ترەندتەردى جەتە تۇسىنەتىن جاستار ىرىكتەلدى
– مەملەكەت باسشىسى ءوز جولداۋىندا مەملەكەتتىك قىزمەتشىلەر جۇمىسىنىڭ تيىمدىلىگىن ارتتىرۋ ماقساتىندا ارنايى دايىندىعى بار جاس كادرلاردى تارتۋ قاجەت ەكەنىن ايتتى. وسى رەتتە جاڭادان قۇرىلعان پرەزيدەنتتىك جاستار كادر رەزەرۆى مەملەكەتتىك قىزمەت جۇيەسىن جەتىلدىرۋگە قانشالىقتى ىقپال ەتەدى؟
– جاھاندانۋ مەن جاڭا ەكونوميكالىق سىن-قاتەرلەر جاعدايىنداعى قازىرگى تاڭدا ەلىمىزدىڭ باسەكەگە قابىلەتتىلىگىن قامتاماسىز ەتۋدىڭ نەگىزگى فاكتورلارىنىڭ ءبىرى – ءبىلىمدى جانە تالاپتى جاستار. تۇڭعىش پرەزيدەنت – ەلباسى نۇرسۇلتان نازارباەۆتىڭ جارلىعىمەن 2019 جىل «جاستار جىلى» دەپ جاريالاندى. مەملەكەت باسشىسى قاسىم-جومارت توقاەۆتىڭ باستاماسىمەن قولعا الىنعان «پرەزيدەنتتىك جاستار كادر رەزەرۆى» جوباسى ەڭ الدىمەن باسەكەگە قابىلەتتى جانە جاسامپاز جاستاردى قولداۋعا باعىتتالدى. جوبانىڭ ءمانى – قاجەت بولعان جاعدايدا جاۋاپتى لاۋازىمدارعا تاعايىندالىپ, ەلىمىزدىڭ دامۋى جولىندا ءتيىمدى جۇمىس ىستەي الاتىن ءارتۇرلى سالاداعى 300 جوعارى دارەجەلى مامانداردىڭ قۇرامىن جاساقتاۋ. رەزەرۆتى قالىپتاستىرۋ مەملەكەتتىك باسقارۋ سالاسىندا ادام كاپيتالىن ەلدىڭ پايداسىنا جۇمىلدىرۋ ءۇشىن جاسالعان جۇمىس بولدى.
پرەزيدەنت جاھاندانۋ زامانىنا قاراي مەملەكەتتىك باسقارۋ جۇيەسىن جەتىلدىرۋگە باسىمدىق بەرىپ وتىر. ال مەملەكەتتىك قىزمەتكە وزگەرىس اكەلۋ ءۇشىن, بۇل سالانى جاڭعىرتۋ ءۇشىن زاماناۋي ويلاي الاتىن, جوعارى دەڭگەيدەگى قۇزىرەتتىلىكتەرگە يە, جاڭا ترەندتەردى جەتە تۇسىنەتىن جاڭا فورماتسياداعى جاستاردى جۇمىلدىرۋ كەرەك. وسى ۇدەدەن شىعۋ ءۇشىن الدىمىزعا پرەزيدەنتتىك جاستار كادر رەزەرۆىن قۇرۋ مىندەتى قويىلدى.
پرەزيدەنتتىك جاستار كادر رەزەرۆى – وتانسۇيگىش جاستارىمىزعا بەرىلگەن ايرىقشا مۇمكىندىك, ناقتى قولداۋ. بۇل جوبانى ءبىلىمى مەن بىلىگى كەلىسكەن جاس ازاماتتاردىڭ ەڭبەك جولىندا, ىلگەرى جىلجۋىنا جول اشاتىن الەۋمەتتىك ساتى دەپ ايتۋعا دا بولادى. ىرىكتەۋدىڭ بارلىق كەزەڭىنەن وتكەن جاستارعا مەملەكەتتىك باسقارۋ جانە كۆازيمەملەكەتتىك سەكتور جۇيەسىندە باسشىلىق لاۋازىمعا تۇرۋعا تىكەلەي مۇمكىندىك تۋدىرادى دەپ كوزدەلىپ وتىر. ءبىز وسى رەزەرۆكە ىلىنگەن جاستاردى كوش سوڭىندا قالماي, قازاقستاننىڭ دامۋىنداعى قوزعاۋشى كۇش بولادى دەپ ۇمىتتەنەمىز.
