الەم • 21 قاڭتار، 2020

وزبەكستان ۇكىمەتى وتستاۆكاعا كەتتى

33 رەتكورسەتىلدى

وزبەكستان ۇكىمەتى تولىق قۇرامدا ەلدىڭ جاڭا ولي ءماجليسى (پارلامەنت) الدىندا ءوز وكىلدىگىن توقتاتتى. بۇل تۋرالى قازاقپاراتتىڭ مەنشىكتى ءتىلشىسى وزبەكستان پارلامەنتىنىڭ زاڭ شىعارۋشى پالاتاسىنىڭ ءباسپاسوز قىزمەتىنە سىلتەمە جاساپ حابارلادى.

اتاپ ايتقاندا، پارلامەنتتىڭ تومەنگى زاڭ شىعارۋ پالاتاسىنىڭ ءبىرىنشى وتىرىسىنىڭ قورىتىندىسى بويىنشا وزبەكستان ۇكىمەتىنىڭ ءوز وكىلدىگىن توقتاتىنى تۋرالى ءوتىنىشى قابىلداندى. مۇنداي ءوتىنىش سەناتقا دا تۇسكەن ەدى، ول قاناعاتتاندىرىلدى.

«وزبەكستان رەسپۋبليكاسى كونستيتۋتسياسىنىڭ 98-بابىنا سايكەس، وزبەكستاننىڭ مينيسترلەر كابينەتى جاڭا سايلانعان ولي ماجليسكە وكىلدىگىن توقتاتاتىنى تۋرالى ءوتىنىش ءبىلدىردى. وزبەكستان رەسپۋبليكاسىنىڭ ولي ءماجليسىنىڭ زاڭ شىعارۋشى پالاتاسى سايكەس قاۋلىنى قابىلدادى»، - دەپ اتاپ ءوتتى پارلامەنتتىڭ ءباسپاسوز قىزمەتىنەن.

ءباسپاسوز قىزمەتى كونستيتۋتسياعا سايكەس، ۇكىمەت كابميننىڭ جاڭا قۇرامى قۇرىلعانعا دەيىن ءوز جۇمىسىن جالعاستىراتىنىن ناقتىلادى. سونىمەن قاتار پارلامەنت 21 قاڭتاردا وتەتىن ەكى پالاتانىڭ بىرلەسكەن وتىرىسىندا جاڭا پرەمەردىڭ كانديداتۋراسىن قارايدى، - دەپ حابارلادى زاڭ شىعارۋ پالاتاسىنىڭ ءباسپاسوز قىزمەتى.

ەسكە سالايىق، وزبەكستان كونستيتۋتسياسىنا سايكەس، پرەمەردىڭ كانديداتۋراسىن پارلامەنتتىڭ زاڭ شىعارۋشى (تومەنگى) پالاتاسىندا ەڭ كوپ دەپۋتاتتىق ورىن جيناعان پارتيا ۇسىنادى. 2019 جىلدىڭ 22 جەلتوقسانىندا بولعان سايلاۋ قورىتىندىسى بويىنشا وزبەكستان ليبەرالدىق-دەموكراتيالىق پارتياسى ەڭ كوپ ورىن - 53 دەپۋتاتتىق ورىن الدى.

 

سوڭعى جاڭالىقتار

ۇقساس جاڭالىقتار