەرسيتەتىندە ء«بىلىم بەرۋ مەن تاربيەگە جاڭا كوزقاراس» تاقىرىبىنداعى رەسپۋبليكالىق فورۋم ءوتتى. حالىقارالىق ءبىلىم كۇنىنە ارنالعان القالى باسقوسۋعا وتاندىق جوعارى وقۋ ورىندارى مەن عىلىمي-زەرتتەۋ مەكەمەلەرىنىڭ قىزمەتكەرلەرى، ءبىلىم بەرۋ سالاسىنىڭ ماماندارى جانە شەتەلدىك ۇيىم وكىلدەرى قاتىستى.

قىزدار ۋنيۆەرسيتەتى مەن يۋنەسكو-نىڭ قازاقستان، قىرعىزستان، تاجىكستان جانە وزبەكستان بويىنشا كلاستەرلىك بيۋروسى بىرلەسىپ وتكىزگەن شارا قاتىسۋشىلارى الدىمەن وقۋ ورنىنىڭ عىلىمي كىتاپحاناسىنداعى عالىمدار مەن ءبىلىم الۋشىلاردىڭ عىلىمي جەتىستىكتەرىنىڭ كورمەسىن تاماشالادى. وندا جۇرتشىلىق نازارىنا وقىتۋشىلاردىڭ عىلىمي ەڭبەكتەرىنىڭ ناتيجەلەرى، روبوتوتەحنيكا زەرتحاناسى دايىنداعان يننوۆاتسيالىق جوبالار ۇسىنىلعان.

فورۋم جۇمىسى ۋنيۆەرسيتەت رەكتورى گاۋحار الدامبەرگەنوۆانىڭ العى سوزىمەن اشىلدى.

– ءبىزدىڭ ۋنيۆەرسيتەتىمىزدىڭ حالىقارالىق ءبىلىم كۇنىن اتاپ وتۋگە قاتىسۋىنىڭ وزىندىك سيمۆوليكالىق ءمانى بار. ويتكەنى وقۋ ورنى – ايەل مۇعالىمدەردى دايارلايتىن العاشقى ءارى تۇڭعىش ءبىلىم ورداسى. وتكەن جىلى ۋنيۆەرسيتەتتىڭ قۇرىلعانىنا 75 جىل تولدى. وسى جىلدار ىشىندە قازىنالى قاراشاڭىراق قازاقستاننىڭ ءبىلىم بەرۋ جۇيەسىنە 60 مىڭنان استام مامان دايارلاپ شىعاردى. ءبىز قازىرگى كۇندە دە نەگىزىنەن اۋىل قىزدارىنىڭ شىعارماشىلىق الەۋەتى مەن تۇلعالىق قالىپتاسۋىنا كەڭ مۇمكىندىكتەر بەرەتىن الەۋمەتتىك ميسسيانى جۇزەگە اسىرۋدى جالعاستىرۋدامىز. وسى جىلى الماتىداعى يۋنەسكو-نىڭ كلاستەرلىك بيۋروسى مەن قازاقستان رەسپۋبليكاسى ءبىلىم جانە عىلىم مينيسترلىگىنىڭ قولداۋىمەن رەسپۋبليكالىق دەڭگەيدە فورۋم وتكىزۋدەمىز. ماقساتىمىز – بۇكىل پەداگوگيكالىق قوعامداستىقتىڭ نازارىن ءبىلىم بەرۋ مەن وقىتۋدىڭ وزەكتى ماسەلەلەرىنە اۋدارۋ، ءبىلىم بەرۋ كەڭىستىگىنىڭ بارلىق وكىلدەرىمەن ءوزارا ءىس-قيمىل شەكاراسىن كەڭەيتۋ، ەڭ جاقسى، ەڭ وزىق يدەيالار تاجىريبەسىن بىرىكتىرۋ جانە ءبىلىم مەن عىلىم ينتەگراتسياسىن نىعايتۋ، دەدى گاۋحار الدامبەرگەنوۆا.

ۇلى عالىم ءال-ءفارابيدىڭ 1150 جانە اقىن، ويشىل، اعارتۋشى اباي قۇنانباي ۇلىنىڭ 175 جىلدىق مەرەيتويلارىمەن تۇسپا-تۇس كەلگەن باسقوسۋ اتالعان تۇلعالاردىڭ مۇرالارىن دارىپتەۋدى دە كوزدەيدى.

– ءال-فارابي مەن اباي ەڭبەكتەرىندە رۋحاني-ادامگەرشىلىك تاربيە مەن بىلىمگە قوعامنىڭ جوعارى قۇندىلىعى رەتىندە جەتە ءمان بەرىلەدى. سونىمەن قاتار بۇل ماسەلەلەر بۇگىنگى حالىقارالىق ءبىلىم كۇنى تۇجىرىمداماسىنا دا سايكەس كەلەدى. ءال-ءفارابيدىڭ فيلوسوفيالىق پايىمداۋلارىندا «قايىرىمدى مەملەكەت قۇرۋداعى ەڭ باستى نارسە ءوز ازاماتتارىن «دۇرىس» باعىتتا جانە «دۇرىس» ادامگەرشىلىك قاعيدالارىندا تاربيەلەۋ ىسىنە «دۇرىس» كوزقاراستار ناتيجەسىندە عانا قول جەتكىزۋگە بولادى» دەلىنگەن. ال ۇلى ابايدىڭ ناقىل سوزدەرىنەن تۇلعانى جەتىلدىرۋ ءبىلىم الۋ مەن اعارتۋشىلىققا بايلانىستى ەكەنىن اڭعارۋعا بولادى. «ادامنىڭ ءبىلىمى – ادامزاتتىڭ ولشەمى» دەيدى اقىن. ءبىلىم مەن تاربيە ماسەلەلەرى ءبىزدىڭ زامانىمىزدا دا ءوز وزەكتىلىگىن جوعالتپايتىنىن كورىپ وتىرمىز. ولار اسىرەسە تەحنولوگيانى قارقىندى دامۋى مەن الەمنىڭ وزگەرىپ وتىراتىن جاعدايىندا كۇرت كوتەرىلەدى، دەپ اتاپ ءوتتى قىزدار ۋنيۆەرسيتەتىنىڭ رەكتورى.

