اۆتوبۋس پاركىن جاڭارتۋ جانە قالانىڭ قوزعالىس باعدارلارى جەلىسىن ۇلعايتۋ بويىنشا كولىك رەفورماسى شەڭبەرىندە «استانا موتورس» كومپانياسى ەلىمىزدە قۇراستىرىلعان Golden Dragon 18 مەترلىك جاڭا 60 ەكولوگيالىق اۆتوبۋستاردى شىعاردى.
18 مەترلىك اۆتوبۋستاردىڭ سىيىمدىلىعى اسا قارقىندى جولاۋشىلار اعىنى بار قالالىق باعدارلارعا قىزمەت كورسەتۋگە مۇمكىندىك بەرەدى. Golden Dragon بارلىق بىرىكتىرىلگەن اۆتوبۋستاردىڭ قوزعالتقىشتارى گازبەن جۇمىس ىستەۋ ءۇشىن بەيىمدەلگەن, جانۋ كەزىندە زياندى زاتتاردىڭ ەڭ از مولشەرى پايدا بولادى, بۇل قالالىق كولىك ءۇشىن وتە ماڭىزدى. الداعى ءتورت جىلدا بۇل وتىن تۇرىنە ەل بويىنشا 50 مىڭ بىرلىك اۆتوكولىكتى اۋىستىرۋ جوسپارلانىپ وتىر.
بارلىق اۆتوبۋستار ەۋرو-5 ستاندارتىنىڭ تالاپتارىنا ساي. تومەن قاباتتى اۆتوبۋستاردىڭ كەڭ سالونىندا بارلىق قاۋىپسىزدىك, بەينەباقىلاۋ, اقپاراتتاندىرۋ, ديسپەتچەرلەرمەن بايلانىس جۇيەلەرى بار, كونديتسيونەر بار. مۇمكىندىگى شەكتەۋلى جولاۋشىلارعا ىڭعايلى بولۋ ءۇشىن ارنايى مەحانيكالىق پلاتفورمالار قاراستىرىلعان. اۆتوبۋستاردىڭ سىيىمدىلىعى - 150 جولاۋشى, 36 - وتىراتىن ورىن جانە 1 - مۇمكىندىگى از جولاۋشىلار ءۇشىن.
«كومپانيا وتاندىق اۆتوبۋستاردى شىعارۋدى جولعا قويدى جانە جولاۋشىلار مەن جۇرگىزۋشىلەردىڭ بارىنشا قولايلىلىعى ءۇشىن تاسىمالداۋشىلاردىڭ بارلىق سۇرانىستارىن ەسەپكە الۋعا مۇمكىندىگى بار. وتاندىق اۆتوبۋستاردى شىعارۋ ەلىمىزدىڭ اسا توزعان قوعامدىق كولىگىن جاڭارتۋ جونىندەگى مەملەكەتتىك باعدارلامانى تابىستى ىسكە اسىرۋعا سەپتىگىن تيگىزەتىنىنە سەنىمدىمىز. ەلىمىزدىڭ اۆتوبۋس پاركتەرى ءۇشىن قولايلى قارجىلىق جاعداي جاسالعان جانە ولار تەحنيكانى ىڭعايلى شارتتارمەن قارجى ليزينگىنە ساتىپ الا الادى», - دەيدى «استانا موتورس» كومپانياسىنىڭ باس ديرەكتورى بەكنۇر نەسىپباەۆ.
اۆتوبۋستار يندۋستريا جانە ينفراقۇرىلىمدىق دامۋ مينيسترلىگى مەن «قدب-ليزينگ» اق باعدارلاماسىن جۇزەگە اسىرۋ اياسىندا قوعامدىق كولىكتى وتاندىق اۆتوبۋستارمەن جاڭارتۋ جانە جاڭعىرتۋ بويىنشا ساتىپ الىنعان. اتالعان باعدارلاما قازاقستان رەسپۋبليكاسى ۇكىمەتىنىڭ قولداۋىمەن ىسكە قوسىلدى جانە ەلدىڭ اۆتوبۋس پاركىنە كەلىسىم-شارت قۇنىنىڭ 15% باستاپقى جارناسىمەن 7 جىل مەرزىمگە نەسيە بەرۋ مولشەرلەمەسىمەن تەحنيكا ساتىپ الۋعا مۇمكىندىك بەرەدى. قازىرگى ۋاقىتتا بۇكىل ەل بويىنشا اسا توزعان, پايدالانۋ مەرزىمى 12 جىلدان اسقان 6 مىڭنان استام اۆتوبۋس تىركەلگەنىن ەسكەرسەك, اتالمىش باعدارلاما جولاۋشىلار تاسىمالى جەلىسىندە حالىققا قىزمەت كورسەتۋ ساپاسىنىڭ دەڭگەيىن ارتتىرۋعا مۇمكىندىك بەرەدى.
