وسى جولى ارنايى ات باسىن بۇرۋىمىزعا اۋدان اكىمى نۇرلان سەيىلوۆتىڭ مۋسيندەردىڭ وتباسى جايلى ريزا كوڭىل اڭگىمەسى سەبەپكەر بولىپ ەدى. وسىنداعى جەتى اعايىندى جىگىت استىق كەپتىرگىش كەشەنىن شىعارادى. جاي عانا شىعارىپ قويمايدى, تولىق تسيكلدە, ياعني ەلىمىزدىڭ كەز كەلگەن ايماعىنان تاپسىرىس بەرۋشىلەرگە ءوز قولدارىمەن دايىنداعان كۇردەلى جابدىقتاردى وزدەرى بارىپ, ورناتىپ بەرەدى جانە شەبەرلىك سىنىبىن وتكىزەدى. بۇعان ارينە, سەلت ەتپەيتىن كىسى بولماس.
بىراق جۋرناليستەر قاۋىمى «AZAM-كC» سەرىكتەستىگىنىڭ تىنىس-تىرشىلىگىنەن مۇلدەم حابارسىز دەۋگە كەلە قويماس. جالتىرداعى جاقسى ىستەر جايىندا بۇرىن دا ەستىگەنبىز. ۇمتىلىسى ەرەكشە ۇجىمدى ايازبەك ءمۋسيننىڭ قۇرعاندىعى, 2016 جىلى وڭىرلىك سىندا 1 ورىندى جەڭىپ العاندىعى, «التىن ساپا», «قازاقستاننىڭ ۇزدىك تاۋارى» بايقاۋلارىنا قاتىسقاندىعى, 2018 جىلى رەسپۋبليكالىق بايقاۋدا جۇلدەلى ۇشتىكتىڭ قاتارىنا قوسىلعاندىعى, ال 2019 جىلى «قازاقستاننىڭ ۇزدىك تاۋارى» وبلىستىق بايقاۋىندا جەڭىمپاز اتانعانى تۋرالى قۇلاعدارمىز. ايتكەنمەن, اۋىل جاستارىمەن جاقىن كەزدەسىپ, اشىق اڭگىمەلەسۋدىڭ ءساتى تۇسپەپ ەدى. بۇگىندە قاراعاندى ۋنيۆەرسيتەتىنىڭ تۇلەگى ايازبەك سەيىلبەك ۇلى ءىرى كومپانيا مارتەبەسىنە كوتەرىلگەن ۇجىم باسشىسى بولسا, ءىنىسى زامانبەك جالتىرداعى كاسىپورىننىڭ ديرەكتورى ەكەن.
ايازبەك ءىنىسىن ەرتەرەك شىڭداعانى بايقالادى. زامانبەكتى قارا جۇمىستىڭ بارلىعىنا دا سالىپ, ۋنيۆەرسيتەتتە ۇزدىكتەر قاتارىندا بولۋىن قاتاڭ قاداعالاعانداي. اسىرەسە توڭكەرىس استىق قابىلداۋ كاسىپورنىندا اتقارۋشى ديرەكتور قىزمەتىن اتقارعاندىعى تاجىريبە قالىپتاستىرۋ عانا ەمەس, جاڭا ىزدەنىستەرگە باستاعانى دەپ ۇقتىق. زامانبەكتىڭ سوزدەرىندە تەحنيكالىق تەرميندەر كوبەيە باستاعان شاقتا, ازداپ ك ۇلىمسىرەپ, ءبىزدى الىپ انگارداعى ءوندىرىس قۇشاعىنا باستادى.
مۇنداي كاسىپورىندا تارسىل-گۇرسىلسىز بولا ما؟ ايتكەنمەن, كەيبىر زاۋىتتارداعىداي نايزاعاي جارقىلداپ, جەر سىلكىندىرگەندەي قۇلاق تۇندىرار قاتەرلى جاعداي جوق مۇندا. بارلىق جۇمىس كوپ دەڭگەيلى جۇيەمەن اۆتوماتتاندىرىلعان. جۇمىس بارىسى الەمدىك دەڭگەيدەگى «OVEN» كومپانياسىنىڭ ەلەكترونيكالىق جابدىقتارىمەن باسقارىلادى. «3D» دەڭگەيىندەگى 18 ءتۇرلى لازەرلىك ستانوكتار كونسترۋكتور ارتەم لەونوۆتىڭ سىزبالارىنا سايكەس ءپىشىلىپ, كەسىلىپ, ءاپ-ساتتە قۇراستىرۋ جابدىقتارىنا اينالىپ جاتىر. بۇل اقىلدى ستانوكتاردى قىتاي مەن رەسەيدىڭ ءوندىرۋشى ۇيىمدارىنىڭ وكىلدەرى ورناتىپ, جەرگىلىكتى وپەراتورلاردى ماشىقتاندىرىپ كەتىپتى. ال شيكىزات ءوز ەلىمىزدەن.
