باسقوسۋ بارىسىندا قوس تاراپ كينەماتوگرافيا سالاسىنداعى ءوزارا ىنتىماقتاستىق جايىن تالقىلادى. سونىمەن قاتار قىتايدان كەلگەن دەلەگاتتار 2020-2021 جىلدارعا ارنالعان كينو سالاسىنداعى جوبامەن تانىستىردى. وندا تانىمال اكتەر دجەكي چاننىڭ قاتىسۋىمەن جۇزەگە اسىرىلاتىن جوبا اياسىندا ەكى مەملەكەت اراسىنداعى مادەني بايلانىستاردى دا كورسەتۋ جوسپارلانعان. سونىمەن قوسا قىتايلىق كينەماتوگرافتار قازاق كينورەجيسسەرلارىمەن جۇمىس ىستەۋگە دايىن ەكەندىكتەرىن جەتكىزدى.
ايتا كەتەيىك, 2020 جىلى شاكەن ايمانوۆ اتىنداعى «قازاقفيلم» كينوستۋدياسى بەيجىڭ مەن شانحايداعى فەستيۆالگە ءوز تۋىندىلارىن ۇسىنعان. قازىر قازىلار القاسىنىڭ شەشىمىن كۇتىپ وتىر. سونىمەن قاتار ماكاو مەن حاينانداعى جانە فۋتسزيانداعى «جىبەك جولى» اتتى حالىقارالىق بايقاۋلارعا قاتىسۋ جوسپاردا بار.
قازاقستان مەن قىتاي حالىق رەسپۋبليكاسى 2017 جىلى 18 قىركۇيەكتە قابىلدانعان بىرلەسكەن كينووندىرىس بويىنشا مەملەكەتارالىق كەلىسىمگە ساي جۇمىس ىستەپ كەلەدى. ماسەلەن, وسى باعدارلاما اياسىندا «قازاقفيلم» جانە Shinework Pictures كومپانياسى بىرلەسىپ, «كومپوزيتور» ءفيلمىن ءتۇسىردى.
رەجيسسسەر ءسابيت قۇرمانباەۆ (قازاقستان) پەن شەرزات ياكۋبتىڭ (قىتاي) تۋىندىسى وتكەن جىلى 13-20 ساۋىردە قىتاي استاناسىندا وتكەن حالىقارالىق ءىX بەيجىڭ كينوفەستيۆالىندە كورەرمەنگە جول تارتقان بولاتىن. ال قازاقستانداعى پرەمەراسى 2019 جىلدىڭ 17 مامىرىندا نۇر-سۇلتان قالاسىندا ءوتتى.
2019 جىلى 23 ماۋسىمدا وتكەن XXII حالىقارالىق شانحاي كينوفەستيۆالىندە 8 جاستاعى قازاق اكتريساسى ءدىلناز نۇرسەيىت CCTV-6 تەلەارناسى ۇسىنعان «ۇزدىك جاڭا اكتەر» نوميناتسياسىنا يە بولدى. سونداي-اق قويۋشى-رەجيسسەر ەرمەك تۇرسىنوۆتىڭ «شىراقشى» ءفيلمىنىڭ تۇساۋكەسەرى ءوتىپ, «كومپوزيتور» ءفيلمىنىڭ پروديۋسسەرلىك توبى دا ماراپاتتالدى.
ال قويۋشى-رەجيسسەر ەمير بايعازيننىڭ «وزەن» ءفيلمى 18 ناۋرىز بەن 1 ءساۋىر ارالىعىندا وتكەن حالىقارالىق گونكونگ فەستيۆالىنە, رەجيسسەر جانىبەك جەتىرۋوۆتىڭ «شىڭىراۋ» ءفيلمى 19 قاراشادا وتكەن XXVII Golden Rooster and Hundred Flowers بايقاۋىنا, فارحات ءشارىپوۆتىڭ «ترەنينگ ليچنوستنوگو روستا» تۋىندىسى 1-8 جەلتوقساندا وتكەن Hainan Island International Film Festival-گە قاتىستى.
ال 7-19 مامىر ارالىعىندا قازاق كينەماتوگرافيستەرى شىۇ-عا كىرەتىن ەلدەرگە ارنالعان سەمينارعا قاتىستى. بەيجىڭ, شانحاي مەن تسينداودا وتكەن جيىندا ماماندار كينەماتوگرافيا سالاسىنداعى سوڭعى جاڭالىقتارمەن تانىسىپ, پىكىر الماستى.
