اسىرەسە, «نۇرلى جەر» تۇرعىن ءۇي باعدارلاماسى بۇرىنعى «قولجەتىمدى تۇرعىن ءۇي», «نۇرلى جول», «ايماقتاردى دامىتۋ» باعدارلاماسى ءتارىزدى كەڭ اۋقىمدى, ناتيجەلى جۇمىستاردى جالعاستىرىپ, ايرىقشا سەرپىنمەن جۇزەگە اسا باستادى. سوڭعى جىلدارى اقمولا وبلىسىندا قۇرىلىس جۇمىستارىنىڭ بارلىق باعىتى اۋىز تولتىرىپ ايتارلىقتاي تولىمدى تابىسپەن ورنەكتەلۋدە. ماسەلەن, سوڭعى ەكى جىل ىشىندە «نۇرلى جول» باعدارلاماسى بويىنشا 900 مىڭ شارشى مەتردەن استام تۇرعىن ءۇي سالىنىپ, پايدالانۋعا بەرىلدى. قاراپايىم تىلمەن ايتاتىن بولساق, 8 مىڭنان استام وتباسى قونىس تويىن تويلادى. بيىل 501 مىڭ شارشى مەتر نەمەسە 5 مىڭ پاتەردى پايدالانۋعا بەرۋ مەجەلەنۋدە. العاشقى 10 ايدىڭ ىشىندە 448 مىڭ شارشى مەتر پاتەر پايدالانۋعا بەرىلدى. ىلكىمدى ءىستىڭ ناتيجەلى اتقارىلۋىنىڭ ناتيجەسىندە وبلىستاعى 3840 وتباسى باسپانالى بولدى.
2019 جىلى تۇرعىن ءۇي قۇرىلىسىنا 11,3 ميلليارد تەڭگە قاراستىرىلعان بولاتىن. ونىڭ 7,5 ميلليارد تەڭگەسى رەسپۋبليكالىق بيۋدجەتتەن بولىنسە, وبلىستىق بيۋدجەتتەن 2,3 ميلليارد تەڭگە باعىتتالعان. بۇل ورايدا, «بايتەرەك دەۆەلوپمەنت» اكتسيونەرلىك قوعامىنىڭ 1,5 ميلليارد تەڭگەگە مەملەكەتتىك قۇندى قاعازدارىن شىعارىپ, قارجى تارتۋى دا ايتارلىقتاي سەپتىگىن تيگىزۋدە.
ساتىپ الۋ قۇقىعىنسىز جالعا بەرىلەتىن تۇرعىن ءۇي باعىتى بويىنشا 23 كوپپاتەرلى ۇيلەردىڭ قۇرىلىسى قولعا الىنعان. 14 كوپقاباتتى 618 پاتەرلىك تۇرعىن ءۇيدىڭ قۇرىلىسى جۇرگىزىلۋدە. بۇل جەردەن كوپ بالالى 148 وتباسىنا پاتەر بەرىلەدى. جىل باسىنان بەرى 13 مىڭ شارشى مەتر بولاتىن 235 پاتەرلىك 5 كوپقاباتتى تۇرعىن ءۇي پايدالانۋعا بەرىلدى. ونىڭ ۇشەۋى كوكشەتاۋ قالاسىندا, 40 پاتەرلىك تۇرعىن ءۇي ماكينسك قالاسىندا, 75 پاتەرلىك تۇرعىن ءۇي دەرجاۆينسك قالاسىندا سالىندى.
بۇگىندە مەملەكەت كوپ بالالى وتباسىلاردىڭ باسپانا ماسەلەسىن شەشۋگە ۇلكەن ءمان بەرىپ وتىر. ەل ىشىندەگى وسى ساناتتاعى وتباسىلاردىڭ الەۋمەتتىك-تۇرمىستىق ماسەلەسىن وڭىنان شەشىپ, جاڭا دا جايلى باسپانامەن قامتاماسىز ەتۋ ءاردايىم باستى نازاردا. وسى ورايدا الەۋمەتتىك جاعىنان از قامتىلعان كوپ بالالى وتباسىلاردىڭ باسپانا جايىن جاقسارتۋعا 1,4 ميلليارد تەڭگە قاراجات بولىنگەن. وعان قوسا كوپ بالالى وتباسىلاردىڭ جالعا بەرىلەتىن تۇرعىن ۇيلەرىن سالۋعا 1 179,6 ميلليون تەڭگە باعىتتالعان. تاعى ءبىر ايتا كەتەرلىك جايت, كوپ بالالى وتباسىلارعا جالعا بەرىلەتىن پاتەرلەردى ساتىپ الۋعا 220,4 ميلليون تەڭگە قاراستىرىلعان.
سالالىق مينيسترلىكتە جالعا بەرىلەتىن پاتەرلەردى سالۋ باعىتىندا ءۇش جىلدىق جوسپار بار. وسى جوسپار شەڭبەرىندە 920 پاتەرلىك 19 جالعا بەرىلەتىن كوپقاباتتى تۇرعىن ءۇي سالۋ مەجەلەنۋدە.
بيىل 117 الەۋمەتتىك جاعىنان از قامتاماسىز ەتىلگەن وتباسىنا باسپانا سالۋ كوزدەلسە, بۇل ويداعى مەجە اسىرا ورىندالىپ, 184 كوپ بالالى وتباسى قونىس تويىن تويلايدى. وعان قوسا 148 كوپ بالالى وتباسىنا جالعا بەرىلەتىن تۇرعىن ۇيلەر سالىنادى. تاراتىپ ايتار بولساق, كوكشەتاۋ قالاسىندا وسىنداي 20, ستەپنوگورسك قالاسىندا 30, اتباسار اۋدانىندا 32, بۇلاندى اۋدانىندا 42, شورتاندىدا 24 جالعا بەرىلەتىن پاتەرلەر سالىنادى. باسپانامەن قامتۋدىڭ اۋقىمى دا كەڭەيە تۇسپەك. ماسەلەن, 2020 جىلى وبلىس ورتالىعىندا عانا ەمەس, بۇلاندى, بۋراباي, ەرەيمەنتاۋ اۋداندارىندا دا تۇرعىن ۇيلەر سالۋ جوسپارلانىپ وتىر. ءسال تاراتىپ ايتار بولساق, جالپى كولەمى 41 مىڭ شارشى مەتردى قۇرايتىن 640 پاتەر سالىنادى. ماكينسك قالاسىندا 45 پاتەرلىك, ەرەيمەنتاۋدا 45 پاتەرلىك ۇيلەردى سالۋ مەجەلەنۋدە.
جەكەمەنشىك تۇرعىن ۇيلەر سالۋعا دا بارىنشا كوڭىل بولىنۋدە. ماسەلەن, اعىمداعى جىلى شورتاندى اۋدانىندا 808 جەر تەلىمىنە سۋ قۇبىرى تارتىلىپ, ەلەكتر قۋاتىمەن قامتاماسىز ەتىلدى. ءدال وسىنداي جۇمىس وتكەن جىلى دا قارقىندى جۇرگىزىلگەن بولاتىن. ايتالىق, اتباسار قالاسىندا 69, ارشالى كەنتىندە 200, ستەپنوگورسك قالاسىندا 85 جەر تەلىمدەرى ينجەنەرلىك جۇيەمەن جابدىقتالدى.
اقمولا وبلىسى