جالتىرداعى زاۋىت ارىپتەستەرىنە ءداندى, مايلى جانە بۇرشاق داقىلدارىن وڭدەيتىن «كس» ماركالى زاماناۋي استىق كەپتىرگىشتەرىنىڭ ءۇش ءتۇرىن ۇسىنادى. مۇنداي كەشەندەر باستاپقى ىلعالدىلىعى 35 پايىزدىق ءونىمدى ساعاتىنا 25, 30 جانە 50 تونناعا دەيىن كەپتىرەدى جانە تۇپكى ناتيجە 8 پايىزعا تومەندەيدى ەكەن. ياعني, قابىلدانعان داقىل 1-2 كلاستىق بازالىق كونديتسياعا جەتكىزىلەدى. جالپى, «Optim-مus» كەشەنىنىڭ تولىق قامتىلعان قۇرامى «باستاۋ+» قاۋىز تازالاعىشتارىنان, «كاليبر» جانە اەروديناميكالىق «كولوس» سۇرىپتاۋ ماشينالارىنان, كەڭ الىمدى «سامۇرىق» ەلەۋىشتەرىنەن, قۋاتتى جەلدەتكىشتەردەن, مەتالل ءشومىشتى ترانسپورتەرلەردەن, جىلۋ وتكىزگىشتەرىنەن, ورتكە قارسى جابدىقتاردان, تاعى باسقا تەحنولوگيالىق كومەكشى قۇرالداردان تۇرادى. استىق كەپتىرگىش كەشەنىندە تابيعي جانە سۇيىق گاز, ديزەل وتىنى پايدالانىلادى. وسى جەردە ەكولوگيالىق تالاپتار تولىق قامتاماسىز ەتىلەتىن كەشەندەگى جىلۋ گەنەراتورلارى قازاقستان مەن رەسەي ماماندارى تاراپىنان جوعارى باعالانىپ, وسى ەلدەردىڭ 5 پاتەنتىنە يە بولعانىن اتاپ وتكىمىز كەلەدى.
ال ساپا جاعىنا كەلسەك, «AZAM-كC» جشس بۇكىل جۇمىس اۋقىمىنا تۇراقتى مونيتورينگ جاساۋدى ءبىرىنشى كەزەكتە ۇستايدى. مۇندا «ست رك يسو 9001-2009» ارنايى سەرتيفيكاتتالعان ساپا مەنەدجمەنتى جۇيەسى ەنگىزىلگەن. ۇجىم «قازاقستان ماشينا جاساۋشىلار وداعى» بىرلەستىگىنىڭ مۇشەسى, ونىمدەرى «اگروتەحنيكا» اگروونەركاسىپتىك كەشەنى مەملەكەتتىك باعدارلاماسىنىڭ نەسيە رەەسترىنە جانە دايىندالعان جابدىقتارىن 25 پايىزدىق مولشەردە سۋبسيديالاۋدىڭ مەملەكەتتىك ينۆەستيتسيالىق باعدارلاماسىنە ەنگىزىلگەن. بارلىق ءونىم سەرتيفيكاتتالىپ, ارنايى پاتەنتتەلگەن. وسىنىڭ ءوزى كەڭ اۋقىمدى وندىرىستەگى ءبىرشاما جاعدايدى اڭعارتسا كەرەك.
