رۋحانيات • 21 قاڭتار، 2020

ەلوردادا اباي مەرەيتويىنىڭ سالتاناتتى اشىلۋى ءوتىپ جاتىر

58 رەتكورسەتىلدى

«استانا وپەرا» مەملەكەتتىك وپەرا جانە بالەت تەاترىندا قازاق حالقىنىڭ ۇلى اقىنى، ويشىل-كەمەڭگەرى اباي قۇنانباي ۇلىنىڭ 175 جىلدىعىنىڭ سالتاناتتى اشىلۋ ءراسىمى وتۋدە. شاراعا ەلباسى نۇرسۇلتان نازارباەۆ پەن پرەزيدەنت قاسىم-جومارت توقاەۆ قاتىسىپ جاتىر. 

سالتاناتتى جيىندا اباي قۇنانباي ۇلىنىڭ 175 جىلدىعىن مەرەكەلەۋدىڭ باستالۋى رەسمي جاريالاندى جانە مادەنيەت جانە سپورت مينيسترلىگى وسىعان وراي قازاقستاننىڭ ونەر شەبەرلەرىنىڭ كونتسەرتىن ۇسىندى.

وسىعان دەيىن مينيسترلىك «استانا وپەرا» تەاترىنىڭ ساحناسىندا ۇلى ابايدىڭ ولەڭدەرى مەن اندەرى كسرو جانە قازاقستاننىڭ حالىق ءارتىسى، قازاقستاننىڭ ەڭبەك ەرى اسانالى ءاشىموۆ، قازاقستاننىڭ حالىق ارتىسى، قازاقستاننىڭ ەڭبەك ەرى روزا رىمباەۆا، كسرو جانە قازاقستاننىڭ حالىق ارتىسى الىبەك دىنىشەۆ، قازاقستاننىڭ ەڭبەك سىڭىرگەن ارتىسى، مەملەكەتتىك سىيلىقتىڭ يەگەرى مايرا مۇحامەدقىزى، قازاقستاننىڭ ەڭبەك سىڭىرگەن قايراتكەرى تامارا اسار، حالىقارالىق جانە رەسپۋبليكالىق كونكۋرستاردىڭ لاۋرەاتتارى مەن ەلىمىزدىڭ جاس دارىندارىنىڭ ورىنداۋىندا، «استانا وپەرا» مەملەكەتتىك وپەرا جانە بالەت تەاترىنىڭ سيمفونيالىق وركەسترىنىڭ سۇيەمەلدەۋىمەن شىرقالاتىنىن حابارلاعان ەدى.

«بيىل اباي قۇنانباي ۇلىنىڭ تۋعانىنا 175 جىل تولادى. حالقىمىزدىڭ ۇلى پەرزەنتىنىڭ مەرەيتويىن لايىقتى اتاپ ءوتۋ ءۇشىن ارنايى قۇرىلعان كوميسسيا دايىندىق جۇمىستارىن باستاپ كەتتى. مەملەكەت كولەمىندە جانە حالىقارالىق دەڭگەيدە اۋقىمدى ءىس-شارالار ۇيىمداستىرۋ جوسپارلانىپ وتىر. بىراق مۇنىڭ ءبارى توي تويلاۋ ءۇشىن ەمەس، وي-ءورىسىمىزدى كەڭەيتىپ، رۋحاني تۇرعىدان دامۋىمىز ءۇشىن وتكىزىلمەك» دەپ جازدى قازاقستان رەسپۋبليكاسىنىڭ پرەزيدەنتى ق.ك. توقاەۆ ءوزىنىڭ «اباي جانە ءححى عاسىرداعى قازاقستان» اتتى ماقالاسىندا.

سونداي-اق تەاتر ساحناسىندا 25 قاڭتار كۇنى «اباي» وپەراسى ساحنالانادى. 

d 

سوڭعى جاڭالىقتار

ۇقساس جاڭالىقتار