مينيستر نۇر-سۇلتان قالاسىنىڭ ورتالىق جول اۋرۋحاناسىندا بولىپ، وندا مەملەكەت باسشىسى قاسىم-جومارت توقاەۆتىڭ وسى مەديتسينالىق مەكەمەدەگى پاتسيەنتتەردىڭ تۇرۋ جاعدايلارىن جاقسارتۋ جونىندەگى تاپسىرماسىنىڭ ورىندالۋ بارىسىن تەكسەردى.

قازىرگى تاڭدا اۋرۋحانا بولىمشەلەرىن باسقا جەرگە كوشىرۋ ءۇشىن ەكى كورپۋستا جوندەۋ جۇمىستارى اياقتالدى، ولار: گينەكولوگيالىق كورپۋس جانە جەتى قاباتتى عيمارات.

تەكسەرۋ بارىسىندا ەلجان ءبىرتانوۆ قاجەت ەمەس بولمەلەردى وڭتايلاندىرۋ ارقىلى اۋرۋلاردى قابىلداۋ بولمەسىنىڭ اۋدانىن ۇلعايتۋعا نازار اۋداردى، سونىمەن قاتار جەدەل جانە جوسپارلى تۇردە كەلەتىن ناۋقاستاردىڭ اعىمىن رەتتەۋدى، حيرۋرگيالىق كورپۋستى جوندەۋ ماسەلەلەرىن پىسىقتاۋدى تاپسىردى.

سونداي-اق، مينيستر اتالعان مەديتسينالىق مەكەمەنىڭ جاعدايىندا مىندەتتى الەۋمەتتىك مەديتسينالىق ساقتاندىرۋ جۇيەسىنىڭ ءىس جۇزىندە ىسكە اسىرىلۋىن، اتاپ ايتقاندا، مەديتسينالىق اقپاراتتىق جۇيەلەردىڭ جۇمىسىن جانە ولاردىڭ ينتەگراتسيالانۋىن تەكسەردى.

ەلجان ءبىرتانوۆ اتاپ وتكەندەي، ءمامس اياسىنداعى بارلىق تەحنيكالىق ولقىلىقتار پاتسيەنتتىڭ پايداسىنا شەشىلۋى كەرەك جانە تۇرعىندار مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزگەننەن كەيىن مەديتسينالىق قىزمەت كورسەتۋ ساپاسىنىڭ جاقسارعانىن سەزىنۋى كەرەك.

دەنساۋلىق ساقتاۋ مينيسترلىگى باسشىسىنىڭ ارالاعان نىساندارىنىڭ ءبىرى №2 قالالىق ەمحانا بولدى. ە. ءبىرتانوۆ ءمامس جاعدايىندا پاتسيەنتتەرگە قالاي قارالىپ جاتقانىن جانە تۇرعىندار ءۇشىن قانداي مۇمكىندىكتەر جاسالعانىن قارادى. مينيستر اقپاراتتىق جۇيەلەردىڭ جۇمىسىنا، اتاپ ايتقاندا، پاتسيەنتتەردى ساقتاندىرۋ مارتەبەسى بويىنشا بولۋگە جانە مەديتسينالىق ساقتاندىرۋ جۇيەسىنە ءالى قاتىسپاعان ازاماتتاردى تىركەۋگە ەرەكشە كوڭىل ءبولدى.

مەديتسينالىق ۇيىم ماماندارىنىڭ ايتۋىنشا، بۇل ەمحاناعا كۇن سايىن 440-قا جۋىق ادام كەلەدى، ولاردىڭ 60%-دان استامىندا ساقتاندىرۋ مارتەبەسى بار. ەلجان ءبىرتانوۆ پاتسيەنتتەردىڭ نەگىزگى بولىگى — بالالار، زەينەتكەرلەر، مۇگەدەكتەر، جۇكتى ايەلدەر، ستۋدەنتتەر — مەديتسينالىق ساقتاندىرۋ قورىنا مەملەكەت جارنالار تولەيتىن 15 جەڭىلدىكتى ساناتقا ەنەتىنىن ەسكەرە وتىرىپ، مينيسترلىكتىڭ بولجامدارى بويىنشا، ساقتاندىرىلعاندار كەم دەگەندە 80% بولۋى قاجەت ەكەنىن اتاپ ءوتتى.

