اقمولا ءوڭىرى تۇرعىندارىنىڭ 81 پروتسەنتى عانا ورتالىقتاندىرىلعان سۋمەن قامتاماسىز ەتىلگەن. سۋمەن جابدىقتاۋ جەلىلەرىن جاڭعىرتۋ اياسىندا جالپى قۇنى 35 ميلليارد تەڭگەنى قۇرايتىن 170 جوبا جۇزەگە اسىرىلعان. ايماق باسشىسى جاڭا جوبانى جۇزەگە اسىرماس بۇرىن, الدىمەن گەولوگيالىق زەرتتەۋ جاساۋ قاجەتتىگىن ەسكەرتتى.
–ۇكىمەتتىڭ باقىلاۋىنداعى ماقساتتى ينديكاتورلار كورسەتكىشى بار, سولارمەن بايىپتى جۇمىس ىستەۋ قاجەت, دەدى وبلىس اكىمى ەرمەك مارجىقپاەۆ.
ايتا كەتەرلىگى, 2019 جىلى 59 ەلدى مەكەنگە جۇرگىزىلگەن گەولوگيالىق زەرتتەۋگە 450 ميلليون تەڭگە قارجى بولىنگەن.
–اقمولا وبلىسى بويىنشا 616 ەلدى مەكەننىڭ 272-ءسى ورتالىقتاندىرىلعان سۋمەن قامتاماسىز ەتىلگەن. 224-ىندە سۋ ورتالىقتاندىرىلماعان, ال 20 ەلدىمەكەنگە سۋ سىرتتان تاسىمالدانادى. سۋمەن قامتاماسىز ەتۋ باعىتىندا ايماقتا 357 سۋ قۇبىرى تارتىلعان, دەيدى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ جەتەكشىسى يۆان يۋرچەنكو.
سۋدىڭ دا سۇراۋى بار. وتىرىستا اۋىز سۋعا قاتىستى بارلىق ماسەلە اشىق تالقىلاندى. ءوز ەلدىمەكەندەرىندەگى سۋ ماسەلەسى بويىنشا اۋدان اكىمدەرىنە سۇراقتار قويىلىپ, اۋىز سۋدىڭ ساپاسى كەڭىنەن ساراپتالدى.
–ساپاسىز سۋدان جۇعاتىن اۋرۋ وڭىرىمىزدە تىركەلگەن جوق. بۇل جەردە الدىن-الۋ شارالارى, ياعني ۆاكتسينا ەگۋ ءوز ناتيجەسىن بەرىپ وتىر. جىل سايىن 10 مىڭعا جۋىق ادام ەگىلەدى. سوندىقتان دا گەپاتيت ۆيرۋسىن جۇقتىرۋ كورسەتكىشى تومەندەگەن. وتكەن جىلى 22 ادام تىركەلسە, بيىلعى كورسەتكىش 11, دەيدى وبلىستىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايناگۇل مۋسينا.
ۆاكتسينا قورى جەتكىلىكتى. سۋ قۇرامىنىڭ سانيتارلىق-حيميالىق جانە ميكروبيولوگيالىق كورسەتكىشتەرىنە سىناما ءجيى جاسالىپ وتىرادى. قىسقى مەرزىمدەگى اۆتوكولىك جولدارىن كۇتىپ ۇستاۋ – اكىمشىلىك وتىرىسىنىڭ كۇن تارتىبىندە ەكىنشى ماسەلە رەتىندە تالقىلاندى. قىستا 5 مىڭ جارىمنان استام شاقىرىم جول كۇتىمدى قاجەت ەتەدى. 106 قار تازالايتىن تەحنيكامەن جابدىقتالعان 12 مەردىگەرلىك كومپانيامەن كەلىسىم-شارت جاسالعان.
