قازاقستاننىڭ ۇكىمەتى تاراپىنان كەلىسىمگە قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, ال امەريكا قۇراما شتاتتارىنىڭ ۇكىمەتى تاراپىنان – اقش-تىڭ قازاقستانداعى توتەنشە جانە وكىلەتتى ەلشىسى – ۋيليام ح. موزەر قول قويدى.
وسى كەلىسىم حالىقارالىق ازاماتتىق اۆياتسيا ۇيىمىنىڭ (يكاو) اۋە كولىگىن ودان ءارى ليبەراليزاتسيالاۋ جونىندەگى ۇسىنىمدارىنا سايكەس «اشىق اسپان» قاعيداتتارىن كوزدەيتىن قازاقستان رەسپۋبليكاسى ءۇشىن ءبىرىنشى قۇجات بولىپ تابىلادى. بۇل قازاقستان مەن امەريكا قۇراما شتاتتارى اراسىندا ۇشۋدى ورىنداۋدى جوسپارلايتىن تاسىمالداۋشىلار ءۇشىن زور مۇمكىندىكتەر اشادى. كەلىسىمنىڭ اياسىندا تاراپتاردىڭ تاسىمالداۋشىلارىنا اۋا ەركىندىگىنىڭ «بەسىنشى دارەجەسى» بەرىلىپ, مەجەلى مەكەندەردىڭ جانە جيىلىكتەردىڭ سانى بويىنشا شەكتەۋ قويىلمايدى.
كەلىسىم ەكى ەل اراسىنداعى تىكەلەي تۇراقتى رەيستەردى ورىنداۋ ءۇشىن قۇقىقتىق بازانى قالىپتاستىرىپ, سونداي-اق قازاقستان مەن امەريكا قۇراما شتاتتارى اراسىنداعى ستراتەگيالىق ارىپتەستىكتى ودان ءارى دامىتۋعا ىقپال ەتەتىن بولادى.
ەكى ەل اراسىنداعى تىكەلەي رەيستەردىڭ اشىلۋى ساياسي, ەكونوميكالىق, مادەني ءوزارا قارىم-قاتىناستار مەن ءتۋريزمدى دامىتۋعا, سونداي-اق «استانا» حالىقارالىق قارجى ورتالىعىنىڭ كولىكتىك قولجەتىمدىلىگىن ارتتىرۋعا ىقپال ەتەتىن بولادى.