ەل ىسىنە ارالاساتىن جاستاردى ىرىكتەۋ جۇمىسى ءتورت ايعا سوزىلدى جانە ءبىز وعان دەيىن بىرنەشە اي بويى مۇقيات دايىندالدىق. وسى باعىتتا حالىقارالىق تاجىريبەنى زەرتتەدىك, تاسىلدەردى ازىرلەپ, تولىق اشىقتىقتى قامتاماسىز ەتۋگە بايلانىستى ماسەلەلەردى شەشتىك. ناتيجەسىندە, ارنايى ونلاين-پلاتفورما دايىندالىپ, سونىڭ ارقاسىندا ءبىز ادام فاكتورى ماسەلەسىن شەشە الدىق. ىرىكتەۋ ءۇردىسىن تسيفرلاندىرۋ بىزگە تولىق كولەمدە ترانسپارەنتتىلىك پەن وبەكتيۆتىلىككە كەپىلدىك بەردى. ءتىپتى قۇزىرەتتىلىكتەردى باعالاۋ وفلاين كەزەڭىندە باعالاۋشىلاردىڭ كىمدى باعالاپ جاتقانىن بىلمەۋ ءۇشىن ۇمىتكەرلەردىڭ جەكە باسىنا قاتىستى دەرەكتەر شيفرلاندى, ساراپشىلىق كوميسسيادا اڭگىمەلەسۋدە ونلاين باعالاۋدى ەنگىزدىك.
رەزەرۆشىلەر تىزىمىنە جەكە سەكتوردىڭ 106 وكىلى, كۆازيمەملەكەتتىك سەكتوردىڭ 98 قىزمەتكەرى جانە 96 مەملەكەتتىك قىزمەتشى كىردى. بۇل كونكۋرسقا ەلىمىزدىڭ بارلىق وڭىرلەرىنىڭ ازاماتتارى بەلسەندى قاتىستى. ەڭ كوپ كانديداتتار الماتى قالاسى, قاراعاندى, شىعىس قازاقستان وبلىستارىنان جانە نۇر-سۇلتان قالاسىنان بولدى. سونداي-اق ازەربايجان, ۇلىبريتانيا, گەرمانيا, رەسەي, تۇركيا جانە فرانتسيا سياقتى جاقىن جانە الىس شەتەلدەردە جۇرگەن ازاماتتار دا قالىس قالمادى.
ۇلتتىق كوميسسيانىڭ قاراۋىمەن ىرىكتەلگەن ۇمىتكەرلەردىڭ قۇرامىندا ءارتۇرلى ەتنوس وكىلدەرى بار. ولار – قازاقتار, ورىستار, ازەربايجاندار, ارمياندار, نەمىستەر مەن تاتارلار.
رەزەرۆكە ەنگەن جاستاردىڭ كوبى شەتەلدىك الدىڭعى قاتارلى وقۋ ورىندارىندا ءبىلىم العان. مۇنداي ۇمىتكەرلەردىڭ ۇلەسى – 58%. ولاردىڭ ۇشتەن ەكى بولىگى – ماگيستر دارەجەسىنە يە. بۇعان قوسا تىزىمدە 6 عىلىم دوكتورى بار.
ىرىكتەۋ جەڭىمپازدارىنىڭ ورتاشا جاسى – 31 جاس. رەزەرۆشىلەردىڭ ەكونوميكانىڭ ءتۇرلى سالالارىندا ايتارلىقتاي تاجىريبەسى بار. ولاردىڭ كوبى ەكونوميكانىڭ ءتۇرلى سەكتورلارىنداعى ءىرى شەتەلدىك جانە ترانسۇلتتىق كومپانيالاردا جۇمىس ىستەگەن, قازىر دە ىستەپ جاتىر.
– «بىتكەن ىسكە سىنشى كوپ» دەگەندەي, بۇل ىرىكتەۋدىڭ ادىلدىگىنە كۇمانمەن قاراعاندار دا تابىلدى. بۇعان نە دەيسىز؟
– پرەزيدەنتتىك جاستار كادر رەزەرۆىنە ىرىكتەۋ كەزىندە باسشىلىققا الىنعان ەڭ باستى قاعيداتتار – اشىقتىق پەن وبەكتيۆتىلىك بارىنشا قاتاڭ ساقتالعانىن ەش كۇمانسىز ايتا الامىن. جوعارى ترانسپارەنتتىلىك, اشىقتىق جانە ىرىكتەۋدىڭ ۇتقىرلىعى تسيفرلى ونلاين-تەحنولوگيالاردى قولدانۋ ارقىلى قامتاماسىز ەتىلدى.