سونداي-اق، مينيستر ەمحانانىڭ وڭالتۋ ءبولىمىنىڭ جۇمىسىن جانە قالپىنا كەلتىرۋ ەمىنىڭ باعدارلاماسىن باعالادى. ە. ءبىرتانوۆ مىندەتتى الەۋمەتتىك مەديتسينالىق ساقتاندىرۋ جۇيەسى كومەكتىڭ وسى ءتۇرىن قارجىلاندىرۋدى 12 ەسە ارتتىرۋدى كوزدەيتىنىن ەسكەرە وتىرىپ، پاتسيەنتتەردىڭ سانى كوبىرەك بولۋى مۇمكىن ەكەنىن اتاپ ءوتتى.

№2 قالالىق ەمحانانىڭ وڭالتۋ جانە قالپىنا كەلتىرۋ ەمى ءبولىمى 2020 جىلدىڭ قاڭتارىنان باستاپ جۇمىس ىستەي باستادى. مۇندا مۇگەدەكتەرگە الەۋمەتتىك، پسيحولوگيالىق جانە مەديتسينالىق قولداۋ كورسەتەتىن وڭالتۋ كومەگىنىڭ ءۇشىنشى نەمەسە كەشەندى ءتۇرى ۇسىنىلادى. بۇل قازاقستانداعى جاڭا قىزمەت ءتۇرى. ساۋىقتىرۋ ەمىنە ەرەسەكتەردى دە، بالالاردى دا قابىلدايدى.

سونىمەن قاتار، 2019 جىلدىڭ شىلدەسىنەن باستاپ ەمحانادا «د» ەسەبىندە تىركەلگەن ورتالىق جۇيكە جۇيەسى اۋرۋلارى بار، پسيحيكالىق-سويلەۋ دامۋى كەشەۋىلدەگەن، داۋن اۋرۋى جانە ءاۋتيزمى بار بالالارعا ارنالعان وڭالتۋ ءبولىمى اشىلدى. باس دارىگەردىڭ ايتۋى بويىنشا، بۇل ورتالىق نۇر-سۇلتان قالاسىنداعى بارلىق مەديتسينالىق ۇيىمدار اراسىندا العاشقىلاردىڭ ءبىرى بولىپ اشىلعان. ەمحانا تاجىريبەسىن باسقا دا ۇيىمدار وزدەرىنە ۇلگى رەتىندە الا باستادى.

دەنساۋلىق ساقتاۋ ءمينيسترى الەۋمەتتىك مەديتسينالىق ساقتاندىرۋ قورىنىڭ توراعاسىمەن بىرگە بىرقاتار باسقا دا مەديتسينالىق نىسانداردى، سونىڭ ىشىندە تەمىرجول اۋرۋحاناسىن، №3 پەريناتالدى ورتالىقتى جانە تەرى-ۆەنەرولوگيالىق ديسپانسەرىن ارالاپ، وندا ءمامس جاعدايىنداعى مەديتسينالىق كومەكتىڭ ۇيىمداستىرىلۋىن تەكسەردى. باستى نازار دارىگەرلەردىڭ پاتسيەنتتەردى قالاي قابىلدايتىنىنا، اقپاراتتىق جۇيەلەردىڭ قانشالىقتى دۇرىس جۇمىس جاسايتىندىعىنا جانە جۇگىنگەن ادامداردىڭ ساقتاندىرۋ مارتەبەسىنىڭ انىقتالۋ-انىقتالماۋىنا اۋدارىلدى.

ەستەرىڭىزگە سالا كەتەيىك، 1 قاڭتاردان باستاپ قازاقستاندا مەديتسينالىق كومەك ەكى پاكەت — تەگىن مەديتسينالىق كومەكتىڭ كەپىلدەندىرىلگەن كولەمىنىڭ جاڭا ۇلگىسى جانە مىندەتتى الەۋمەتتىك مەديتسينالىق ساقتاندىرۋ پاكەتىمەن ۇسىنىلادى. جەدەل جانە العاشقى مەديتسينالىق-سانيتارلىق كومەك، ونىڭ ىشىندە نەگىزگى دياگنوستيكالىق قىزمەتتەر بارلىق ازاماتتار، ورالماندار مەن ەل رەزيدەنتتەرى ءۇشىن اقىسىز بولىپ قالادى. ال كونسۋلتاتيۆتى-دياگنوستيكالىق كومەك، كۇندىزگى جانە تاۋلىك بويى جۇمىس ىستەيتىن ستاتسيونارلاردا ەمدەۋ تەك ساقتاندىرىلعان ازاماتتارعا جانە قانت ديابەتى، ارتەريالىق گيپەرتەنزيا، ونكولوگيا، تۋبەركۋلەز، گەپاتيت جانە ت. ب. الەۋمەتتىك ماڭىزى بار جانە نەگىزگى سوزىلمالى اۋرۋلارى بار ناۋقاستارعا عانا اقىسىز كورسەتىلەدى.