جيناقتالعان دەرەكتەر ادامدار كوپ جاعدايدا مەملەكەتتىك قىزمەتتەن تەرىس سەبەپتەرمەن شىعارىلاتىنىن كورسەتەدى. سونىڭ ەڭ باسىندا جەمقورلىققا جول بەرۋ كورىنىسى تۇر. جەمقورلىق دەرتتى بويىنا جۇقتىرعاندار قىزمەتتەن بوساسا دا, كەيىن تەرىس جولمەن ۋىسىنا تۇسىرگەن قاراجاتتى جەكە قارا باسىنىڭ مۇددەسىنە پايدالانىپ كەتۋى ابدەن مۇمكىن ەكەنىن العا تارتادى. ولار وسىنداي جولمەن وزدەرىنە حان سارايىنداي ءۇي كوتەرىپ, قوس-قوستان باعاسى قىمبات شەتەلدىك كولىكتەر ساتىپ الۋى دا عاجاپ ەمەس. قانداي قاراجاتقا؟ الدە ول مەملەكەتتىك قىزمەتتەن بوساي سالا «مايلى شەلپەككە» تاپ بولىپ, اياقاستىنان تابىسى تاسقىنداي قالدى ما؟
مىنە, وسى ماسەلەنىڭ اق-قاراسىن ايقىنداپ, اجىراتۋ ءۇشىن مۇنداي توپقا كىرەتىندەر كەيىنگى ءۇش جىل ۋاقىت ىشىندە ءار جىلدىڭ 31 ناۋرىزىنا دەيىن تۇرعىلىقتى جەرىنەن مەملەكەتتىك كىرىس ورگاندارىنا ءوز تابىستارى مەن كىرىستەرى جانە مۇلكى تۋرالى دەكلاراتسيانى تاپسىرۋعا ءتيىس. ەگەر بۇل قۇجاتتىق ماتەريالدار كورسەتىلگەن مەرزىمدە تاپسىرىلماسا, بۇل جاعداي اكىمشىلىك قۇقىق بۇزۋشىلىق تۋرالى كودەكستىڭ تارماقتارى مەن باپتارىن بۇزۋ بولىپ تابىلادى, دەدى گازەت تىلشىسىنە مەملەكەتتىك قىزمەت ىستەرى اگەنتتىگىنىڭ اقتوبە وبلىسى بويىنشا دەپارتامەنتى مەملەكەتتىك قىزمەت ساپاسىن باقىلاۋ باسقارماسىنىڭ باس مامانى قايرات اكيەۆ.
ونىڭ ايتۋىنشا 2018 جىلى وڭىردە مەملەكەتتىك قىزمەتتەن سىبايلاس جەمقورلىققا جول بەرگەنى جانە وزگە دە تەرىس ءىس-ارەكەتتەرى بويىنشا بوساتىلعان 66 مەملەكەتتىك قىزمەتكەر اكىمشىلىك جاۋاپكەرشىلىككە تارتىلىپتى. ال 2019 جىلدىڭ 11 ايى ارالىعىندا اتالعان باسقارما مەملەكەتتىك قىزمەتتەن تەرىس سەبەپتەرگە بايلانىستى بوساتىلعان 16 ادامعا اكىمشىلىك حاتتامالار تولتىرعان. مۇنداعى ايىپپۇل مولشەرىنىڭ كولەمى 2 ميلليون تەڭگەگە جۋىقتايدى. قىسقاسى, مەملەكەتتىك قىزمەت ىستەرى اگەنتتىگى ماماندارىنىڭ مالىمدەۋىنشە دەكلاراتسيا ءوز ۋاقىتىندا تاپسىرىلسا, ايىپپۇل مولشەرى مەملەكەتتىك قىزمەتتەن تەرىس سەبەپتەرمەن شىعارىلعان ادامداردىڭ وتباسىنا زيانىن تيگىزبەيدى.
دەكلاراتسيا تاپسىرۋ ءىسىن جۇيەلى جولعا قويا بىلۋدەگى باستى ماقسات – اكىمشىلىك جاۋاپكەرشىلىككە تارتۋ عانا ەمەس, سونىمەن بىرگە مۇنداي قۇقىق بۇزۋشىلىقتاردىڭ الدىن الۋ جانە ونى بولدىرماۋ, دەپ ءتۇيىن جاسادى مەملەكەتتىك قىزمەت ساپاسىن باقىلاۋ باسقارماسىنىڭ باس مامانى قايرات اكيەۆ.
اقتوبە
