وسى ورايدا, سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتى سىبايلاس جەمقورلىققا قارسى ءىس-قيمىل جانە ونىڭ كەز كەلگەن كورىنىستەرىنەن ازاماتتاردىڭ قۇقىقتارىن قورعاۋ باعىتىندا جۇمىس جۇرگىزۋدە. اتالعان دەپارتامەنت باسشىسىنىڭ ورىنباسارى نۇركەن يسلاموۆتىڭ ايتۋىنشا, بىلتىردىڭ وزىندە جامبىل وبلىسىنىڭ اۋماعىندا الەۋمەتتىك كومەك كورسەتۋ سالالارىندا سىبايلاس جەمقورلىق سيپاتىندا جاسالعان 5 قىلمىس تىركەلىپتى.
«اتالعان سالالاردا شەنەۋنىكتەر تاراپىنان تاپسىرىلعان بوتەن م ۇلىكتى يەمدەنىپ الۋ نەمەسە تالان-تاراجعا سالۋ, لاۋازىمدىق وكىلەتتىكتەردى تەرىس پايدالانۋ, پارا الۋ سياقتى قىلمىستار كەڭىنەن تارالعان. سونىمەن قاتار الەۋمەتتىك كومەك سالالارى كوپتەگەن ميللياردتىق بيۋدجەت قاراجاتتارى شوعىرلانعان «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ» 2017-2021 جىلدارعا ارنالعان «ەڭبەك» مەملەكەتتىك باعدارلاماسى جۇزەگە اسىرىلۋىن سۇيەمەلدەيدى. بۇل تۇرعىدا مەملەكەت باسشىسى مەملەكەتتىك باعدارلامالاردى جۇزەگە اسىرۋ جانە بيۋدجەت قاراجاتىن جۇمساۋ بويىنشا باقىلاۋدى جانە جاۋاپكەرشىلىكتى قاتايتۋ قاجەتتىگىن, حالىقتىڭ قاراجاتىن ءتيىمسىز پايدالانۋعا جانە ۇرلاۋعا بايلانىستى جاسالىنعان قۇقىق بۇزۋشىلىقتار قاتاڭ تۇردە جازالاناتىنىن ايتقان ەدى», دەيدى نۇركەن يسلاموۆ.
بۇگىندە مەملەكەت تاراپىنان الەۋمەتتىك سالاعا ءتيىستى قولداۋ كورسەتىلىپ كەلەدى. ياعني, تۇرعىنداردىڭ تۇرمىسىن تۇزەتۋ ماقساتىندا قىرۋار قاراجات بولىنۋدە. الايدا, جەرگىلىكتى كەيبىر لاۋازىمدى تۇلعالار سونىڭ ءوزىن ءتيىستى ازاماتتارعا بولمەي, بولسە دە جەڭ ۇشىنان جالعاسقان جەمقورلىققا بوي الدىرۋى وكىنىشتى. ماسەلەن, جامبىل اۋدانى كولقاينار اۋىلدىق وكرۋگى اكىمدىگىنىڭ لاۋازىمدى تۇلعالارى اتاۋلى الەۋمەتتىك كومەك الۋعا مۇقتاج ەمەس تۇلعالارعا بەلگىلى ءبىر سىياقىعا جالعان قۇجات جاساعان دەرەكتەرى انىقتالعان. ەندى پاراقورلىق ساناتتا قوزعالعان قىلمىستىق ءىس بويىنشا كەشەندى سوت-ساراپتاما تاعايىندالىپ, جان-جاقتى تەرگەپ-تەكسەرۋ امالدارى جۇرگىزىلۋدە. «بۇدان باسقا, تاراز قالالىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ باس مامانى ن.بيجانوۆ اتاۋلى الەۋمەتتىك كومەكتى الىپ بەرۋ جانە ءارى قاراي قامقورلىق جاساۋ ماقساتىندا ازاماتشا گ.ساليەۆادان ءبىر ايلىق جاردەماقى 103 000 تەڭگە, د.احمەتوۆادان ءبىر ايلىق جاردەماقى 96 000 تەڭگە پارا الۋ دەرەگىمەن قۇرىقتالعان. بۇگىندە جان-جاقتى تەرگەپ-تەكسەرۋ امالدارى جۇرگىزىلىپ, ءىس قازىرگى تاڭدا قاراۋ ءۇشىن تاراز قالالىق №2 سوتىنا جولدانعان», دەيدى دەپارتامەنت باسشىسىنىڭ ورىنباسارى.
نۇركەن يسلاموۆتىڭ ايتۋىنشا, 2019 جىلى سارىسۋ اۋداندىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ باس مامانى ن.ايىمبەتوۆا كوپ بالالى انالارعا ارنالعان الەۋمەتتىك كومەك الۋعا كومەكتەسۋ جانە ءارى قاراي قامقورشىلىق جاساۋ ماقساتىندا ازاماتشا گ.ابدۋللاەۆا مەن گ.ابيشەۆالاردان 100 000 تەڭگە پارا الۋ دەرەگىمەن ۇستالعان. اتالعان ءىس بويىنشا جان-جاقتى تەرگەپ-تەكسەرۋ امالدارى جۇرگىزىلىپ, سارىسۋ اۋداندىق سوتىمەن ن.ايىمبەتوۆا كىنالى دەپ تانىلىپ, 2 000 000 تەڭگە ايىپپۇل جازاسىنا كەسىلگەن. سونداي-اق دەپارتامەنتتىڭ جەدەل قىزمەتكەرلەرىمەن جەدەل ىزدەستىرۋ ءىس-شارالارىن جۇرگىزۋ بارىسىندا ت.رىسقۇلوۆ اۋداندىق ءبىلىم ءبولىمىنىڭ باس مامانى, اۋداندىق قورعانشىلىق جانە قامقورشىلىق كەڭەسىنىڭ حاتشىسى ش.ماۋتباەۆتىڭ تەرىس ارەكەتى انىقتالعان. ول اتا-اناسىنىڭ قامقورلىعىنسىز قالعان بالاعا قورعانشىلىق بەلگىلەۋ جانە ونى ودان ءارى اسىراپ الۋ تۋرالى ماسەلەنىڭ وڭ شەشىلۋىنە جاردەم كورسەتۋگە ز.كادىروۆادان 350 000 تەڭگە پارا الۋ دەرەگىمەن قۇرىقتالعان. جان-جاقتى تەرگەپ, تەكسەرۋ امالدارىن جۇرگىزۋ ناتيجەسىندە سوتقا جولدانىپ, ت.رىسقۇلوۆ اۋداندىق سوتىنىڭ ۇكىمىمەن ش.ماۋتباەۆقا 3 جىل باس بوستاندىعىنان ايىرۋ جازاسى تاعايىندالعان.
جالپى, جامبىل وڭىرىندە 2019 جىلى الەۋمەتتىك كومەك كورسەتۋ سالالارىندا سىبايلاس جەمقورلىق سيپاتىندا دەرەك ارتىپ وتىر. ارينە, بۇل رەتتە ماسەلەنىڭ ەكى جاعى بار ەكەنىن دە ۇمىتپاعان ءجون. سەبەبى كەيبىر ازاماتتاردىڭ ءوزى تىرلىگىن تەز ءبىتىرىپ الۋ ءۇشىن جاۋاپتى ادامداردى پارا الۋعا يتەرمەلەيدى. سوندىقتان دا, سىبايلاس جەمقورلىقپەن مەملەكەت بولىپ كۇرەسىپ جاتقاندا ءاربىر ازامات وڭ ارەكەتتى وزىنەن باستاسا دۇرىس بولار ەدى...
جامبىل وبلىسى
