ونىڭ ايتۋىنشا, قارجى مينيسترلىگى زاڭناماعا تۇزەتۋلەر ەنگىزىپ, ءتيىستى ىشكى نورماتيۆتىك قۇقىقتىق اكتىلەر ازىرلەدى, سونىڭ نەگىزىندە بيىل شاعىن جانە ورتا بيزنەس سۋبەكتىلەرى ءۇشىن, سونداي-اق جەكە تۇلعالار ءۇشىن سالىقتىق راقىمشىلىق جاسالدى.
ب.شولپانقۇلوۆ ەسكە سالىپ وتكەندەي, 2018 جىلدىڭ 1 قازانىنداعى جاعداي بويىنشا بەرەشەگى بار سالىق تولەۋشىلەر راقىمشىلىق ناۋقانىنا ىلىگىپ, وتەۋ كەزىندە ەسەپتەلگەن ءوسىمپۇلدار مەن ايىپپۇلدار ەسەپتەن شىعارىلادى.
سالىقتىق راقىمشىلىق قورىتىندىسى بويىنشا, جالپى رەسپۋبليكا دەڭگەيىندە 8,3 ملرد تەڭگە سوماسىنا بەرەشەگى بار 41 183 سالىق تولەۋشىنىڭ قارىزى وتەلدى. بۇل رەتتە ەسەپتەن شىعارىلعان وسىماقىلار مەن ايىپپۇل سوماسى 2,9 ملرد تەڭگەنى قۇرادى, دەپ اتاپ ءوتتى قارجى ءمينيسترىنىڭ ءبىرىنشى ورىنباسارى.
2018 جىلعى 1 قازانداعى جاعداي بويىنشا سالىقتىق تەكسەرۋلەردىڭ ناتيجەلەرى تۋرالى حابارلاماعا شاعىم جاساۋعا بايلانىستى بەرەشەگى انىقتالماعان سالىق تولەۋشىلەر راقىمشىلىققا ىلىكتى.
سونىمەن قاتار بيىل تامىزدان باستاپ سالىق زاڭناماسىن بۇزعان, الايدا ونى ءوز بەتىنشە جويعان جانە 2018 جىلدىڭ 1 قازانىنا دەيىن تولەۋ مەرزىمىمەن وتكەن سالىق كەزەڭدەرى ءۇشىن قوسىمشا سالىق ەسەپتىلىگىن ۇسىنعان سالىق تولەۋشىلەرگە دە راقىمشىلىق جاسالادى.
ناتيجەسىندە 3 214 سالىق تولەۋشى امنيستيانى پايدالاندى, ولار 10,1 ملرد تەڭگە بەرەشەكتى تولەگەن. ولاردىڭ موينىنداعى 3,6 ملرد تەڭگە كولەمىندەگى ايىپپۇلدارى مەن وسىماقىلارى ەسەپتەن شىعارىلدى.
«وسىلايشا, سالىقتىق راقىمشىلىقتى قولدانعان سالىق تولەۋشىلەردىڭ جالپى سانى – 44 397. تولەنگەن بەرەشەك 18,4 ملرد تەڭگەنى, ال ەسەپتەن شىعارىلعان وسىماقىلار مەن ايىپپۇلدار 6,5 ملرد تەڭگەنى قۇرادى» دەپ تۇيىندەدى ب.شولپانقۇلوۆ.
تامىز ايىندا قارجى مينيسترلىگى جەكە تۇلعالار ءۇشىن سالىقتىق راقىمشىلىق جاريالادى, ول ازاماتتارعا وتكەن جىلدارداعى سالىق مىندەتتەمەلەرى بويىنشا نەگىزگى بورىش سوماسىن تولەۋگە مۇمكىندىك بەردى.
ب.شولپانقۇلوۆتىڭ ايتۋىنشا, 2019 جىلعى 1 قاڭتارداعى جاعداي بويىنشا سالىق بەرەشەگى بار جەكە تۇلعالاردىڭ سانى 1,4 ملن ادامدى قۇرادى, ولاردىڭ نەگىزگى قارىز بويىنشا 13,9 ملرد تەڭگە جانە ەسەپتەلگەن وسىماقى 6,3 ملرد تەڭگە بولدى.
جەكە تۇلعالار بورىشتارىنىڭ ەڭ كوپ سوماسى كولىك قۇرالدارىنا سالىناتىن سالىققا قاتىستى بولدى. بۇل 10,1 ملرد تەڭگەنى نەمەسە جالپى سومانىڭ 73%-ىن قۇرايدى.
م ۇلىك سالىعى بويىنشا بورىشتار سوماسى 1,6 ملرد تەڭگەنى نەمەسە 11,5%-دى, جەكە تابىس سالىعى بويىنشا – 1,2 ملرد تەڭگەنى نەمەسە 8,6%-دى جانە جەر سالىعى بويىنشا – 617 ملن تەڭگەنى نەمەسە 4,3%-دى قۇرادى.
ءتۇسىندىرۋ جۇمىستارىنىڭ ناتيجەسى بويىنشا 672 530 جەكە تۇلعا 14,6 ملرد تەڭگە كولەمىندە ءوز قارىزىن تولەدى, ولار ءۇشىن 2,8 ملرد تەڭگە كولەمىندە ءوسىمپۇل ەسەپتەن شىعارىلدى.
