اقتوبە قالاسىندا جول پوليتسەيلەرى 20 جاسار قىزدى توناپ, زورلاپ كەتكەن ەكى كۇدىكتىنى وقيعا بولعان بويدا تاپ باستىرماي ۇستادى. بۇل تۋرالى «اكتوبە-تايمس» گازەتى حابارلادى.
وقيعا قالانىڭ ەسكى بولىگىندە, تاڭ الدىندا, ساعات 4-ءتىڭ شاماسىندا ورىن العان. وسى ۋاقىتتا قورلىققا ۇشىراعان بويجەتكەن 102-گە قوڭىراۋ شالعان. ول ءوزىن بۇدان 5 مينۋت بۇرىن بەلگىسىز ەكى جىگىتتىڭ ايتەكە بي كوشەسى, 46-ءۇيدىڭ اۋلاسىندا توناپ, زورلاپ كەتكەنىن مالىمدەيدى. قىز ولاردىڭ ءتۇر-تۇستەرىن ايتىپ بەردى. زورلىقشىلار ءجابىر كورۋشىنىڭ 5 مىڭ تەڭگەسى مەن قۇجاتتارىن الىپ كەتىپتى.
قىز سۋرەتتەگەن كەسكىندەر بويىنشا ءىز كەسۋگە شىققان پوليتسەيلەر كوپ ۇزاماي كۇدىكتىلەردى قولعا ءتۇسىردى. ەكەۋى دە باتىس قازاقستان وبلىسىنان كەلگەندەر ەكەن. زورلىقشىلاردىڭ ءبىرىنىڭ جاسى – 22-دە, ەكىنشىسى 30-دا بولىپ شىقتى.
مۇرات ايتقوجا.
