راسىندا, ءورت ءتۇتىنى بۇگىندە جاڭا زەلاندياعا جەتكەن. لوندون حالقى دا اۋانىڭ لاستانۋىنا شاعىم ءتۇسىرىپ جاتىر. بەلگىلى ساياساتكەرلەر قولداۋ كورسەتەتىنىن حابارلاپ, تانىمال اكتەرلەر مەن انشىلەر الەم جۇرتشىلىعىنىڭ نازارىن اۋدارۋ ءۇشىن كامپانيالار ۇيىمداستىرۋدا.
العاشقىلاردىڭ ءبىرى بولىپ مالايزيا كومەككە ءازىر ەكەنىن ءبىلدىردى. مەملەكەت ۆيتسە-پرەمەرى ۆان ازيزا ۆان يسمايل اۋستراليانىڭ شىعىسى مەن وڭتۇستىك-شىعىسىنداعى ءورتتى سوندىرۋگە قۇتقارۋشىلار مەن ارنايى تەحنيكا جىبەرۋگە دايىن ەكەنىن حابارلادى.
كوپ ۇزاماي فرانتسيا پرەزيدەنتى ەممانۋەل ماكرون دا ءتىلسىز جاۋمەن بىرىگىپ كۇرەسۋگە نيەتتى ەكەنىن جەتكىزدى. «ەلدى كۇلگە اينالدىرعان ورتپەن كۇرەسىپ جاتقان اۋستراليا حالقىنا كوڭىل بىلدىرەمىن. بۇگىن سكوتت مورريسونعا (اۋستراليانىڭ پرەمەر-ءمينيسترى) حابارلاسىپ, كومەككە ءازىر ەكەنىمىزدى, حالىقتىڭ قاۋىپسىزدىگىن قامتاماسىز ەتۋگە, قورشاعان ورتانى اپاتتان ساقتاۋعا دايار ەكەنىمىزدى ايتتىم», دەدى ول.
قولداۋشىلار قاتارىنان اقش, جاڭا زەلانديا, سينگاپۋر مەن كانادا دا تابىلدى. اۋستراليا پرەمەر-ءمينيسترى سكوتت مورريسون مەملەكەتتەر مەن ۇكىمەتتەر باسشىلارىنا ريزاشىلىعىن ءبىلدىردى.
ۇلىبريتانيا پاتشايىمىنىڭ وتباسى دا تىلەۋلەستىگىن جەتكىزدى. ء«بىزدىڭ ويىمىز دا, جۇرەگىمىز دە سەندەرمەن بىرگە. بەيبىت كۇندە قاۋىشۋدى تىلەيمىز», دەپ حات جولداعان. بۇل تىلەككە پرەمەر-مينيستر بوريس دجونسون دا قوسىلىپ, بريتانيا ۇكىمەتىنىڭ كومەككە ءازىر ەكەنىن حابارلادى. پاپۋا- جاڭا گۆينەيانىڭ ۇكىمەت باسشىسى دجەيمس ماراپە 1000 جاۋىنگەر مەن ءورت ءسوندىرۋشىنىڭ شاقىرتۋ كۇتىپ وتىرعانىن مالىمدەدى.
قول ۇشىن سوزامىن دەۋشىلەردىڭ ىشىندە ۆانۋاتۋ رەسپۋبليكاسى دا بار. تىنىق مۇحيتىنداعى ارالدىڭ تۇرعىندارى جاپا شەككەندەردى قولداۋعا 250 مىڭ اۋستراليا دوللارىن اۋدارعان. ۆانۋاتۋ پرەمەر-ءمينيسترى دجوتام ناپات «كورشىلەرىمىزدى قولداۋعا ءازىرمىز. اۋستراليا بىزگە قاشاندا كومەك بەرەتىن, ءبىز دە ولاردىڭ قايعىسىنا ورتاقپىز, قولىمىزدان كەلگەنشە كومەك كورسەتەمىز», دەيدى.
فيدجي رەسپۋبليكاسىنىڭ ۇكىمەت باسشىسى فرانك باينيماراما دا وتانداستارىنىڭ جىلى لەبىزىن جەتكىزدى.
اۋستراليالىق كاسىپكەرلەر زارداپ شەككەندەر قورىنا جاپپاي قوماقتى قارجى اۋدارىپ جاتىر. اۋستراليانىڭ ايگىلى ساتيريگى سەلەستا باربەر «ورتكە قارسى كۇرەس» قورىن اشقان. نەبارى 48 ساعاتتا قور قورجىنىنا 13 ملن اقش دوللارى تۇسكەن. وعان جەر-جەردەن 1,1 ملن ادام اقشا اۋدارعان ەكەن. كومەك قولىن سوزعان تانىمال تۇلعالار اراسىندا تەننيسشىلەر مارينا شاراپوۆا مەن نوۆاك دجوكوۆيچ بار. ال اۋستراليالىق تەننيس جۇلدىزى نيك كيروس قاڭتاردا قاتىسقان ءار دوداسىنان تۇسەتىن سىياقىنىڭ قوماقتى بولىگىن قايىرىمدىلىققا جۇمسايتىنىن ايتتى. قولداۋشىلار تىزىمىندە گولليۆۋد جۇلدىزدارى دا بار.
ءورت كوپ وتباسىنى ۇيىنەن ايىرعانى بەلگىلى. وسىعان وراي الەمنىڭ تۇكپىر-تۇكپىرىندە ازىق-ت ۇلىك, ويىنشىق, كيىم مەن تۇرمىسقا قاجەتتى زاتتاردى جيناۋ ناۋقانى ءجۇرىپ جاتىر. وتقا ورانعان جاڭا وڭتۇستىك ۋەلس شتاتىنىڭ باسشىسى ازىق-ت ۇلىكتىڭ جەتىسپەۋىنەن ەكىنشى اپاتتىڭ تۋى مۇمكىن ەكەنىن ەسكەرتكەن. ۆيكتوريا شتاتىندا دا جاعداي مۇشكىل. ولار قارجىلاي كومەككە ءزارۋ ەكەنىن جاسىرمادى. حالىقتىڭ «بىزگە ازىرگە تاماق پەن كيىم ەمەس, اقشا قاجەت» دەگەن ءوتىنىشىن پوليتسيا جانە قاۋىپسىزدىك قىزمەتتەرى ءمينيسترى ليزا نەۆيل جەتكىزدى.
اۋستراليا ەكونوميكاسىن كوتەرۋ ءۇشىن #GoWithEmptyEskies ناۋقانى باستالعان. بەلسەندىلەر اۋستراليادا قوناقۇي جالداۋ, ازىق-ت ۇلىك ساتىپ الۋ ارقىلى ەكونوميكانى كوتەرۋگە ۇلەس قوسۋعا شاقىرۋدا. اۋستراليادا تەگىن كومەك كورسەتۋ ءۇشىن مىڭداعان ادام الەمنىڭ باسقا بۇرىشىنان جولعا شىققان. وقيعا ورنىندا ەرىكتىلەر كوپ. ولاردىڭ بارلىعى تەگىن قىزمەت ەتىپ ءجۇر. بۇعان دەيىن حابارلاعانىمىزداي, اۋستراليا ۇكىمەتى دە تابيعي اپاتتا زارداپ شەككەندەردىڭ وتباسىلارىنا 4200 اقش دوللارى كولەمىندە وتەماقى تولەمەك. ءتىلسىز جاۋمەن كۇرەسۋگە مەملەكەت تاراپىنان 16,2 ملن اقش دوللارى بولىنگەن.
