ماقالادا ابايدىڭ ادەبي مۇراسى ارناسىندا ۇلتتىق بولمىسىمىزدىڭ ۇلگىسى, ينتەللەكتۋالدى ۇلت قالىپتاستىرۋ, مەملەكەتتىگىمىزدى نىعايتۋ, الەۋمەتتىك جاۋاپكەرشىلىك, اقىن ءىلىمىنىڭ ءححى عاسىرداعى قازاقستان ءۇشىن ماڭىزى مەن ءمانى تۋرالى تەگەۋرىندى ويلار جەلىسى نەگىزدەلدى. ۇلى اقىن ءوز شىعارمالارىندا ەلدىك مۇراتتى اسقاقتاتىپ, ۇلت بىرلىگىن بيىكتەتكەنى ناقتى ساياسي-الەۋمەتتىك تۇجىرىم تۇرىندە دايەكتەلدى.
اباي ءىلىمىنىڭ باستى كاتەگوريالىرىنىڭ ءبىرى - ءبىلىم. ماقالادا ءبىلىم, عىلىم جايىندا اباي ايتقان ويلاردىڭ قازىر دە اسا وزەكتى ەكەنى, ءتىپتى بۇرىنعىدان دا زور ماڭىزعا يە بولىپ وتىرعانى ارنايى قاعيدا, مەملەكەتتىك ۇستانىم دەڭگەيىندە تۇجىرىمدالدى. ءبىلىم بەرۋ ءىسىن زامانعا ساي دامىتۋدىڭ قاجەتتىگى, بۇل ماقساتتا اۋقىمدى جۇمىستار اتقارىلعانى, ءالى دە ولقى تۇستاردىڭ بارى, ولاردى جەتىلدىرۋ قاجەتتىگى انىق كورسەتىلدى. ءبىلىم جانە عىلىم سالاسىنىڭ قىزمەتكەرلەرىن ويلاندىراتىن, ويلاندىرىپ قانا قويماي, يگىلىكتى ىستەرگە باستايتىن مۇنداي ويلار, پىكىرلەر مەن تۇجىرىمداردىڭ وزەگىندە تەرەڭ ءمان بار.
پرەزيدەنتتىڭ ماقالاسىندا اباي ىلىمىندەگى «تولىق ادام» كونتسەپتسياسىنا ساياسي-الەۋمەتتىك تۇرعىدا العاش رەت رەسمي سيپاتتاما بەرىلدى. ماقالا اۆتورى الەۋمەتتىك جاۋاپكەرشىلىكتى ورنىقتىرۋ تۋرالى قاعيدالارىن ايتا كەلىپ, وسى كۇردەلى ماسەلەنىڭ شەشىمىن ابايدىڭ «تولىق ادام» فورمۋلاسىنان ىزدەۋ قاجەتتىگىنە ارنايى ءمان بەردى, «تولىق ادام» دەگەنىمىز «تەك وتە ىلكىمدى, وزىنە سەنىمدى, ىزگىلىك پەن جاقسىلىققا ۇمتىلاتىن ادامدارعا عانا ءتان سيپاتتاما» ەكەندىگىنە انىقتاما بەردى. سونىمەن قاتار اسا ماڭىزدى, وزەكتى قاعيدالار قاتارىندا مىنا مىندەتتەردى ارنايى اتاپ كورسەتكەندى دۇرىس كورەمىز:
- ابايدىڭ «تولىق ادام» تۇجىرىمىن قايتا زەردەلەۋىمىز كەرەك;
- بۇل باعىتتا عالىمدارىمىز تىڭ زەرتتەۋلەردى قولعا الۋى قاجەت;
- «تولىق ادام» كونتسەپتسياسى, شىنداپ كەلگەندە, ءومىرىمىزدىڭ كەز كەلگەن سالاسىنىڭ, مەملەكەتتىك باسقارۋ مەن ءبىلىم جۇيەسىنىڭ, بيزنەس پەن وتباسى ينستيتۋتتارىنىڭ نەگىزگى تۇعىرىنا اينالۋى كەرەك;
- ابايدى ۇلتىمىزدىڭ مادەني كاپيتالى رەتىندە ناسيحاتتاۋىمىز كەرەك...
پرەزيدەنت ماقالاسىندا قويىلعان وسى مىندەتتەردى ءىس جۇزىنە اسىرۋدىڭ ءححى عاسىرداعى قازاقستان ءۇشىن ومىرلىك ماڭىزى بار. ءححى عاسىرداعى قازاقستاننىڭ رۋحاني جانە مادەني قۇندىلىقتارىنىڭ دامۋىندا بۇل مىندەتتەردى ءىس جۇزىنە اسىرۋدىڭ ساياسي-ەكونوميكالىق, عىلىمي تۇرعىدا بارىنشا تياناقتى, ساپالى مەحانيزمىن جاساۋدىڭ ماڭىزى ۇلكەن.
رەسپۋبليكا پرەزيدەنتىنىڭ «اباي جانە ءححى عاسىرداعى قازاقستان» ماقالاسى قوعامدىق سانامىزدىڭ, ادەبيەتىمىز بەن مادەنيەتىمىزدىڭ, الەۋمەتتىك ءومىرىمىزدىڭ جاڭعىرۋىنا جاڭا سەرپىن بەرەدى.
جانعارا دادەباەۆ,
ءال-فارابي اتىنداعى قازاق ۇلتتىق ۋنيۆەرسيتەتى
جانىنداعى اباي عىلىمي-زەرتتەۋ ينستيتۋتىنىڭ
ديرەكتورى, فيلولوگيا عىلىمدارىنىڭ
دوكتورى, پروفەسسور
