مەديتسينا • 17 قاڭتار، 2020

مامموگرافيانىڭ ورنىنا توموسينتەز كەلدى

24 رەتكورسەتىلدى

تاياۋدا الماتىدا العاشقى توموسينتەز ورتالىعى اشىلدى. وسىنداي وزىق تەحنولوگياعا نەگىزدەلگەن توموسينتەز ورتالىعى 1،5 جىل بۇرىن نۇر-سۇلتان قالاسىندا اشىلعان-دى.

جاپونيادان جەتكەن وزىق ديگ­نوس­تيكالىق اپپارات – دەنساۋ­لىق سالاسىنداعى جاعىمدى وقيعا عانا ەمەس، الماتىنىڭ اينا­لا­سىن­داعى بۇكىل وڭتۇستىك وڭىرلەر­دىڭ تۇر­عىندارىنا جاسالعان ۇلكەن سىي دەپ تە ايتۋعا بولادى.

بۇل جوبا قازاق ونكولوگيا جانە راديولوگيا عىلىمي-زەرتتەۋ ينستيتۋتىمەن بىرلەسىپ، مەملەكەت-جە­كە­مەنشىك ارىپتەستىك شەڭبەرىندە جۇ­زەگە اسىرىلدى.

Divera توموسينتەز جاڭا ور­تالىعى زاماناۋي Fujifilm Amulet Innovality اپپاراتىمەن جاب­دىق­تالعان جانە قازىرگى ۋاقىتتا الماتى قالاسىنداعى جالعىز توموسينتەز. ورتالىقتى قۇرۋ جانە ونى جاب­دىقتاۋ تولىعىمەن جەكە ينۆەستيتسيا ەسەبىنەن جۇزەگە اسىرىلدى.

«توموسينتەز – ءسۇت بەزى وبىرىن دياگنوستيكالاۋدىڭ يننوۆاتسيالىق ءادىسى. قالىپتى 2D-مامموگرافيادان ايىرماشىلىعى، توموسينتەز ءار­تۇرلى بۇرىشتاعى جۇقا قاباتتى سۋ­رەت­تەردىڭ قاتارىن شىعارادى، بۇل ءسۇت بەزى وبىرىن ەرتە باستان اسا دال­دىكپەن انىقتاۋعا جانە پا­­تسيەنت­­تەردىڭ ءومىرىن ساقتاۋعا مۇم­­كىندىك بەرەدى»، دەيدى «قازاق ونكولوگيا جانە راديولوگيا عىلى­مي-زەرتتەۋ ينستيتۋتى» اق باس­قارما ءتورايىمى، مەديتسينا عىلىم­دارىنىڭ دوكتورى ديليارا قايداروۆا.

– تاۋەلسىزدىك كۇنى قارساڭىندا ءبىزدىڭ كومپانيا الماتىداعى ون­كولوگيا ورتالىعىمەن مەملەكەت-جەكەمەنشىك ارىپتەستىك اياسىندا ۇلكەن جوبا باستادى. بۇل جوباعا ءبىز ينۆەستور رەتىندە 140 ميلليون تەڭگە قاراجات جۇمسادىق. باستى ماقسات – ءسۇت بەزى وبىرىن باستاپقى كەزەڭدە انىقتاپ، دەر كەزىندە، اسقىندىرماي ەم جۇرگىزۋ. وزدەرىڭىزگە بەلگىلى، ەلىمىزدە ءسۇت بەزى وبىرى ايەلدەر اراسىندا ءبىرىنشى ورىندا تۇر. بۇل اپپاراتتىڭ مامموگرافيادان ۇلكەن ارتىقشىلىعى – 1 مم ولشەمدە، ياعني ميلليمەترلەپ ءسۇت بەزى قاتەرلى ىسىگىن انىقتايدى. جانە توموسينتەزگە ءتۇسىرىپ جاتقان كەزدە بيوپسيا­نى دا قوسا جۇرگىزە الامىز. بۇرىن مام­موگراف ءسۇت بەزى وبىرىنىڭ بەل­گىلەرى بولسا، ناۋقاستىڭ بۇلشىق ەتىن الۋ ءۇشىن ەمحانالارعا، حيرۋرگكە جىبەرەتىن. ەندى قازىر قاجەت بولعان جاعدايدا دياگنوستيكامەن قوسا بيوپسيا دا جاسالادى. ەڭ باس­تىسى، توموسينتەز – ونكولوگيا سالا­سىنداعى ەڭ زاماناۋي جاڭا تەحنولوگيا. ەلىمىزدە 2017 جىلى بۇل اپپارات نۇر-سۇلتان قالاسىنا اكەلىنگەن. 1،5 جىلدان كەيىن ەكىنشى اپپارات الماتى قالاسىنا كەلدى. ويتكەنى الماتى قالاسى مەن وبلىسىندا حالىق كوپ. بۇل اپپاراتتىڭ ءبىر ارتىقشىلىعى، «تسيفرلى قازاق­ستان» جوباسىن دا العا جىلجىتادى. توموسينتەز سۋرەتتەرىن ەلەكتروندى پوشتا ارقىلى كەز كەلگەن جاققا، ونكولوگ-دارىگەرلەردىڭ قاراۋىنا جىبەرە بەرۋگە بولادى،  – دەيدى «Olymp Medical Group» جشس باس ديرەكتورى ەرجان سۇلەيمەنوۆ.

