پرەزيدەنتتىك جاستار كادر رەزەرۆى باستاماسى ەلىمىزدى جاڭعىرتۋعا باعىتتالعان يدەيالارىمىزدى جۇزەگە اسىرۋعا بەرىلگەن مۇمكىندىك دەپ بىلەمىن. بولاشاقتا مەن ەلىمىزدىڭ ەلدى مەكەندەرىن دامىتۋ باعىتىندا جۇمىس ىستەۋدى جوسپارلاپ وتىرمىن. وڭىرلەردىڭ وركەندەۋىنە بارلىق بىلىگىم مەن تاجىريبەمدى, كۇش-جىگەرىمدى سالامىن. قازىرگى ۋربانيزاتسيانىڭ بەلسەندى ءجۇرىپ جاتقان, حالىقتىڭ 60%-ى قالالاردا ءومىر ءسۇرىپ جاتقان شاقتا مەنىڭ اتقارار جۇمىسىم پايدالى بولادى دەپ ويلايمىن.
مەكتەپتە وقىپ جۇرگەندە ەلورداعا قىدىرىپ كەلەتىنمىن. سول كەزدە جاڭا قالا قۇرىلىسىنىڭ قارقىنىنا قايران قالىپ, مەن دە باس قالانىڭ ء«بىر كىرپىشىن» قالاۋدى ارماندادىم. 2006 جىلى مەكتەپتى بىتىرگەننەن كەيىن «بولاشاق» باعدارلاماسىنىڭ ارقاسىندا مۇحيت اسىپ, اقش-تاعى اريزونا ۋنيۆەرسيتەتىندە قالانى جوبالاۋ جانە تۇرعىن ءۇي قۇرىلىسى ماماندىعى بويىنشا ءبىلىم الدىم. 2010 جىلى ەلگە ورالىپ, ەڭبەك جولىمدى «استانا باس جوسپارى» ينستيتۋتىنان باستادىم. وسى تۇستا بالا ارمانىما جول اشىلدى. كوپتەگەن ايتۋلى جوباعا قاتىسىپ, سونىڭ ىشىندە سالتانات قاقپاسى, يندۋستريالدى ايماق, بوتانيكالىق باق سياقتى نىسانداردىڭ قۇرىلىسىنا اتسالىستىم.
2013 جىلى نازارباەۆ ۋنيۆەرسيتەتى قۇرىلىسىنىڭ ەكىنشى كەزەڭىندە جۇمىس ىستەدىم. ال 2016 جىلى ەلورداداعى كوك تىرەگەن تalan Towers عيماراتىنىڭ قۇرىلىس الاڭىن باسقاردىم. وندا ەڭبەكتى قورعاۋ جانە ءورت قاۋىپسىزدىگىنە جاۋاپتى بولىپ, كلينينگكە, مۇنارالى كراندارعا, نىسانعا كىرىپ-شىعۋ, مەديتسينالىق بەكەتتەرگە جەتەكشىلىك جاسادىم. توتەنشە وقيعالارعا جول بەرمەي, جوبانى ءساتتى اياقتاپ شىقتىم. 2017 جىلى نىسان پايدالانۋعا بەرىلگەننەن كەيىن 20-قاباتتا ورنالاسقان «كاسكاد» بيزنەس ورتالىعىنا باسشىلىق ەتتىم. مەن ۇيىمداستىرعان ورتالىقتاعى ورىنداردى جالعا بەرۋ كورسەتكىشى ەكى جىلدا 20%-عا كوتەرىلدى.
قالالاردىڭ ءوسۋ ءۇردىسى – قارقىندى. مۇنىمەن قوسا تۋىندايتىن ىقتيمال ماسەلەلەر دە كوبەيەدى. بۇل – قالالاردا ءتيىستى جايلىلىعىنىڭ بولماۋى, جول جانە الەۋمەتتىك ينفراقۇرىلىمدارعا تۇسەتىن سالماقتىڭ شامادان تىس ارتۋى سياقتى ماسەلەلەر.
ءبىزدىڭ ەلىمىزدە ءىرى قالالار دا بەلسەندى دامىپ جاتىر. نۇر-سۇلتان, جاڭا وبلىس ورتالىعى تۇركىستان, الماتى – G4 city جوباسى, شىمكەنت جانە اقتاۋ قالالارى وركەندەۋدە. جاڭا قۇرىلىس قالانىڭ باس جوسپارى نەگىزىندە جۇرگىزىلەدى. وندا جولداردىڭ رەتى, اۋماقتاردىڭ ءبولىنۋى, قۇرىلىس نىساندارىنىڭ بيىكتىگى – ءبارى ەگجەي-تەگجەيلى جوسپارلانادى. الايدا, بۇل تاسىلدە سالىنىپ قويعان اۋدانداردىڭ تىعىزدىعى ەسكەرىلمەيدى. سوندىقتان قۇرىلىس جوبالارىن ماقۇلداۋ راسىمدەرىنە تۇرعىنداردى دا تارتۋ كەرەك. بۇل ءارى «حالىق ۇنىنە قۇلاق اساتىن مەملەكەت» تۇجىرىمداماسىمەن دە ۇيلەسەدى.
ماسەلەلەردىڭ ماڭىزدىسى – قالانىڭ تۇرعىندارعا بارىنشا قولايلى بولۋىن تولىق قاراستىرۋ. كەلبەتى كوز تارتاتىن عاجاپ عيماراتتار مەن اۋداندار قالانى اسپەتتەۋى مۇمكىن. بىراق كەيدە ادەمى ورامداردىڭ ءىشى ىعى-جىعى بوپ جاتادى, اۋلالار كولىكتەردىڭ رەتسىز تۇراعىنا اينالادى.
مەن قازاقستاننىڭ قالالارىنىڭ الەمدىك ارەنادا ۇلگىلى بولاتىنداي الەۋەتى بارىنا سەنىمدىمىن. بۇل ءۇشىن تىڭ كوزقاراس, جاڭا تاسىلدەر كەرەك. ءاربىر تۇرعىن ءوزى تۇراتىن مەكەننىڭ ماسەلەلەرىنە بەيجاي قاراماۋى قاجەت. تۇرعىنداردىڭ تالاپ-تىلەگى ەسكەرىلەتىن بولسا, ولار وسىنداي ءىرى جوبالاۋعا, بيۋدجەتتەردى جوسپارلاۋعا بەلسەنە قاتىسا باستايدى.
ۇلىبەك قيمانوۆ,
Talan Towers Lynks Property Management باسقارۋ كومپانياسىنىڭ قىزمەتكەرى
