قازاقستاندا پروفيلاكتيكالىق ەكپەلەر تولىعىمەن مەملەكەت تاراپىنان قارجىلاندىرىلاتىنىن ايتا كەتكەن ءجون. پروفيلاكتيكالىق كۇنتىزبەگە ەنگىزىلگەن ەكپەلەرمەن قاتار, ەپيدەميالىق كورسەتكىشتەر بويىنشا تەگىن ەكپەلەر سالۋ جۇرگىزىلىپ وتىرادى.
ويتكەنى, جۇقپالى دەرتتەر ادامزاتپەن بىرگە ىلەسىپ كەلەدى جانە تۇماۋ, شەشەك, تىرىسقاق, ءىش سۇزەگى ىندەتتەرىنەن ميلليونداعان ادام قازاعا ۇشىرايدى.
ۆاكتسينالار ەگۋ پروتسەسىنە پايدا بولاتىن جانە اعزانى ناقتى اۋرۋ قوزدىرعىشتان قورعاۋعا قاجەتتى, بەلسەندى, ارنايى يممۋنيتەتتىڭ پايدا بولۋىنا ىقپال ەتەدى. 1976 جىلى اعىلشىن دارىگەرى دجەننەر سيىر شەشەگىنە ۇشىراعان سيىرلارمەن جۇمىس ىستەيتىن فەرمەرلەردىڭ تابيعي شەشەكپەن اۋىرمايتىنىن بايقايدى. ول ءبىر بالاعا سيىر شەشەگىن ەگۋ ارقىلى ونىڭ تابيعي شەشەكپەن اۋىرمايتىنىن دالەلدەپ بەردى. ۆاكتسينالار, ۆيرۋستار, باكتەريالار ەتەك جايماي تۇرعان سول ءبىر زاماندا ويلاپ تابىلعان وسى ءادىس ەۋروپادا كەڭ ءورىس الىپ, كەيىنىرەك بارلىق الەمدەگى شەشەكتىڭ جويىلۋىنا نەگىز بولعانى بەلگىلى.
جۇقپالى ىندەتتەر قاي زاماندا دا بولعان جانە بۇگىندە بار. ونىڭ بەتىن قايتاراتىن ەڭ ءتيىمدى تاسىلدەر كەزىندە جاسالعان ۆاكتسيناتسيا. ۆاكتسينالاۋدى الدىن الا جۇرگىزۋ دەموگرافيانىڭ, ءولىم-ءجىتىمنىڭ ازايۋى مەن ءومىر ءسۇرۋ ۇزاقتىعىنىڭ ەڭ ماڭىزى قۇرالدارىنىڭ ءبىرى. ۆاكتسينالاۋدىڭ تيىمدىلىگىن بۇكىل الەم مويىنداپ وتىر: دەنساۋلىق ساقتاۋ سالاسىندا ەڭ وزىق ناتيجەگە قول جەتكىزگەن, بۇدان اسقان ەشبىر باعدارلاما جوق.
ال قازاقستان رەسپۋبليكاسىنداعى پروفيلاكتيكالىق ەكپەلەردىڭ كۇنتىزبەسىنە 21 ينفەكتسيا ەنىپ وتىر. ءبىزدىڭ ەلىمىز تمد مەملەكەتتەرىنىڭ ىشىندە ءبىرىنشى بولىپ جاڭا تۋىلعان سابيلەر مەن جاسوسپىرىمدەرگە ۆ گەپاتيتىنە قارسى ۆاكتسيناتسيا جاساۋ, قىزىلشا, قىزامىق, ەپيدپاروتيت, پنەۆموكوك, حيب-ينفەكتسيالارىنا (نIB-ينفەكتسياسى وتيت, برونحيت, جەدەل رەسپيراتورلىق ينفەكتسيا جانە پنەۆمونيا سياقتى گەموفيلدىك تاياقشالار ارقىلى تۋىندايتىن اۋرۋلار توبى) قارسى قۇرامدالعان ەكپەلەر ەگۋدى ەنگىزدى. ءبىز العاشقىلاردىڭ قاتارىندا پوليوميەليتكە قارسى يناكتيۆتى ۆاكتسينا سالۋدى پايدالانىپ كەلەمىز. ءبىزدىڭ ۇلتتىق كۇنتىزبەمىزدە تۇماۋعا, ا گەپاتيتى ۆيرۋسىنا, تۇينەمە, تۋليارەميا, وبا, كوكتەمگى-كۇزگى ەنتسەفاليتكە قارسى ەپيدەميالىق كورسەتكىشتەر بويىنشا ەكپەلەر سالۋ كوزدەلگەن.
ەكپەلەردى ەگۋدەن باس تارتۋ – بالانى قورعاۋدان ايىرىپ قانا قويماي, باسقالاردى دا قاۋىپتى جاعدايعا دۋشار ەتىپ, قوعامدا جۇقپالى اۋرۋلاردىڭ تارالۋىنا جول بەرەدى, بۇل بالالاردىڭ اراسىنداعى ءولىم-ءجىتىمنىڭ ۇلعايۋىنا جانە جالپى دەنساۋلىقتىڭ ناشارلاۋىنا سوقتىراتىنى ايان.
