مەديتسينا • 21 قاڭتار، 2020

كاپسۋلالىق ەندوسكوپيا – جىڭىشكە ىشەك اۋرۋلارىن انىقتاۋدىڭ «التىن ستاندارتى»

32 رەتكورسەتىلدى

الماتىداعى كارديولوگيا جانە ىشكى اۋرۋلار عىلىمي-زەرتتەۋ ينستيتۋتى 2014 جىلدان بەرى جىڭىشكە ىشەكتى زەرتتەۋدىڭ ەرەكشە ءادىسىن جۇرگىزىپ كەلەدى. ينستيتۋتتىڭ ەندوسكوپيا جانە ينتەرۆەنتسيالىق گاستروەنتەرولوگيا بولىمشەسى جىڭىشكە ىشەكتى زەرتتەۋدىڭ ەرەكشە ءادىسى بولىپ تابىلاتىن بەينەكاپسۋلالىق ەندوسكوپيا جاسايدى. بۇل – اسقازان-ىشەك جولدارى اعزالارىن، جىڭىشكە ىشەكتىڭ ءۇش بولىگىن: ۇلتابار، اشىشەك جانە مىقىنىشەككە گاسترو جانە كولونوسكوپيا جاساپ، زەرتتەۋدىڭ ءداستۇرلى ادىسىندە قول جەتكىزبەيتىن ىشەك ماڭايىن كورۋگە مۇمكىندىك بەرەتىن ەڭ زاماناۋي ءادىس.

وسى ءادىس ءوز اتاۋىن كولەمى جاعىنان دارىلىك پرەپاراتتىڭ كاپسۋلاسىنا ۇقساس بەينەكامەراسى بار ميكروكاپسۋلادان الادى. قوندىرعىنىڭ ديامەترى شامامەن 11-13 مم، ۇزىندىعى 24-26 مم. بەينەكاپسۋلانى كوبىنە جىڭىشكە ىشەكتى زەرتتەگەن كەزدە قولدانادى.

زەرتتەۋدىڭ ەرەكشەلىگى سوندا، ءينۆا­زيۆ­­تى ەمەس تاسىلمەن جىڭىشكە ىشەكتى بارلىق جاعىنان قاراۋعا مۇمكىندىك بەرەدى. ونىڭ ادام اعزاسىنا ەشقانداي زياندى جانە جاعىمسىز اسەرى بولمايدى. سەداتيۆتى زاتتاردى قولدانۋ تالاپ ەتىلمەيدى جانە پروتسەدۋرا اۋىرتپاي جاسالادى. سونىمەن قاتار كاپسۋلا ءبىر رەتتىك بولىپ تابىلادى، بۇل پاتسيەنتتىڭ ينفەكتسيا جۇقتىرۋىنا جول بەرمەيدى. زەرتتەۋدى امبۋلاتورلىق جاعدايدا دا، ستاتسيوناردا دا جاساۋعا بولادى.

زەرتتەۋ جاسالاتىن كۇنى پاتسيەنت (دارىگەرمەن كەلىسىلگەن بارلىق قاجەت­تى پروتسەدۋرالار مەن زەرتتەۋلەردى وتكەن­نەن كەيىن) كادىمگى تابلەتكانى جۇت­قان­داي بەينەكاپسۋلانى جۇتادى.

تابيعي جيىرىلۋىنىڭ ناتي­جە­سىن­دە كاپسۋلا اسقازان-ىشەك جولدا­رى­نىڭ بارلىق بولىكتەرىن وتەدى دە، وزدىگىنەن اعزادان شىعىپ كەتەدى. ول اسقورىتۋ جولدارى ارقىلى وتكەندە پا­تسيەنتتىڭ بەلىندەگى قابىلداۋ قون­دىرعىسى سىمسىز ارنامەن سۋرەتكە تۇسىرەدى دە، وسىدان كەيىن ارنايى دياگنوستيكالىق باعدارلامانىڭ كومەگىمەن بەينەكورىنىسكە اينالادى جانە الگوريتمدەردىڭ كومەگىمەن تالداۋ جاسالادى. 12 ساعاتتان كەيىن قوندىرعى كلينيكاعا قايتارىلادى، ال دارىگەر الىنعان مالىمەتتەرگە تالداۋ جۇرگىزەدى.

زەرتتەۋدىڭ وسىناۋ ءادىسى ىشەكتەن قان كەتكەندە (ۇزاق ۋاقىت بولاتىن تەمىر­تاپشىلىقتى انەميا، جاسىرىن قان­عا جاسالاتىن ءناجىستىڭ وڭ ءاناليزى)، كرون نەمەسە وسى اۋرۋعا كۇدىك پايدا بول­عاندا، جىڭىشكە ىشەكتەگى سورىلۋدىڭ مۇم­كىنشىلىگى بولماۋى سالدارىنان (تسەلياكيا) قالىپتى مەتابوليكالىق پروتسەستەردىڭ بۇزىلۋىمەن نەگىزدەلگەن مالابسوربتسيا سيندرومىنا كۇدىك تۋىنداعاندا، جىڭىشكە ىشەك ىسىگى كەزىندە، ىشەك پوليپتەرىندە، ىشتەگى تۇسى­نىكسىز اۋرۋلار جانە تۇسىنىكسىز ەتيو­لوگيادا سالماق جىلدام ازايعاندا ۇسى­نىلادى.

«پاتسيەنتتەردىڭ كوپشىلىگى بەينە­كاپ­­سۋلالىق ەندوسكوپيا گاستروسكوپيا مەن كولونوسكوپيانى الماستىرا الادى ما دەپ سۇرايدى. وسىعان بايلانىستى، بەينەكاپسۋلا اسقازان-ىشەك جولدارىنىڭ بارلىق بولىمدەرىنەن وتەدى، ول اناتوميالىق قۇرىلىمىنىڭ ەرەكشەلىگىنەن تەك جىڭىشكە ىشەكتى مەي­لىنشە مۇقيات زەرتتەيدى دەپ ايتا كەت­كىم كەلەدى»، دەيدى ەندوسكوپيا جانە ينتەرۆەنتسيالىق گاستروەنتەرولوگيا بولىمشەسىنىڭ مەڭگەرۋشىسى الما حا­بي­جانوۆا.

الما سەرىكقىزىنىڭ ايتۋىنشا، اسقازان جانە جۋانىشەك جارتىلاي قارالادى. ارينە مامان قانداي دا ءبىر پاتولوگيالىق وزگەرىستەردى كورە الادى، بىراق ونى دالەلدەۋ جانە باعالاۋ ءۇشىن گاستروسكوپيا/كولونوسكوپيا تا­عايىن­­دالادى.

دۇنيە جۇزىندە كاپسۋلالىق ەندوس­كو­پيا جىڭىشكە ىشەك اۋرۋلارىن دياگ­نوس­تيكالاۋداعى «التىن ستاندارت» سانالادى.

 

الماتى

 

سوڭعى جاڭالىقتار

ۇقساس جاڭالىقتار