تاۋەلسىزدىك كۇرەسكەرى حان ابىلايدىڭ 300 جىلدىعىنا وراي وبلىس اۋماعىندا ءتۇرلى شارالار ۇيىمداستىرىلىپ, مەرەيتويدىڭ ءدۇبىرى كۇن وتكەن سايىن جاقىنداي تۇسۋدە. مۇندا جەرگىلىكتى ازاماتتاردىڭ جەكە ۇلەستەرى دە مولىنان بايقالادى. جۋىردا پارلامەنت سەناتىنىڭ دەپۋتاتى جابال ەرعاليەۆتىڭ ابىلاي حان تويىن وتكىزۋدەگى تىڭ ۇسىنىستارى ماقۇلدانسا, اقىن, سازگەر, ءانشى يران سال تاسقارا «تاۋەلسىزدىكتىڭ كوك تۋى» اتتى كانتاتانىڭ ليبەروتتاسىن جازىپ, قايىرىمدىلىق كونتسەرتىن وتكىزدى.
كانتاتانىڭ ءساتتى شىعۋىنا اتسالىسقان وبلىستىق مادەنيەت باسقارماسى مەن ءبىرجان سال اتىنداعى كوكشەتاۋ مۋزىكا كوللەدجىنىڭ ۇجىمى, سونىڭ ءىشىندە كوللەدج ديرەكتورى قايىرلى سارسەنباەۆ, ديرەكتوردىڭ ورىنباسارى, سازگەر تانزيپ ەسىركەپوۆ, حورمەيستەر اسىلتاس بالاپايقىزى, ديريجەر تۇرلىقوجا بازاروۆتىڭ ەڭبەكتەرى ەرەكشە. تۋىندى ابىلاي حاننىڭ «شاڭدى جورىق» كۇيىمەن قۋاتتانا تۇسكەن. «تاۋەلسىزدىكتىڭ كوك تۋى» كانتاتاسىنىڭ اۋەندەرى, كۇيلەرى قازىرگى كۇنى ينتەرنەت جەلىلەرىندە تاراپ, قالىڭ جۇرتشىلىق تاماشالاۋدا. الداعى ۋاقىتتا باتىر بابامىزدىڭ مەرەيتويىندا زور شابىتپەن ورىندالماقشى.
باقبەرگەن امالبەك,
«ەگەمەن قازاقستان».
كوكشەتاۋ.
