«اقتوبە» كومانداسى ەۋروپا ليگاسىنداعى ءۇشىنشى ىرىكتەۋ كەزدەسۋلەرىنىڭ العاشقى ويىنىندا ءوز الاڭىندا يسلانديانىڭ «برەيدابليك» كومانداسىن قابىلدادى. جەرگىلىكتى جانكۇيەرلەر بۇل جولى دا اقتوبەلىكتەردەن جەڭىس كۇتكەنى شىندىق. سۇيىكتى كومانداسىنىڭ ويىنىن قوبىلاندى باتىر اتىنداعى ورتالىق ستاديوننان كورۋگە ىقىلاستىلاردىڭ بارلىعىنىڭ ارمانى جۇزەگە اسۋى قيىن بولدى. ورتالىق ستاديوندا وتىرىپ ماتچتى تاماشالاۋعا جينالعان 13500 جانكۇيەر قولداۋىمەن باستالعان ويىندى ستاديونعا سىيماي قالعاندار ءۇشىن سىرتقا قويىلعان ۇلكەن تەلەديدار ەكرانىنان تاماشالاۋعا دا مۇمكىندىك جاسالدى.
«اقتوبە» كومانداسى ەۋروپا ليگاسىنداعى ءۇشىنشى ىرىكتەۋ كەزدەسۋلەرىنىڭ العاشقى ويىنىندا ءوز الاڭىندا يسلانديانىڭ «برەيدابليك» كومانداسىن قابىلدادى. جەرگىلىكتى جانكۇيەرلەر بۇل جولى دا اقتوبەلىكتەردەن جەڭىس كۇتكەنى شىندىق. سۇيىكتى كومانداسىنىڭ ويىنىن قوبىلاندى باتىر اتىنداعى ورتالىق ستاديوننان كورۋگە ىقىلاستىلاردىڭ بارلىعىنىڭ ارمانى جۇزەگە اسۋى قيىن بولدى. ورتالىق ستاديوندا وتىرىپ ماتچتى تاماشالاۋعا جينالعان 13500 جانكۇيەر قولداۋىمەن باستالعان ويىندى ستاديونعا سىيماي قالعاندار ءۇشىن سىرتقا قويىلعان ۇلكەن تەلەديدار ەكرانىنان تاماشالاۋعا دا مۇمكىندىك جاسالدى.
چەحيالىق باس تورەشى ليبار كوۆارجيك ويىندى باستاعاننان كەيىن-اق جانكۇيەرلەر «اقتوبە» دەپ داۋىستاپ قولداۋ كورسەتۋدەن تانبادى. كەزدەسۋدىڭ ءتورتىنشى مينۋتىندا قارسىلاستار قاقپاسىنا العاشقى سوققى جاسالۋى جانكۇيەرلەردى جىلدام گولدان دامەلەندىرىپ, ودان سايىن جەلپىندىردى.
ويىننىڭ 6 مينۋتىندا اندرەي حارابارا قاقپاعا تۋرا سوققى باعىتتاپ ۇلگەردى. وسىلاي العاشقى مينۋتتاردان باستاپ قارسىلاستار قاقپاسىن قاراۋىلداۋعا كوشكەن جەرلەستەرىمىز ورنەكتى ويىن كورسەتۋگە تىرىسىپ-اق باقتى. دەگەنمەن, تاسقامال قورعانىسقا كوشكەن يسلانديالىقتار ايىپ الاڭىندا ساۋاتتى ويناپ, كوتەرىپ بەرىلگەن پاستار مەن شابۋىلداردىڭ بەتىن قايتارىپ وتىردى. اسىرەسە, قاقپاشى گۋننلەيفەر گۋننلەيفسسون شەبەرلىك كورسەتتى. ول اندرەي حارابارانىڭ, پەتر بادلونىڭ سوققىلارىن قينالماي قايتارا ءبىلدى. ارا-تۇرا قارسىلاستار دا قارسى شابۋىلعا شىعىپ, اندرەي سيدەلنيكوۆتىڭ قىراعىلىعىن باقىلاعان كەزدەر بولدى. الايدا, اقتوبەلىك قاقپاشى قاپىسىز قيمىلدادى. بۇل جولى اقتوبەلىك شابۋىلشى سەرگەي داۆىدوۆ تا قانشا تىرىسقانىمەن ايىپ الاڭىندا شالت قيمىلداۋدىڭ ورنىنا, ۇزىن بويلى يسلانديالىقتاردان ايلاسىن اسىرا المادى.
