«مىندەتتى الەۋمەتتىك مەديتسينالىق ساقتاندىرۋ» قورى الماتى وبلىستىق فيليالىنىڭ مالىمەتى بويىنشا جاڭا جىلدان باستاپ جەتىسۋ تۇرعىندارىنىڭ 80,6 پروتسەنتى مىندەتتى جارنا تولەۋگە قابىلەتىن راستاعان. ال 27 863 ادام مەديتسينا مەكەمەلەرىنە تىركەلمەگەن.
وكىنىشكە قاراي, وسىنشا تۇرعىننىڭ باسى اۋىرىپ, بالتىرى سىزداي قالسا, العاشقى دارگەرلىك كومەكتەن باسقا مەديتسينالىق قىزمەت تۇرىنە قول جەتكىزە المايتىنى بەلگىلى بولىپ وتىر. ال بالالار, جۇكتى ايەلدەر, جۇمىسسىز رەتىندە رەسمي تىركەلگەن تۇلعالار, 3 جاسقا دەيىن بالا تاربيەسىمەن اينالىسۋشى اتا-انا, مۇگەدەكتىك تاعايىندالعان جاندار, مۇگەدەكتى كۇتىپ,باعاتىن قامقورشى, سوعىس ارداگەرلەرى, كوپ بالالى انالار جانە تاعى دا ارنايى الەۋمەتتىك جەڭىلدىگى بار ادامدار ءۇشىن مەديتسينالىق قىزمەت كورسەتۋدى قارجىلاندىرۋ مەملەكەت ەسەبىنەن جۇرگىزىلەدى.
ايتپاقشى, بۇعان دەيىن وبلىستا تۇرعىلىقتى جەرى بويىنشا ەمحاناعا تىركەلگەن ادامداردىڭ ۇلەسى 90 پروتسەنتكە جەتكەنى ايتىلعان ەدى. بىراق, جىل سوڭىنا دەيىن تۇراقتى مەديتسينالىق تىركەۋى جوق 100 214 تۇرعىننىڭ اراسىندا ءالى دە 27 863 ادامنىڭ بار ەكەنى بەلگىلى بولدى.
