وڭىردە اۋىل شارۋاشىلىعى تەحنيكالارىنا قىزمەت كورسەتۋدى دامىتىپ, بالىق شارۋاشىلىعىن جەتىلدىرۋ, تەمىر-بەتون قوندىرعىلارىن شىعارۋ ءتارىزدى اۋقىمدى جۇمىستار قولعا الىنباق.
– 2020 جىلى جالپى كولەمى 65 ميلليارد تەڭگەنى قۇرايتىن 13 جوبانى ىسكە قوسۋ جوسپارلانىپ وتىر. ونىڭ ناتيجەسىندە 943 جۇمىس ورنى اشىلادى. ولاردىڭ ىشىندەگى ەڭ اۋقىمدىلارىنا توقتالساق, بۇل كوكشەتاۋدا اۋىل شارۋاشىلىعى تەحنيكالارىنا قىزمەت كورسەتۋ ورتالىعى - «ەۋرازيا گرۋپپتىڭ» اشىلۋى. ينۆەستيتسيا كولەمى 2,5 ميلليارد تەڭگەنى قۇرايدى. ەكىنشى جوبا تەمىربەتون قوندىرعىلارىن شىعارۋ, ال ءۇشىنشىسى بەكىرە ۋىلدىرىعىنىڭ ءوندىرىسى, – دەيدى وبلىستىق كاسىپكەرلىك جانە ونەركاسىپ باسقارماسىنىڭ ءبولىم جەتەكشىسى ديانا ەسىموۆا.
جاڭا ينۆەستيتسيالىق جوبالاردىڭ ىسكە قوسىلۋى ونىمدەردى ساتۋ نارىعىن قالىپتاستىرىپ, ەكسپورتتىق گەوگرافيانى كەڭەيتۋگە جولا اشادى. بۇگىندە اقمولا وبلىسىنان رەسەيگە – 126,2 ميلليون, وزبەكستانعا – 73,1 ميلليون, تادجىكستانعا – 29, 1 ميلليون, اۋعانستانعا - 24, 9 ميلليون, يرانعا – 24, 1 ميلليون, قىتايعا – 19, 8 ميلليون اقش دوللارى كولەمىندە ءونىم ەكسپورتتالدى.
– اقمولا وبلىسىنىڭ سىرتقى ساۋدا اينالىمى 2019 جىلى 771,4 ميلليون دوللاردى قۇرادى, ونىڭ 346 ميلليون دوللارى ەكسپورت. بۇل 2018 جىلمەن سالىستىرعاندا 11 پروتسەنتكە جوعارى, – دەيدى وبلىستىق كاسىپكەرلىك جانە ونەركاسىپ باسقارماسىنىڭ باس مامانى دامير جانۇزاقوۆ.
كاسىپكەرلىكتى قولداۋ باعىتىندا بيىل جالپى يندۋستريالاندىرۋ كارتاسىنا قۇنى 500 ميلليارد تەڭگەنى قۇرايتىن 107 جوبا ەنىپ وتىر. بۇگىندە 88 ءوندىرىس وشاعى ىسكە قوسىلدى. يندۋستريالاندىرۋ كارتاسى تولىق جۇزەگە اسىرىلسا, 12 مىڭعا جۋىق جاڭا جۇمىس ورنى اشىلادى دەپ كۇتىلۋدە.
اقمولا وبلىسى