وسى ويىن ورنەگى ەكىنشى تايمدا دا جالعاستى. الاڭ يەلەرى العاشقى مينۋتتاردان شابۋىلداعانىمەن قارسىلاستار قاپىسىز قورعاندى. مارات حايرۋللين «برەيدابليك» كومانداسى قاقپاسىنىڭ ءدال ورتاسىنا سوققى جاسادى, بۇل دوپ قارسىلاستار قاقپاشىسىنىڭ قاقشىپ الۋىنا ەش قيىندىق كەلتىرمەدى. وسىنداي جاعدايدى پەتر بادلو دا قايتالادى. سەرگەي داۆىدوۆ دوپتى باسپەن قاقپادان قياس ۇرىپ, قاپى قالدى. ويىننىڭ ەكىنشى كەزەڭىنىڭ ورتاسىنان وتە ارزۋمانياننىڭ ورنىنا شىققان ەميل كەنجەساريەۆ, كوۆالچۋكتى الماستىرعان الەكساندر گەينريح شابۋىلدى قىزدىرا ءتۇستى. سەرگەي داۆىدوۆتى الماستىرعان سەرگەي گريدين ويىنعا ءسال دە بولسا قارقىن قوسقانداي بولدى. وسى ۇشەۋىنىڭ تىزە قوسا وزگە ويىنشىلارمەن تۇسىنىسە شابۋىلدى ۇدەتۋى دە ناتيجەسىز اياقتالىپ جاتتى. ەشقايسىسى دا قاقپاشىنى قاپى قالدىراتىنداي ادەمى سوققى جاساي المادى. ءالسىن-ءالسىن قارسىلاستاردىڭ ايىپ الاڭىنا بارعان اقتوبەلىكتەر ويىننىڭ سوڭعى مينۋتىندا دەگەندەرىنە جەتتى. ايىپ الاڭىندا يسلانديالىق ويىنشى دوپتى الىپ سىتىلىپ بارا جاتقان الەكساندر گەينريحتىڭ ۇستىنە جاتا قالىپ, قۇلاتىپ, ويىن ەرەجەسىن بۇزدى. چەحيالىق باس تورەشى ليبار كوۆارجيك ەش ويلانباستان 11 مەترلىك ايىپ دوبىن بەلگىلەدى. ايىپ دوبىن ۇرعان مارات حايرۋللين قارسىلاستار قاقپاسىنىڭ وڭ جاق بۇرىشىنا ادەمى سوققى باعىتتادى. «برەيدابليك» كومانداسىنىڭ قاقپاشىسى گۋننلەيفۋر گۋننلەيفسسون سوققى باعىتىن اڭعارىپ قالعانمەن ءدال سوعىلعان دوپتى توقتاتۋعا دارمەنى جەتپەدى. ەسەپ 1:0 اقتوبەلىكتەر پايداسىنا شەشىلدى. ەندى جاۋاپ ويىن 8 تامىزدا يسلانديادا وتەدى. ارينە, اقتوبەلىكتەر پلەي-وففقا شىعۋى ءۇشىن ويىن ورنەگىن اناعۇرلىم شيراتىپ, جىگەرمەن كەلگەن جەڭىستى جالعاستىرۋدىڭ جولىن ىزدەۋى ءتيىس.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.
