ايماقتار • 22 قاڭتار، 2020

سەمەي: وبلىسقا ءمامس جۇيەسىن ەنگىزۋ دايىندىعى تالقىلاندى

19 رەتكورسەتىلدى

2020 جىلدىڭ 1 ساۋىرىنە دەيىن بارلىق قازاقستاندىقتار شارتتى تۇردە ساقتاندىرىلعان بولىپ سانالادى جانە تەگىن مەديتسينالىق كومەكتىڭ كەپىلدىك بەرىلگەن كولەمى مەن مىندەتتى الەۋمەتتىك مەديتسينالىق كومەك پاكەتىنە سۇيەنەتىن مەديتسينالىق قىزمەتتەردى الا الادى. بۇل تۋرالى سەمەي قالاسى اكىمدىگىنىڭ ءباسپاسوز قىزمەتى حابارلادى.

«وسى ۋاقىت ىشىندە ادامدار وزدەرىنىڭ ساقتاندىرۋ مارتەبەسىن انىقتاپ، مىندەتتى الەۋمەتتىك مەديتسينالىق ساقتاندىرۋ جۇيەسىنىڭ قاتىسۋشىسى بولۋى كەرەك. 
 
ساقتاندىرۋ پاكەتىنە بارلىق جوسپارلانعان مەديتسينالىق قىزمەتتەر كىرەدى: وڭالتۋ جانە قالپىنا كەلتىرۋ ەمى، مامانداردىڭ كونسۋلتاتيۆتىك-دياگنوستيكالىق كومەگى، ستاتسيونارلىق كومەك، امبۋلاتورلىق ءدارى-دارمەكتەر جانە باسقا مەديتسينالىق قىزمەتتەر. كەپىلدەندىرىلگەن تەگىن پاكەتكە بارلىق جەدەل مەديتسينالىق، ءپاللياتيۆتى، العاشقى مەديتسينالىق جانە جەدەل جاردەم كومەگى كىرەدى. سونىمەن بىرگە سوزىلمالى جانە قوعام ءۇشىن قاۋىپتى اۋرۋلارى بار پاتسيەنتتەر مىندەتتى الەۋمەتتىك مەديتسينالىق ساقتاندىرۋ جۇيەسىنە قاتىسۋعا قاراماستان، ساقتاندىرۋ پاكەتىنە تولىق قول جەتكىزە الادى. 
 
جارنالاردى تولەۋدەن ازاماتتاردىڭ 15 جەڭىلدەتىلگەن ساناتى بوساتىلادى: بالالار، زەينەتكەرلەر، ۇلى وتان سوعىسىنىڭ ارداگەرلەرى، مۇگەدەكتەر، كوپ بالالى انالار جانە تاعى باسقالار. ولار ءۇشىن مەديتسينالىق ساقتاندىرۋ قورىنا جارنالاردى مەملەكەت تولەيدى. ماماندار سەمەيدەگى جەدەل مەديتسينالىق جاردەم اۋرۋحاناسىندا وتكەن جيىندا شىعىس قازاقستان وبلىسىندا مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزۋ بويىنشا ازىرلىك تۋرالى ايتىپ بەردى. «الەۋمەتتىك مەديتسينالىق ساقتاندىرۋ» قورىنىڭ شىعىس قازاقستان وبلىسى بويىنشا فيليالىنىڭ ديرەكتورى عالىمجان ءابىلوۆ ايماقتا مىندەتتى الەۋمەتتىك مەديتسينالىق ساقتاندىرۋدى ەنگىزۋ ءۇشىن نورماتيۆتىك-قۇقىقتىق بازا بەكىتىلگەنىن مالىمدەدى. 
 
- ەلىمىزدەگى مىندەتتى مەديتسينالىق ساقتاندىرۋ جۇيەسىندە حالىقتى مەديتسينالىق كومەكپەن قامتۋ شامامەن 87% قۇرايدى، شىعىس قازاقستان وبلىسىندا بۇل كورسەتكىش 86،5% قۇرايدى. وبلىس حالقىنىڭ 13،5% شارتتى تۇردە ساقتاندىرىلماعان، بۇل شامامەن 184 مىڭ ادام. 2018 جىلدىڭ 1 قاڭتاردان باستاپ مارتەبەسىن جاڭارتۋدى قاجەت ەتەتىن 186 مىڭ وبلىستىڭ تۇرعىندارىنان تۇراتىن ءتىزىم انىقتالدى. بۇگىنگى تاڭدا بۇل كورسەتكىش 34،4 مىڭ ادامدى قۇرايدى. جۇمىس جالعاسىپ جاتىر. 86،5% شارتتى تۇردە ساقتاندىرىلعان دەپ سانالادى. مەملەكەت جاردەمدەسەتىن ازاماتتاردىڭ 15 الەۋمەتتىك ساناتىنا 722 مىڭ ادام كىرەدى. تۇراقتى ەمەس تولەمدەرگە كەلەر بولساق، وتكەن جىلى قور 43 مىڭ سالىق تولەۋشىدەن 7،3 ملرد تەڭگەدەن اساتىن اۋدارىمدار الدى، - دەدى عالىمجان ءابىلوۆ.
 
سونىمەن قاتار، وتىرىستا اتاپ وتىلگەندەي، شىعىس قازاقستان وبلىسىندا مىندەتتى الەۋمەتتىك مەديتسينالىق ساقتاندىرۋ 100% تيىمدىلىكپەن ءوتتى. بارلىق مەديتسينالىق مەكەمەلەر ينتەرنەتپەن قامتىلىپ، اقپاراتتىق جۇيەلەرى دەنساۋلىق ساقتاۋ مينيسترلىگى مەن «سانتاندىرۋ» قورىنىڭ اقپاراتتىق جۇيەلەرىمەن بىرىكتىرىلگەن. تەگىن مەديتسينالىق كومەكتىڭ كەپىلدىك بەرىلگەن كولەمىن جانە مىندەتتى الەۋمەتتىك مەديتسينالىق ساقتاندىرۋ پاكەتىن ساتىپ الۋ جوسپارى وتكەن جىلعا قاراعاندا ورتا ەسەپپەن 28%-عا ارتتى. قارجىلاندىرۋ ءوسىمى وڭالتۋ ەمى، دياگنوستيكا جانە باسقا مەديتسينالىق قىزمەتتەر تۇرلەرى بويىنشا بايقالىپ جاتىر.
 
ەستەرىڭىزگە سالا كەتەيىك، ءمامس ساقتاندىرىلعان ازاماتتارعا تەگىن مەديتسينالىق كومەكتىڭ كەپىلدىك بەرىلگەن كولەمىنەن اساتىن مەديتسينالىق قىزمەتتەردىڭ كەڭەيتىلگەن پاكەتىن ۇسىنادى. مىندەتتى الەۋمەتتىك مەديتسينالىق ساقتاندىرۋ ءۇشىن ازاماتتاردىڭ ارقايسىسى بەلگىلەنگەن مولشەردە مەديتسينالىق ساقتاندىرۋ قورىنا اي سايىن جارنالار مەن اۋدارىمدار تولەۋگە مىندەتتى» دەلىنگەن حابارلامادا.
سوڭعى جاڭالىقتار

ۇقساس جاڭالىقتار