ءۇيد مەملەكەتتىك باعدارلاماسىن ىسكە اسىرۋ بويىنشا وبلىستىق ۇيلەستىرۋ كەڭەسىنىڭ كەزەكتى وتىرىسىندا «گراند قۇرىلىس» كومپانياسىنىڭ بالقاش كولىنىڭ جاعالاۋىندا دەمالۋ-ساۋىعۋ ورتالىعىن سالۋ جونىندەگى جوباسى قارالدى. ول پريوزەرسك قالاسى اۋماعىندا ءتۋريزمدى دامىتۋعا ارنالعان. كولدىڭ وسى شاعىن شاھارعا شەكتەس تابيعاتى كورىكتى تۇسىندا ارقايسىسى «ليۋكس» كلاستى 2 نومىردەن تۇراتىن 4 كوتتەدج, ەكونوم-كلاستى 20 بولمە, كافە-مەيرامحانا, جەڭىل سەرۋەندىك قايىقتار بەكەتى, اۆتوتۇراق, اكۆوپارك, ەرەسەكتەر مەن بالالار ءۇشىن باسسەين سالىنادى.
...دەمالىس ورتالىعى سالىنادى
ءۇيد مەملەكەتتىك باعدارلاماسىن ىسكە اسىرۋ بويىنشا وبلىستىق ۇيلەستىرۋ كەڭەسىنىڭ كەزەكتى وتىرىسىندا «گراند قۇرىلىس» كومپانياسىنىڭ بالقاش كولىنىڭ جاعالاۋىندا دەمالۋ-ساۋىعۋ ورتالىعىن سالۋ جونىندەگى جوباسى قارالدى. ول پريوزەرسك قالاسى اۋماعىندا ءتۋريزمدى دامىتۋعا ارنالعان. كولدىڭ وسى شاعىن شاھارعا شەكتەس تابيعاتى كورىكتى تۇسىندا ارقايسىسى «ليۋكس» كلاستى 2 نومىردەن تۇراتىن 4 كوتتەدج, ەكونوم-كلاستى 20 بولمە, كافە-مەيرامحانا, جەڭىل سەرۋەندىك قايىقتار بەكەتى, اۆتوتۇراق, اكۆوپارك, ەرەسەكتەر مەن بالالار ءۇشىن باسسەين سالىنادى. سونداي-اق, بالىق اۋلاۋعا قۇمارلارعا قاجەتتى جاعداي جاسالادى. دەمالىس ايماعىنىڭ اينالاسى جاسىل جەلەككە بولەنىپ, ايدىن جيەگىنىڭ قۇمى ءاردايىم تازا بولادى.
كومپانيا بۇل قۇرىلىستى حالىقارالىق تالاپ-تالعامدارعا ساي سالىپ, تۋريزم بەينەسىندە باسەكەلەسە الاتىن دەمالىس ورنىنا اينالدىرۋدى كوزدەيدى.
ايقىن نەسىپباي,
«ەگەمەن قازاقستان».
قاراعاندى وبلىسى.
...جۇمىس ورنىنا 800 ادام ورنالاستى
قالالىق مادەنيەت ۇيىندە ۇيىمداستىرىلعان كەزەكتى ەڭبەك جارمەڭكەسىنە كەلۋشىلەر قاتارى ادەتتەگىدەي مول بولدى. وعان قاتىسقان 20 كاسىپورىن 50-گە جۋىق ماماندىق تۇرلەرىنە تاپسىرىس بەردى. پەتروپاۆل قالالىق ەڭبەكپەن قامتۋ جانە الەۋمەتتىك باعدارلامالار ءبولىمىنىڭ باس مامانى كريستينا كوزاكتىڭ ايتۋىنشا, ءتۇرلى سالالار بويىنشا 816 جۇمىس ورنىنا قاجەتتىلىك بايقالعان. اسكەري كيىمدەر تىگۋمەن شۇعىلداناتىن تىگىن فابريكاسىنىڭ فيليالى تىگۋشىلەر مەن پىشۋشىلەرگە ءزارۋ كورىنەدى.
قورعانىس ىستەرى جونىندەگى دەپارتامەنت وكىلدەرى كەلىسىم-شارت ارقىلى قىزمەت ەتكىسى كەلەتىن اسكەري قىزمەتكەرلەرگە سۇرانىس جاساي كەلىپتى. ماماندىعى بويىنشا ەلەكتر جابدىقتاۋشى بولىپ تابىلاتىن مارينا كورنيەنكونىڭ ەڭبەك جارمەڭكەسىنە ءبىرىنشى رەت كەلگەننەن جولى وڭعارىلدى. لايىق قىزمەت تاپتى. ءسويتىپ, جۇمىس ىزدەي كەلگەن 250 ادامنىڭ 90-ى اڭگىمەلەسۋگە شاقىرىلدى, 7-ەۋى قوعامدىق جۇمىستارعا تارتىلدى, 11-ءى كاسىبي شەبەرلىكتەرىن ارتتىرۋعا, 35-ءى جاستار تاجىريبەسىنە جىبەرىلدى. ال جىل باسىنان بەرى 800 ادام جۇمىسپەن قامتىلدى.
ءومىر ەسقالي,
«ەگەمەن قازاقستان».
پەتروپاۆل.
