كولۋمبيا قۇتقارۋشىلارى سۋ تاسقىنى كەزىندە كۇشتى اعىسپەن الىپ كەتكەن ءۇش جاسار بالانى كارىز جۇيەسى قۇدىعىنان تاپتى. بۇل تۋرالى «Lifenews.ru» حابارلاپ وتىر.
وقيعا كولۋمبيانىڭ باررانكيليا قالاسىندا ورىن الدى. قۇتقارۋشىلار بالانى كارىز جۇيەسى قۇبىرلارىنان ءبىر تاۋلىك بويى ىزدەگەن.
قۇتقارۋ جاساقتارىنىڭ دەرەگى بويىنشا, سۋ بالاقايدى كارىز جۇيەسى قۇبىرلارىنىڭ بويىمەن ءبىر جارىم شاقىرىم جەرگە اعىزىپ اكەتكەن. ءبىر تاۋلىك ءوتىپ, بالا تابىلعان كەزدە ول بار كۇشىمەن دۋالعا جارماسىپ تۇرعان ەكەن. «كىشكەنتاي بالانىڭ باتىلدىعىنا بارلىعىمىز تاڭ قالدىق, – دەيدى قۇتقارۋشىلار. – ونى شىعارعان بويدا دارىگەرلەردىڭ قولىنا تاپسىردىق».
باسىنان وتكەن قيىن وقيعاعا قاراماستان, ءسابي قازىر ءوزىن جاقسى سەزىنۋدە. دارىگەرلەر ونىڭ ومىرىنە قاۋىپ ءتونىپ تۇرعان جوق ەكەنىن ەسكەرىپ, بالا جاقىن ارادا تۋىستارىنىڭ قولىنا تاپسىرىلاتىنىن مالىمدەدى.
ايدار ورىسباەۆ.
