قالانىڭ دامۋ جوسپارىنا سايكەس بۇل اۋلالار كۇردەلى جوندەۋدەن ءوتىپ, بالالارعا ارنالعان ويىن الاڭدارى مەن سپورتتىق – دەمالىس ورىندارىنا اينالۋى ءتيىس. جاڭعىرتۋ جۇمىستارى 2012 جىلى باستالىپ, 2019 جىلعا دەيىن قالاداعى 100 اۋلا جوندەلىپ, قولدانىسقا بەرىلگەن. ال وتكەن جىلدىڭ سوڭىندا تاعى 48 ءۇيدىڭ اۋلاسى جاڭارتىلۋى ءتيىس بولاتىن.
الايدا, اۋلالارداعى جاڭعىرتۋ جۇمىستارىنا قالا تۇرعىندارىنىڭ كوڭىلى تولمايدى. اسىرەسە, قالا ورتالىعىندا تۇراتىندار قابانباي باتىر, ءبىرجان سال, نۇرسۇلتان نازارباەۆ, ءى.جانسۇگىروۆ كوشەلەرىنىڭ بويىنداعى تۇرعىن ۇيلەردىڭ ويىن الاڭدارىن جوندەۋ ۇزاققا سوزىلىپ, قۇرىلىستىڭ جەلتوقسان ايىنىڭ ورتاسىنا دەيىن جالعاسقانىن ايتادى. ياعني, ادامدار ءۇي ماڭىنداعى جولدار مەن تروتۋارلارعا قار جاۋعاننان كەيىن اسفالت توسەلگەنىنە نارازى ەكەن. ولار قىس ىشىندە سالىنعان ويىن الاڭدارى مەن جولدىڭ ساپاسىنا الاڭداۋشىلىق بىلدىرۋدە.
ايتپاقشى, قالانىڭ قابانباي باتىر, ءبىرجان سال, نۇرسۇلتان نازارباەۆ, ءى.جانسۇگىروۆ كوشەلەرىندەگى تۇرعىن ۇيلەردىڭ ويىن الاڭدارىن جوندەۋگە 213,5 ميلليون تەڭگە, ال قابليسا جىراۋ, شەۆچەنكو, كيۆيلەۆ جانە م.تولەباەۆا كوشەلەرى مەن «سامال», «مۇشەلتوي», «قاراتال», «جەتىسۋ» شاعىن اۋداندارىنداعى اۋلالاردى جاڭعىرتۋعا 827,2 ميلليون تەڭگە بيۋدجەت قارجىسى جۇمسالىپتى.
الماتى وبلىسى