تەستىلەۋ جانە ولاردىڭ الەۋەتىن باعالاۋ كەزەڭدەرىندە كانديداتتاردىڭ دەرەكتەرى جاسىرىلىپ, باعالاۋشى-ساراپشىلاردىڭ ەشقايسىسى كىمدى باعالاپ جاتقانىن بىلگەن جوق. كودتالعان ەسسەلەر مەن ۇمىتكەرلەردىڭ پرەزەنتاتسيالارى ونلاين-پلاتفورمادا ءبىر-ءبىرىن بىلمەيتىن ءۇش ساراپشىمەن بەلگىلەنگەن ولشەمدەر بويىنشا اۆتونومدى باعالاندى.
قۇزىرەتتىلىكتى باعالاۋدى اسسەسسمەنت-ورتالىقتا ارنايى دايىندالعان اسەسسورلار مەن سۋپەرۆيزورلار جۇرگىزدى. اسەسسورلار ءۇشىن ۇمىتكەرلەردىڭ قايدان كەلگەنى, قانداي وقۋدى بىتىرگەنى, قايدا جۇمىس ىستەگەنى تۋرالى اقپاراتتان تۇراتىن پروفايلى قولجەتىمسىز بولدى.
سوڭعى كەزەڭنىڭ الدىنداعى كەزەڭ – ساراپشىلىق كوميسسيادا اڭگىمەلەسۋ. ونىڭ مۇشەلەرى ۇمىتكەرلەردى ونلاين-جۇيەدە باعالادى. كوميسسيانىڭ بارلىق مۇشەلەرى ونلاين تۇردە باعاسىن ەنگىزگەننەن كەيىن ولار بىردەن بازاعا ءتۇسىپ وتىردى. ەشكىمدە باعانى تۇزەتۋ مۇمكىندىگى بولعان جوق.
حالىقارالىق ۇيىمداردىڭ وكىلدەرى مەن قوعام قايراتكەرلەرى بارلىق ۇدەرىستەردىڭ وبەكتيۆتىلىگى ءۇشىن سىرتقى باقىلاۋشىلار رەتىندە شاقىرىلدى. ءار كەزەڭنەن كەيىن اشىقتىقتى قامتاماسىز ەتۋ ءۇشىن ۇپايلارى بار قاتىسۋشىلاردىڭ رەيتينگى جاريالاندى. جالپى ءبىز ىرىكتەۋ ناتيجەلەرىن بارلىعى وڭ قابىلدامايتىنىن جاقسى تۇسىندىك جانە بۇل – قالىپتى جاعداي.
قاتىسۋشىلارعا قويىلعان نەگىزگى تالاپ – وتىز بەس جاستان اسپاعان, جوعارى ءبىلىمى جəنە بەس جىلدان كەم ەمەس ەڭبەك ءوتىلى بار قازاقستان رەسپۋبليكاسىنىڭ ازاماتى بولۋى ءتيىس. باسقا شەكتەۋلەر بولعان جوق.
قاتىسۋعا وتىنىشتەر كوپ بولدى. بىراق كوبى تەستىلەۋ مەن تەستىلەۋدى ۆەريفيكاتسيالاۋ سياقتى كۇردەلى كەزەڭدەردەن وتە الماي قالدى. ءبىز ەشكىمگە ەشقانداي قولداۋ جاسامايمىز دەگەن تۇبەگەيلى شەشىم قابىلدادىق, ەرەجەلەر بارلىعى ءۇشىن بىردەي بولدى. وسى ءتاسىلدىڭ ارقاسىندا ءبىز ۇلكەن ناتيجەگە قول جەتكىزىپ, اقىلدى, تالاپتى, بەلسەندى, جانىپ تۇرعان ازاماتتاردى ىرىكتەدىك. ەڭ باستىسى, ءبىز ولاردىڭ ەلىمىزدىڭ دامۋىنا ۇلەس قوسقىسى كەلەتىنىن, وتانداستارىنىڭ بولاشاعىنا بەيجاي قارامايتىنىن بايقادىق. ولاردىڭ ءوز ەلىنە قاجەت ەكەنىن سەزىنىپ, وسىعان شابىتتانعاندارىن كوردىك.
وزگە دە سيپاتتاعى قيىندىقتار بولدى. مىسالى, الەۋمەتتىك جەلىلەردە تەستىلەۋدى ۆەريفيكاتسيالاۋ كەزەڭىندە تەست سۇراقتارىنا دايىن جاۋاپتاردى ۇسىنادى دەگەن سياقتى اقپارات تارالدى. تەستتەردى ۆەريفيكاتسيالاۋ كەزەڭىنەن وتۋگە ارنالعان كوپتەگەن قىزىقتى ۇسىنىس تا تۋىنداعان. الايدا سۇراقتار بازاسىن ەشكىم بىلمەيدى, تاپسىرمالار بىرەگەي, پرەزيدەنت جوباسى ءۇشىن ارنايى ازىرلەندى. سوندىقتان ونداي ۇسىنىستار مۇلدەم قاجەتسىز بولدى.
بيىل رەزەرۆتەگىلەردىڭ كەم دەگەندە 40%-ى جۇمىسقا ورنالاسادى
– ەندى كوپشىلىكتى ىرىكتەلگەن جاستاردىڭ قانداي قىزمەتتىڭ قۇلاعىن ۇستايتىنى قىزىقتىرادى. بۇل باعىتتاعى جۇمىستىڭ ناتيجەسىن قاشان كورەمىز؟ جالپى, بيىل رەزەرۆتەگى جاستاردىڭ قانشاسىن جۇمىسقا ورنالاستىرۋ جوسپارلانىپ وتىر؟
– «جۇزدەن جۇيرىك, مىڭنان تۇلپار شىققان», ىرىكتەلگەن جاس مامانداردىڭ بۇگىندە 36,5%-ى ينفراقۇرىلىم مەن سەرۆيستىك سالالاردى دامىتۋ, ونەركاسىپ, اۋىل شارۋاشىلىعى جانە قورشاعان ورتانى قورعاۋ سالاسىندا, 21,5%-ى ەكونوميكالىق جانە قارجىلىق, 7%-ى سىرتقى جانە ىشكى ساياسات, 5%-ى الەۋمەتتىك, 4%-ى قۇقىقتىق ساياسات سالاسىندا, سونداي-اق 12%-ى وڭىرلىك جانە 14%-ى باسقارۋ توپتارىندا قاراستىرىلعان قىزمەتتەردى تاڭداعان. ياعني, 300 ىرىكتەلگەن رەزەرۆشى سالالار بويىنشا بولىنگەن. ولاردىڭ كەيبىرەۋلەرى جاقىن ارادا مەملەكەتتىك لاۋازىمدارعا تاعايىندالۋى مۇمكىن.
2020 جىلدىڭ ءبىرىنشى توقسانىندا ءبىزدىڭ اگەنتتىك ءاربىر رەزەرۆشى ءۇشىن قۇزىرەتتەردى دامىتۋدىڭ جەكە جوسپارىن ازىرلەيتىنىن اتاپ وتكىم كەلەدى. مەملەكەتتىك قىزمەت پەن كۆازيمەملەكەتتىك سەكتورداعى جوعارى لاۋازىمدارعا رەزەرۆشىلەردى تاعايىنداۋ دايەكتى مانساپتىق ءوسۋ جولىمەن جوسپارلانادى. اگەنتتىك رەزەرۆشىلەردى ودان ءارى مانساپتىق ىلگەرىلەتۋگە مونيتورينگ جۇرگىزەدى.
مەملەكەت باسشىسىنىڭ جارلىعىنا سايكەس ىرىكتەۋدىڭ بارلىق كەزەڭدەرىنەن وتكەن تۇلعالار بەس جىل مەرزىمگە رەزەرۆكە الىنادى. ەل پرەزيدەنتى بۇدان كەيىنگى جۇمىستاردى ۇيلەستىرۋ ءۇشىن ۇكىمەتكە, پرەزيدەنت اكىمشىلىگىنە جانە ءبىزدىڭ اگەنتتىككە ناقتى تاپسىرما بەردى. ءبىز بەس جىل ىشىندە رەزەرۆكە ەنگەن ادامداردى جۇمىسقا ورنالاستىرۋدى قامتاماسىز ەتۋىمىز كەرەك. ولاردىڭ كەيبىرەۋى بىردەن جوعارى لاۋازىمدارعا يە بولا الادى. كەيبىرىنە ءبىز باستاپقىدا تومەندەۋ, بىراق ودان ءارى ءوسۋدىڭ ناقتى پەرسپەكتيۆاسى بار لاۋازىم ۇسىنامىز. ۇسىنىلعان قىزمەتتەردى قۇپ الا ما, الماي ما, رەزەرۆتەگى كادرلار وزدەرى شەشەدى.
قازىرگى تاڭدا ءبىز رەزەرۆشىلەر تاعايىندالۋى مۇمكىن بوس لاۋازىمدارعا تالداۋ جۇرگىزىپ جاتىرمىز. 2020 جىلدىڭ العاشقى جارتىجىلدىعىندا, ءتىپتى ءبىرىنشى توقسانىندا رەزەرۆتەگىلەردىڭ 30%-ىن جۇمىسقا ورنالاستىرىپ قالۋىمىز مۇمكىن. جالپى جىلدىق مەجە ولاردىڭ كەم دەگەندە 40%-ىن ورنالاستىرۋ كەرەك. رەزەرۆتەگىلەردىڭ جوعارى الەۋەتىن, قۇزىرەتتىلىك دەڭگەيىن, جاڭاشىلدىعىن جانە وزگەرىستەرگە دايىندىعىن, بەلسەندىلىگىن, ەلدىڭ دامۋىنا ۇلەس قوسۋعا دەگەن نيەتىن ەسكەرە وتىرىپ, بۇل جاستاردى تابىستى مانساپ كۇتىپ تۇر دەپ ويلايمىن.
– ىرىكتەلگەن جاستاردىڭ اراسىندا باسشىلىق قىزمەت اتقارعان, تابىسى جاقسى ماماندار دا بار. مەملەكەتتىك قىزمەتتەن ولاردىڭ ويلارىنان شىعاتىن قانداي ورىندار ۇسىنىلۋى مۇمكىن؟
– نەگىزى ىرىكتەلگەن جاستاردىڭ ىشىندە جوعارى دارەجەلى قىزمەتتەگى ادامدار از. دەگەنمەن ەلىمىزدە العاش رەت قولعا الىنعان تەڭدەسسىز جوبانىڭ ىرىكتەۋىنەن سۇرىنبەي ءوتىپ, رەزەرۆكە قابىلدانعان ازاماتتاردىڭ مەملەكەتتىك باسقارۋ جۇيەسىندە عانا ەمەس, كۆازيمەملەكەتتىك سەكتوردا دا باسشىلىق لاۋازىمعا كەلۋىنە مۇمكىندىك بەرىلەدى.
رەزەرۆشىلەر مەملەكەتتىك ساياسي جانە اكىمشىلىك لاۋازىمدارىنا, ۇلتتىق كومپانيالاردىڭ باسقارۋشى لاۋازىمدارىنا ورنالاسا الادى. بۇعان قوسا «قازاقستان رەسپۋبليكاسىنىڭ مەملەكەتتىك قىزمەتى تۋرالى» زاڭىندا دا رەزەرۆتەگى تۇلعالاردى مەملەكەتتىك اكىمشىلىك لاۋازىمدارعا قابىلداۋ مۇمكىندىگىن قاراستىراتىن تۇزەتۋلەر ەنگىزىلدى. وسىلايشا بىلىكتى دە ءبىلىمدى, ءوز ەلىن سۇيەتىن, مەملەكەتىمىزدىڭ ءوسىپ-وركەندەۋىنە جانە ودان ءارى دامۋىنا ۇلەسىن قوسۋعا نيەتتى جاس بۋىن وكىلدەرىنە مەملەكەتتىك باسقارۋ جۇيەسىنە كەدەرگىسىز كەلۋىنە جول اشىلدى.
– ىرىكتەلگەن جاستاردىڭ كوبىندە مەملەكەتتىك قىزمەتتە جۇمىس تاجىريبەسى جوق. ولاردى تاعايىنداۋ الدىندا ءتيىستى وقىتۋ قاراستىرىلعان با؟ بىلىكتىلىگىن ارتتىرۋ بويىنشا قانداي دا ءبىر ارنايى باعدارلاما بولا ما؟
– قولدانىستاعى زاڭناماعا سايكەس مەملەكەتتىك قىزمەتشى جانە مەملەكەتتىك لاۋازىمعا تاعايىندالاتىن رەزەرۆشىلەر بىلىكتىلىكتى ارتتىرۋ سەمينارلارى مەن قايتا دايارلاۋ كۋرستارىنىڭ جوسپار-كەستەسىنە سايكەس پرەزيدەنت جانىنداعى مەملەكەتتىك باسقارۋ اكادەمياسىندا قايتا دايارلاۋ كۋرستارىندا وقۋدان وتەدى. باسقا رەزەرۆشىلەر اكادەميا ازىرلەگەن ترەنينگتىك باعدارلامالاردا وزدەرىنىڭ باسقارۋ قۇزىرەتتەرىنىڭ دەڭگەيىن ارتتىرا الادى. ترەنينگتىك باعدارلامالار زاماناۋي جاعدايلارداعى ەڭ وزەكتى باعىتتاردى قامتيدى: ويلاۋ ديزاينى, ترانسفورماتسيالىق كوشباسشىلىق, ەموتسيونالدى ينتەللەكت, پەرسپەكتيۆالىق ويلاۋ جانە ستسەناريلىك جوسپارلاۋ, ستراتەگيالىق مەنەدجمەنت, جوبالىق مەنەدجمەنت, بيزنەس ۇدەرىستەردى وڭتايلاندىرۋ جانە تاعى باسقا. بۇل تۋرالى اكادەميانىڭ سايتىنان كەڭىنەن تانىسۋعا بولادى.
مەريتوكراتيا قاعيداتى جاستاردىڭ مارتەبەسىن كوتەرەدى
– بۇل جوبا جاس ماماندارعا الەۋمەتتىك ليفت بولاتىنىن اتاپ ءوتتىڭىز. جالپى اتالعان جوباعا قوسا ازاماتتاردىڭ قىزمەت بابىندا كەدەرگىسىز كوتەرىلۋى ءۇشىن مەريتوكراتيا قاعيداتىنىڭ نەگىزىندە قانداي جۇمىستار جوسپارلاندى؟
– پرەزيدەنتتىك جاستار كادر رەزەرۆىنە ەنگەن كەيبىر جاستاردى ءوڭىر-وڭىرگە جۇمىسقا جىبەرۋ جوسپارلانىپ وتىر. وسىلايشا بۇل جوبا ماسەلەلەردى جەرگىلىكتى جەردە شەشۋگە اسەر ەتۋى كەرەك. سونداي-اق ايماقتاردا تاجىريبە جيناعان جاستاردى ورتالىققا جۇمىسقا ورنالاستىرۋدى دا ويلاستىرامىز.
مۇنداي جۇمىستار مەريتوكراتيا قاعيداتىنا سايكەس بۇرىننان اتقارىلىپ كەلەدى. ماسەلەن, «بولاشاق» باعدارلاماسىمەن شەتەلدە ءبىلىم الىپ كەلگەن جاستار ەلدىمەكەندەردە ەڭبەك ەتىپ, تاجىريبەسىن شىڭدادى. حالىقپەن ەتەنە ارالاسىپ, تۇرعىنداردىڭ تالاپ-تىلەگىن, مۇڭ-مۇقتاجىن جاقسى بىلەتىن مامانداردان كەيىن بىلىكتى باسشىلار دا شىقتى.
پرەزيدەنت قاسىم-جومارت توقاەۆ «Egemen Qazaqstan» گازەتىنە بەرگەن سۇحباتىندا «جاستاردىڭ لايىقتى ءبىلىم الۋىنا, الاڭسىز جۇمىس ىستەۋىنە تەڭدەي مۇمكىندىك بەرىلۋى قاجەت. اۋىل مەن قالاداعى جاس ازامات ءۇشىن دە, لاۋازىمدى, اۋقاتتى نەمەسە قاراپايىم شارۋا وتباسىنىڭ بالاسى ءۇشىن دە الەۋمەتتىك ءليفتتىڭ ەسىگى كەدەرگىسىز اشىق بولۋى كەرەك. اينالىپ كەلگەندە, الەۋمەتتىك تەڭدىك دەگەنىمىز – وسى. ءبىز وسىعان قول جەتكىزۋگە ءتيىسپىز. مەملەكەتتىك قىزمەتكە تاعايىنداۋ بارىسىندا مەريتوكراتيا ءپرينتسيپىن ۇستانعان ءجون. ازاماتتاردى تەك بىلىمىنە, قابىلەتىنە قاراي تاعايىنداۋ تالابى قاعاز بەتىندە قالماي, ءىس جۇزىندە ورىندالۋى قاجەت» دەپ ايتقان ەدى.
وسى باعىتتاعى جۇمىستار جالعاسىن تاۋىپ, وڭىرلەردە بۇرىننان ىستەپ جاتقان ماماندارعا قولداۋ كورسەتىپ, قىزمەتتە ىلگەرىلەۋىنە جاعداي جاسايمىز. بوس ورىندار كونكۋرسىنا قاتىسقان جاستاردىڭ ىشىنەن دەپارتامەنتتەرگە جۇمىسقا قابىلدايمىز. مەريتوكراتيا قاعيداتىنىڭ نەگىزىندەگى بيىلعى جۇمىستاردى جاقىن ارادا قولعا الامىز.
– مەملەكەت باسشىسى قازاقستان حالقىنا جولداۋىندا 2020 جىلدان باستاپ مەملەكەتتىك قىزمەتشىلەردىڭ سانىن بىرتىندەپ قىسقارتۋعا كىرىسىپ, ۇنەمدەلگەن قاراجاتتى نەعۇرلىم پايدالى قىزمەتكەرلەردى ىنتالاندىرۋعا جۇمساۋ كەرەك ەكەنىن ايتتى. بۇل جونىندە نە ايتاسىز؟
– ءيا, پرەزيدەنت قازاقستان حالقىنا جولداۋىندا مەملەكەتتىك اپپاراتتى جانە كۆازيمەملەكەتتىك سەكتورداعى قىزمەتشىلەردىڭ سانىن وڭتايلاندىرۋدى تاپسىرعان بولاتىن. قازىرگى ۋاقىتتا مەملەكەتتىك قىزمەتشىلەردىڭ شتاتتىق سانى – 98 مىڭعا جۋىق. شتات سانىن وڭتايلاندىرۋ كەزەڭ-كەزەڭىمەن بىرنەشە جىلدىڭ ىشىندە جۇرگىزىلەدى. ءوز كەزەگىندە بۇل مەملەكەتتىك قىزمەتكە باسەكەگە قابىلەتتى, بىلىكتى مامانداردى تارتۋعا مۇمكىندىك بەرەدى.
وسى تاپسىرمانى ورىنداۋدىڭ ناقتى تەكتىكتەرى قازىرگى ۋاقىتتا ۇلتتىق ەكونوميكا مينيسترلىگىمەن پىسىقتالىپ جاتىر. قىسقارتۋ بويىنشا ۇسىنىستاردى ازىرلەۋ ءتيىستى جۇمىس توبىمەن جۇرگىزىلۋدە. اتالعان مينيسترلىك جالپى مەملەكەتتىك قىزمەتتىڭ شتاتتىق سانىن بەلگىلەۋ, ولارعا قارجى ءبولۋ سياقتى قۇزىرەتتەرگە يە. تالداۋ جۇمىستارىنىڭ ناتيجەسىن وسى جىلدىڭ ءبىرىنشى توقسانىنان باستاپ كورە باستايمىز.
وڭتايلاندىرۋ مەملەكەتتىك قىزمەتتىڭ اشىقتىعىن قامتاماسىز ەتىپ, ءبىراز جۇمىستى جۇيەلەۋگە, تيىمدىلىگىن ارتتىرۋعا سەپتىگىن تيگىزەدى. قىسقارتۋ ەسەبىنەن ۇنەمدەلگەن قاراجاتتى بىلىكتى مامانداردى ىنتالاندىرۋعا جۇمساۋعا مۇمكىندىك بەرەدى.
– مەملەكەتتىك قىزمەت سالاسىن جەتىلدىرۋ جونىندە تولىمدى مالىمەت بەرگەنىڭىزگە راحمەت.
اڭگىمەلەسكەن
ورىنبەك وتەمۇرات,
«Egemen Qazaqstan»