قازىرگى كۇننىڭ تالابىمەن قاراساق, كەز كەلگەن كاسىپورىننىڭ باسەكەگە قابىلەتتى بولۋى – بيزنەستەگى باستى شارت. جالتىرلىق جىگىتتەردىڭ ءونىمدى شىعارىپ قانا قويماي, ونىڭ وندىرىستە قالتقىسىز جۇمىس ىستەۋىن قامتاماسىز ەتەتىندىگى ءتانتى ەتەدى. مۇندا مىناداي جۇيە قالىپتاسقان: «جەتكىزۋ – ىرگەتاسىن قالاۋ – قۇراستىرۋ – ەلەكتر جۇيەلەرىن ورناتۋ – ىسكە قوسۋ – وقىتۋ – ءبىر جىلدىق كەپىلدى قىزمەت – ودان كەيىنگى سەرۆيستىك قىزمەت». بۇل وڭاي شارۋا ەمەس. دەگەنمەن, «AZAM-كC» وسىناۋ باستى ۇستانىمىن ۇنەمى بيىك ۇستايتىنى عانيبەت. بۇل جۇمىسقا ءجۇز بىردەي كىسى جۇمىلعان. ۆاحتالىق ادىسپەن قىزمەت كورسەتەتىن جەدەل توپتار ارنايى تەحنيكالارمەن قامتاماسىز ەتىلگەن. قويمادا قاجەتتى قوسالقى بولشەكتەردىڭ 3000 ءتۇرى تۇراقتى قورلانعان جانە بۇل بولشەكتەر مەن ءتيىستى ماماندار وزدەرى ورناتقان نىساندارعا ءبىر تاۋلىكتىڭ ىشىندە جەتىپ بارادى.
ءبىز زاۋىت ديرەكتورى زامانبەك مۋسينگە ءبىر سۇراق قويدىق: «وسىنىڭ ءبارى قالاي باستالىپ ەدى؟».
– ءبىز كوپ بالالى وتباسىنانبىز. اۋەلى مەكتەپتەگى باۋىرلارىممەن بىرگە قارا مەتالل سىنىقتارىن جيناپ, وتكىزۋمەن اينالىستىق. ءبارىمىزدىڭ بىردەي جوعارى ءبىلىم الۋعا مۇمكىندىگىمىز بولمادى. بىراق ىنىلەرىمنىڭ بارلىعىندا ورتا كاسىپتىك ءبىلىم بار. ۋنيۆەرسيتەت بىتىرگەن مەن زاڭگەرمىن. ايازبەك اعامنىڭ قامشىلاۋىمەن العا ۇمتىلۋعا تىرىستىق. جيعان-تەرگەنىمىزدى وندىرىسكە سالدىق. باستاپقىدا استراحانداعى بوس تۇرعان عيماراتتى جالعا العانبىز. توڭكەرىستە جۇرگەندەگى كورگەن-تۇيگەن ويلارىمدى باۋىرلارىم قولدادى. جالتىردا 2017 جىلى جەكە انگار تۇرعىزىپ, العاشقى استىق كەپتىرگىش قوندىرعىسىن سىننان وتكىزدىك. ينتەرنەتتىڭ كومەگىمەن بولاشاققا نەگىزدەلگەن وزىق تەحنولوگيالاردى زەرتتەدىك, بيزنەس-جوسپارلارىمىز ماقۇلدانىپ, پاتەنتتەرگە يە بولدىق. العاشقى قوندىرعىمىز 2018 جىلى بۇلاندى اۋدانىنداعى «نوۆوبراتسكوە» جشس-دە ويداعىداي ناتيجە بەردى. ەڭ باستىسى, باۋىرلارىم ايازبەك, ارىستانبەك, انۋاربەك, مۇراتبەك, رۇستەمبەك, ايبەكتەردىڭ ماعان سەنگەنىنە, باستامالارىمدى ءىلىپ الىپ كەتكەنىنە, قيىندىقتارعا توزگەنىنە, تاباندىلىعىنا ريزامىن.
– سوڭعى ەكى جىلدا اقمولا, اقتوبە, شىعىس قازاقستان, قوستاناي, سولتۇستىك قازاقستان, پاۆلودار, جامبىل وبلىستارىندا ءبىزدىڭ 50 استىق كەپتىرۋ كەشەنىمىز جۇمىس ىستەپ تۇر. بيىلعا دا تاپسىرىستارىمىز بار. ءبىز ارىپتەستىك بايلانىستاردى قۇرمەتتەيمىز جانە سەنىمنەن شىعۋدى ومىرلىك ۇستانىمىمىز سانايمىز, – دەيدى زامانبەك باۋىرىمىز.
جالتىرداعى جاقسى ىستەر جالپاق جۇرتقا ونەگە.
اقمولا وبلىسى,
استراحان اۋدانى