گاۋحار الدامبەرگەنوۆانىڭ پايىمداۋىنشا، فورۋم الاڭى ىنتىماقتاستىق ءۇشىن جاڭا يدەيالار پايدا بولاتىن، تاربيە مەن ءبىلىم بەرۋ سالاسىنداعى جاڭا تاسىلدەر مەن مودەلدەر، سونداي-اق وزىق تاجىريبە الماسۋ ءۇشىن كاسىبي پەداگوگيكالىق قاۋىمداستىق قۇراتىن ءداستۇرلى ورىن بولادى.

سونىمەن قاتار جيىن بارىسىندا ءبىلىم جانە عىلىم مينيسترلىگى بولون پروتسەسى جانە اكادەميالىق ۇتقىرلىق ورتالىعىنىڭ ديرەكتورى الماگۇل قۇلتۋمانوۆا، الماتىداعى يۋنەسكو-نىڭ كلاستەرلىك كەڭسەسىنىڭ ديرەكتورى جانە اتالعان ۇيىمنىڭ قازاقستان، قىرعىزستان، تاجىكستان جانە وزبەكستانداعى وكىلى كريستينا توۆماسيان، «بوبەك» ۇلتتىق عىلىمي-پراكتيكالىق، وقۋ-ساۋىقتىرۋ ورتالىعىنىڭ باس ديرەكتورى ەلەنا ساكەنوۆا، قازاقستانداعى فرانتسيا ەلشىلىگىنىڭ ۋنيۆەرسيتەتتەر ىنتىماقتاستىعى جونىندەگى اتتاشەسى جيل مامەتتس تاقىرىپ توڭىرەگىندە ءسوز سويلەپ، پايىمدى ۇسىنىستارىن ءبىلدىردى.

فورۋمنىڭ پلەنارلىق وتىرىسىنان كەيىن قاتىسۋشىلار «تۇراقتى دامۋ ماقساتىنداعى ءبىلىم بەرۋدىڭ ءرولى»، «عالامدىق ازاماتتىق رۋحىن قالىپتاستىرۋداعى تاربيە مەن ءبىلىم بەرۋ»، «تاربيە بەرۋ ماشىعى مەن ادىستەمەسىنىڭ ەۆوليۋتسياسى، تۇراقتى قوعام قۇرۋ جولىنداعى ادام قىزمەتىن قامتاماسىز ەتۋدەگى وقىتۋ مەن ءبىلىم بەرۋ»، «جاستاردىڭ قازاقستان قوعامىنىڭ تۇراقتى دامۋىنا قوسقان ۇلەسى»، «زاماناۋي ءبىلىم بەرۋدەگى جاس عالىمدار پلاتفورماسى: جاڭا يدەيالار مەن مۇمكىندىكتەر»، «4ك مودەلى جاعدايىنداعى مەكتەپكە دەيىنگى تاربيە مەن ءبىلىم بەرۋدىڭ ماسەلەلەرى» تاقىرىبىنداعى پانەلدىك سەسسيالار جۇمىستارىنا قاتىستى.

– وسىمەن ەكىنشى جىل قاتارىنان ۇيىمداستىرىلىپ وتىرعان جيىننىڭ باستى كوزدەگەنى – قازاقستاننىڭ 2030 جىلعا دەيىن تۇراقتى دامۋىن قامتاماسىز ەتۋگە ىقپال ەتەتىن 17 باسىم باعىتتاعى ءبىلىم بەرۋدىڭ ماڭىزىن انىقتاۋ، ونى كەڭىنەن ناسيحاتتاۋ تۇرعىسىندا بىرقاتار ماڭىزدى مىندەتتەردى نازارعا الۋ. فورۋم جۇمىسىنا ءبىلىم بەرۋ سالاسىنىڭ بارلىق ساتىسىنىڭ وكىلدەرى قاتىستى. ولار وزىق تاجىريبەلەر، جاڭا تەحنولوگيالار مەن ادىستەر، ىنتىماقتاستىق پەن ءوزارا ءىس-قيمىل ارقىلى ءبىلىم بەرۋ رەفورمالارىنىڭ قوزعاۋشىسى بولادى دەپ سەنىممەن ايتا الامىز، دەيدى قىزدار ۋنيۆەرسيتەتىنىڭ ءباسپاسوز قىزمەتىنىڭ جەتەكشىسى جاندار اسان.

باسقوسۋ سوڭىندا قاتىسۋشىلار كەلىپ تۇسكەن ۇسىنىستار نەگىزىندە ورتاق شەشىم شىعارىپ، سەرتيفيكاتتارمەن ماراپاتتالدى.

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار