ازىرگە بەلارۋس جاعى جانارماي بەكەتتەرىندە تاپشىلىق جوق ەكەنىن, جاۋاپتى ورگاندار مۇناي وڭدەۋ زاۋىتتارىندا 2-3 اپتاعا جەتەتىن قوردىڭ بارىن مالىمدەدى. رەسمي دەرەكتەرگە سۇيەنسەك, بەلارۋس قورى شامامەن 0,5 ملن توننا. رەسەي ءوز شەشىمىن 1 قاڭتاردا قابىلداعان. ءبىر ەسكەرەتىن جايت, رەسەيدىڭ ەۋروپاعا بەلارۋس جەرى ارقىلى جۇزەگە اساتىن مۇناي تاسىمالى ەش وزگەرىسسىز جالعاسىپ جاتىر. بەلارۋس پرەزيدەنتى الەكساندر لۋكاشەنكو 31 جەلتوقساندا مۇناي كەشەنىنىڭ باسشىلىعىمەن جينالىس وتكىزىپ, جاڭا تاسىمالداۋشىلاردى تابۋ كەرەكتىگىن ايتقان. ماماندار «درۋجبا» قۇبىرىن قايتادان ىسكە قوسۋدى نەمەسە بالتىق پورتتارىنان تەمىر جول ارقىلى جەتكىزۋدى ۇسىنعان.
نەگىزىندە ەكى ەل اراسىنداعى ەنەرگيا كوزدەرىنىڭ تاسىمالى تۋرالى 2017 جىلعى كەلىسىمگە سايكەس, سەرىكتەستىك 2024 جىلعا دەيىن قاراستىرىلعان. بۇل قۇجات بويىنشا رەسەي بەلارۋسكە جىلىنا 24 ملن توننا كولەمىندە مۇناي جەتكىزۋى كەرەك. كەلىسىمدى ۋاقىتىنان بۇرىن توقتاتۋعا ەكى ەل اراسىنداعى قارجىلىق تۇسىنىسپەۋشىلىكتەر سەبەپ بولۋدا. ماسەلەن, 2019 جىلدىڭ مامىر ايىندا «درۋجبا» قۇبىرى رەسەيدەن كەلگەن لاستانعان مۇناي سالدارىنان ىستەن شىقتى. مينسك تالاپ ەتكەن وتەماقىعا ماسكەۋ كەلىسپەي, تاراپتار ورتاق شەشىمگە كەلمەگەن. بۇدان وزگە سالىق ماسەلەلەرىنە دە نۇكتە قويىلماعان.
اقپاراتتارعا سۇيەنسەك, 31 جەلتوقساندا ەكى ەل پرەزيدەنتتەرى تەلەفونمەن سويلەسكەن. كرەمل تاراپى شەشىمنىڭ بەلارۋس ءۇشىن وڭتايلى بولمايتىنىن ايتسا, بەلارۋس جاعى بۇعان قاتىستى تۇسىنىكتەمە بەرمەدى. دەگەنمەن, رەسەي گازدىڭ باعاسىن بىلتىرعى باعانى وسىرمەي, مىڭ تەكشە مەترىنە 127 دوللار الۋعا كەلىسىمىن بەردى.
رەسەي مەن بەلارۋس اراسىندا «مۇناي سوعىسى» 2006-2007, 2016 جىلدارى دا بولعان. ەكى شيەلەنىس تە بەيبىت كەلىسىممەن اياقتالعان ەدى. الايدا اقپارات كوزدەرى بۇل جولى بەلارۋس پرەزيدەنتى اشۋلى ەكەنىن جازادى. ساراپشىلار ا.لۋكاشەنكونىڭ «مۇنداي وداقتىڭ قاجەتى جوق» دەگەنى تەگىن ەمەس دەيدى.
