ششۋچينسك قالاسىنداعى №2 ورتا مەكتەپتە بولعان دەپۋتات مەكتەپ ۇجىمىمەن جانە ديرەكتورلارىمەن كەزدەسىپ, «پەداگوگ مارتەبەسى تۋرالى» زاڭ بەكىتىلگەننەن كەيىن قانداي وزگەرىستەر كۇتەتىنى تۋرالى اڭگىمەلەستى, ونىڭ ەڭبەكاقىنى كوتەرۋ, قوسىمشا اقى كەشەنىن ەنگىزۋ, مۇعالىمدەردى قاعازباستىلىقتان ارىلتۋ, مەكتەپ وقۋشىلارىنىڭ قاۋىپسىزدىگىن قامتاماسىز ەتۋ تۋرالى تارماقتارىن اتاپ ءوتتى.
ۇستازداردىڭ ۇسىنىستارى مەن وتىنىشتەرىن تىڭدادى. مەكتەپ ديرەكتورى يننا مەلنيك مەكتەپتىڭ حال-جاعدايىمەن تانىستىرىپ, وزەكتى ماسەلەلەرى تۋرالى ايتىپ ءوتتى.
–قازىرگى كەزدە مەكتەپتەردە ماگيستراتۋرادا وقىپ كەلگەن ماماندار سانىن كوبەيتۋ قولعا الىنىپ جاتىر, دەگەنمەن, ءبىلىم وردالارىندا عىلىممەن اينالىسۋعا جابدىقتالعان كابينەتتەر از. وسى جاعى قاراستىرىلسا ەكەن. سونىمەن قاتار مۇعالىم ماماندىعىن تاڭداعان جوعارى سىنىپ وقۋشىلارى ءۇشىن مۇعالىمدەر ءۇيى اشىلسا ەكەن, دەيدى №9 مەكتەپ-گيمنازياسىنىڭ ديرەكتورى بيبىگۇل كۇشەكوۆا.
ششۋچينسك قالاسىنداعى №1 مەكتەپ-گيمنازياسىنىڭ ديرەكتورى ليۋبوۆ تكاچكوۆا مۇعالىمدەردىڭ قاعازباستىلىقتان ءالى دە بولسا ارىلا الماي جۇرگەنىن ايتىپ, ماسەلە قوزعادى. سونىمەن بىرگە كەزدەسۋدە مەكتەپتەردە كۇندەلىكتى ون بالدىق باعالاۋ جۇيەسىن ەنگىزۋ قاجەتتىگى, زاڭناماداعى وزگەرىستەردىڭ جەكەمەنشىك بالا باقشالارعا اسەرى قانداي بولاتىندىعى تۋرالى تالقىلاندى. ءبىر اۋىسىمدا وقىتاتىن مەكتەپتەردىڭ وقۋشىلارىندا تۇستەن كەيىن عىلىمي جۇمىسپەن اينالىسۋعا, ءتۇرلى ۇيىرمەلەرگە بارۋعا ۇلكەن مۇمكىندىك تۋعاندىعى دا اتالىپ ءوتىلدى.
ءوز كەزەگىندە باقىتجان جۇماعۇلوۆ بۇل ماسەلەلەردىڭ قارالىپ جاتقانىن, ءبىلىم سالاسى ارقاشان باستى نازاردا بولاتىنىن ايتا كەلە, بارلىعىن زاڭمەن شەشۋ مۇمكىن ەمەستىگىن دە ءتۇسىندىردى.
–مۇعالىمدەردىڭ مارتەبەسىن كوتەرۋ ءۇشىن ولاردىڭ وزدەرى قوعاممەن جۇمىس جاساپ, وزدەرىن جاقسى ۇستاۋى كەرەك. پەداگوگيكالىق جوعارى وقۋ ورىندارىنىڭ مارتەبەسىن كوتەرۋىمىز قاجەت. مەنىڭ ويىمشا ۇستازدار تۋرالى جاقسى فيلمدەر تۇسىرىلسە, مۇعالىم ەڭبەگى ناسيحاتتالىپ جاتسا, بۇل دا ءبىرشاما وڭ اسەر ەتەدى, دەدى ول.
سونىمەن قاتار باقىتجان جۇماعۇلوۆ ششۋچينسكىدەگى جوعارى تەحنيكالىق جانە جوعارى پەداگوگيكالىق كوللەدجدەرىنە بارىپ وقۋ ورىندارىنىڭ تەحنيكالىق جابدىقتالۋىمەن, جالپى ءبىلىم دەڭگەيىمەن تانىستى.
