تاياۋدا اتىراۋ وبلىسىنداعى №157/1 تەرگەۋ اباقتىسىندا وتىرعانداردىڭ تۋىسقاندارى مەن قورعاۋشىلارى شۋ شىعاردى. تۇرمە ىشىندەگى كەزەكتى تەكسەرۋ شاراسىنا كەلىسپەگەن تۇتقىندار وزدەرىنە قول جۇمساۋعا دەيىن باردى. وسىعان وراي تۇسىنىك بەرگەن وبلىستىق ىشكى ىستەر دەپارتامەنتى ءباسپاسوز قىزمەتىنىڭ جەتەكشىسى گۇلنازيرا مۇحتاروۆانىڭ حابارلاۋىنشا, تەرگەۋ اباقتىسىندا وتىرعاندار اراسىنان 1 ايىپتالۋشى ءوز ءىشىن ءوزى جارعان, ال 7 تۇتقىن قولدارىنىڭ تامىرىن كەسىپتى. جاراقات العانداردىڭ بارلىعىنا شۇعىل مەديتسينالىق جاردەم كورسەتىلگەن. گ.مۇحتاروۆانىڭ ءمالىم ەتۋىنشە, سونىڭ الدىندا تەرگەۋ اباقتىسىندا كەزەكتى تەكسەرۋ جۇرگىزىلگەن. تەكسەرۋ بارىسىندا تۇرمە ەرەجەسىنە سايكەس كەلمەيتىن كوپتەگەن زاتتار تابىلىپ, تاركىلەنگەن.
– كەزەكتى تەكسەرۋ كەزىندە تۇتقىنداردان ۇشتالعان, كەسەتىن ءتۇرلى زاتتار, ۇيالى تەلەفوندار, ءتىپتى, 2,5 ليترلىك ىدىسقا قولدان اشىتىلعان سپيرتتى ىشىمدىك, ياعني «براگا» تابىلدى. ەرەجەگە سايكەس كەلمەيتىن زاتتاردىڭ ءبارى تاركىلەندى. ال تۇتقىندارعا ءزابىر كورسەتتى, ۇرىپ-سوقتى دەگەن دەرەك جالعان, – دەدى گۇلنازيرا مۇحتاروۆا.
جولداسبەك شوپەعۇل,
«ەگەمەن قازاقستان».
اتىراۋ وبلىسى.
