بۇۇ قاۋىپسىزدىك كەڭەسىنە جاڭا تۇراقتى ەمەس مۇشەلەردىڭ جۇمىس باستالۋىنىڭ سالتاناتتى ءراسىمىن وتكىزۋ ءداستۇرى قازاقستاننىڭ باستاماسىمەن 2018 جىلدىڭ قاڭتارىندا ونىڭ بۇۇ قاۋىپسىزدىك كەڭەسىندە توراعالىعى كەزىندە ەنگىزىلدى. بۇۇ-عا مۇشە مەملەكەتتەر وسى جاڭا باستامانى قازاقستاننىڭ «جارقىن جەكە كارتوچكاسى» دەپ اتادى.
«قازاقستاننىڭ باستاماسىمەن بۇۇ قۇرىلعان ساتتەن باستاپ 75 جىل ىشىندە ءۇشىنشى رەت وتكىزىلىپ وتىرعان بۇل ءراسىمنىڭ ماقساتى – حالىقارالىق قوعامداستىقتىڭ سىزدەرگە جۇكتەلگەن جاھاندىق بەيبىتشىلىك پەن قاۋىپسىزدىكتى ساقتاۋدىڭ ماڭىزدى جانە قاسيەتتى مىندەتىن ورىنداۋعا بەرىلگەن مانداتتى مويىنداۋ. سىزدەردىڭ ەلدەرىڭىزدىڭ قاۋىپسىزدىك كەڭەسىنە سايلانۋى باسقا 192 مۇشە مەملەكەتتىڭ ءسىزدىڭ ۇكىمەتتەرىڭىزگە بۇۇ جارعىسىنىڭ مۇراتتارىن, اسىرەسە وسى قيىن-قىستاۋ كۇندەردە سەنەتىندىگىن ايعاقتايدى», دەدى ءىس-شارانى باستاۋ بارىسىندا قازاقستاننىڭ بۇۇ جانىنداعى تۇراقتى وكىلى قايرات وماروۆ.
ول كەڭەستىڭ جاڭا تۇراقتى ەمەس مۇشەلەرىنە وسى دۇنيەجۇزىلىك ۇيىمنىڭ 75 جىلدىق مەرەيتويىنا وراي بيىلعى مەرەيتويلىق جىلى ساتتىلىك پەن ماڭىزدى جەتىستىكتەر تىلەدى.
ايتا كەتەيىك, بۇۇ قاۋىپسىزدىك كەڭەسىنىڭ جاڭا تۇراقتى ەمەس مۇشەلەرى رەتىندە ۆەتنام, ەستونيا, تۋنيس, سەنت-ۆينسەنت جانە گرەناديندەر, سونداي-اق نيگەر رەسپۋبليكاسى كەلدى. راسىمگە بۇۇ قاۋىپسىزدىك كەڭەسىنىڭ جاڭا تۇراقتى ەمەس مۇشەلەرىنىڭ ەلشىلەرى قاتىستى. ولار كەڭەستەگى جۇمىسىنىڭ باسىمدىقتارى تۋرالى قىسقاشا بايانداما جاساپ, بۇۇ-نىڭ وسى نەگىزگى ورگانىندا سالتاناتتى جاعدايدا جۇمىسقا كىرىسۋگە مۇمكىندىك بەرگەن ءىس-شارانى ۇيىمداستىرعانى ءۇشىن قازاقستانعا ۇلكەن ريزاشىلىق ءبىلدىردى.
قازاقستاننىڭ باستاماسىنان بۇرىن قاۋىپسىزدىك كەڭەسىنىڭ زالى الدىنداعى ءباسپاسوز قابىرعاسىنىڭ جانىندا بۇۇ قاۋىپسىزدىك كەڭەسى تۇراقتى ەمەس مۇشەلەرىنىڭ تۋلارىن اۋىستىرۋى ءراسىمى بولدى. جاڭا ءداستۇردى ەنگىزۋىمەن بۇل ءراسىم بۇۇ-عا مۇشە مەملەكەتتەردىڭ جانە الەمنىڭ جەتەكشى بۇقارالىق اقپارات قۇرالدارى وكىلدەرىنىڭ كەڭىنەن قاتىسۋىمەن كەڭەستىڭ جىل سايىنعى باعدارلاماسىنىڭ ءبىرىنشى جۇمىس كۇنىندەگى رەسمي ءىس-شاراعا اينالدى.
2019 جىلى قاڭتاردا قازاقستاننىڭ تۇراقتى وكىلدىگى بۇۇ قاۋىپسىزدىك كەڭەسى مۇشەلەرىنىڭ تۋلارى ءۇشىن قازاقستاندا جاسالعان جانە قازاقتىڭ ۇلتتىق ويۋلارىمەن بەزەندىرىلگەن ارنايى تۇعىرلار سىيلادى.
قازاقستان بۇۇ قاۋىپسىزدىك كەڭەسىندە ەكىجىلدىق جۇمىسىن 2018 جىلعى 31 جەلتوقساندا اياقتاعان.