اپپاراتتى قازاقستانعا اكەل­گەن­نەن كەيىن 1 اي ىشىندە دەنساۋلىق ساقتاۋ مينيسترلىگىنە ۇسىنىستار بەرىلدى. وندا 2020 جىلدان باستاپ ستاندارت ەسەبىندە جاڭا اپپاراتتى ءسۇت بەزى قاتەرلى ىسىگىن انىقتايتىن دياگ­نوستيكا تۇرىنە كىرگىزۋ جانە وعان تاريف قويۋ ۇسىنىلعان. قازىر مينيس­ترلىك بۇل جوبانى قاراپ جاتىر. ال بيىلدان باستاپ ەلىمىزدە ءمامس ەنگىزىلدى. سوندىقتان وسى اپ­پارات تا مەديتسينالىق ساقتان­دىرۋ جۇيەسىنە كىرەدى دەگەن ءۇمىت بار. ەڭ باستىسى، بۇل اپپاراتتىڭ رادياتسيالىق اسەرى وتە تومەن. بۇ­رىن مامموگرافيالىق سكرينينگكە 40 جاسقا دەيىنگى قىز-كەلىنشەكتەر كەلەتىن بولسا، بۇل اپپارات 40 جاسقا دەيىنگىلەرگە دە دياگنوستيكا جاسايدى.

قازىرگى تاڭدا توموسينتەزدىڭ كومەگىمەن ءسۇت بەزى وبىرىن دياگنوس­تيكالاۋ ادىستەرى ەۋروپادا، اقش-تا، كورەيادا جانە جاپونيادا تابىس­تى قولدانىلادى.

ال ءسۇت بەزى وبىرى – الەمدە ەڭ كەڭ تاراعان قاتەرلى اۋرۋ جانە ايەل­دەر اراسىنداعى ءولىم-ءجىتىم­نىڭ باستى سەبەپشىسى بولىپ وتىر. قا­زاقستاندا ءسۇت بەزى وبىرى ايەلدەردىڭ ونكولوگيالىق اۋرۋشاڭدىعى قۇرى­لىمىندا ءبىرىنشى ورىندا تۇر.

ءوز كەزەگىندە قاتەرلى ىسىكتى اسقىن­دىرماي انىقتاۋعا باعىت­تالعان جۇيەلى سكرينينگ، ەمدىك تاكتيكانى ۋاقتىلى دياگنوستيكالاۋ جانە ستاندارتتاۋ ەلىمىزدە ءسۇت بەزى وبىرىنان ءولىم-ءجىتىم دەڭگەيىن تومەندەتۋگە مۇمكىندىك بەرەدى.

 

الماتى

 

سوڭعى جاڭالىقتار

الىپ ءتيىن تورگە وزدى

ايماقتار • كەشە

18،6 ميلليونعا جەتتىك

قازاقستان • كەشە

كحل: «بارىس» جەڭىسكە جەتتى

حوككەي • 15 اقپان، 2020

جول قۇرىلىسىنان تابىلعان اقاۋ كوپ

ايماقتار • 15 اقپان، 2020

اقتوبەدە اۆتوبۋس اۋدارىلدى

ايماقتار • 15 اقپان، 2020

بيىل بقو-دا 1710 پاتەر بەرىلەدى

ايماقتار • 15 اقپان، 2020

جەر سىلكىندى

قازاقستان • 15 اقپان، 2020

ۇقساس جاڭالىقتار