دەپۋتاتتار الەۋمەتتىك قامسىزداندىرۋ ماسەلەلەرىنە, اتاپ ايتقاندا, اتاۋلى الەۋمەتتىك كومەكتى تاعايىنداۋدىڭ جاڭا فورماتىنا, مىندەتتى الەۋمەتتىك مەديتسينالىق ساقتاندىرۋدى ەنگىزۋگە باسا نازار اۋدارادى. سونداي-اق ءماجىلىستىڭ زاڭنامالىق جۇمىستارى تۋرالى حاباردار ەتەدى. ايماقتارداعى جۇمىسى اياسىندا ءماجىلىس دەپۋتاتتارى وندىرىستىك جانە الەۋمەتتىك نىساندارعا بارىپ, كاسىپورىنداردىڭ, دەنساۋلىق ساقتاۋ, ءبىلىم بەرۋ مەكەمەلەرىنىڭ ەڭبەك ۇجىمدارىمەن كەزدەسەدى.
سونىمەن قاتار حالىق قالاۋلىلارى جەكە ماسەلەلەرى بويىنشا ازاماتتاردى قابىلداۋ وتكىزەدى. دەپۋتاتتار تەك وبلىس جانە اۋدان ورتالىقتارىنا عانا ەمەس, شالعايداعى ەلدى مەكەندەرگە دە بارادى. جەكسەنبى, 5 قاڭتاردا پاۆلودار وبلىسىندا ءماجىلىس دەپۋتاتتارى ايزادا قۇرمانوۆا, ايگۇل نۇركينا جانە الەكساندر سۋسلوۆ تەرەڭكول اۋدانىنداعى پەسچانوە اۋىلىنىڭ تۇرعىندارىمەن كەزدەسەدى, ال دەپۋتاتتار نۇرلان اشىمبەتوۆ پەن مەيرام پشەمباەۆ «اباي» جشس وندىرىستىك تسەحىنىڭ ۇجىمىمەن كەزدەسەدى.
وسى كۇنى نۇر-سۇلتان قالاسىندا ءماجىلىستىڭ الەۋمەتتىك-مادەني دامۋ كوميتەتىنىڭ ءتورايىمى گۇلشارا ابدىقالىقوۆا مەن ميحايل چيركوۆتىڭ «جاستار» تەاترىنىڭ ۇجىمىمەن كەزدەسۋلەرى جوسپارلانعان. ءماجىلىستىڭ قارجى جانە بيۋدجەت كوميتەتىنىڭ ءتورايىمى گۇلجان قاراقۇسوۆا مەن تاتيانا ياكوۆلەۆا «ەندوحيرۋرگيا كلينيكاسى» ەلوردالىق باستاۋىش پارتيا ۇيىمىنىڭ وكىلدەرىمەن كەزدەسەدى.
ال دەپۋتاتتار سۆەتلانا بىچكوۆا مەن قانات مۋسين وقۋشىلار سارايىنىڭ ۇجىمى جانە ساپار احمەتوۆ, پاۆەل كازانتسەۆ, ءجاميلا نۇرمانبەتوۆا «استانا-تەپلوترانزيت» اق ەڭبەك ۇجىمىنىڭ تىنىس-تىرشىلىگىمەن تانىسادى. ءماجىلىس دەپۋتاتتارىنىڭ ايماقتارعا ساپارى 14 قاڭتارعا دەيىن جالعاسادى.
