ورتالىق ديرەكتورى مۇرات سۇلەيمەنوۆتىڭ ايتۋىنشا, جاڭا ورتالىقتا ءبىر اۋىسىمدا 100 ادام قابىلدايتىن ەمحانا جانە 200 ورىندىق ونكولوگيالىق ديسپانسەر بار. جالپى, پاۆلودار ءوڭىرى قاتەرلى ىسىك كورسەتكىشى بويىنشا ەلىمىزدە 3-ورىندا. جىل سايىن وبلىستىق ونكوديسپانسەردىڭ ءبىرىنشى رەتتىك ەسەبىنە 2300 تۇرعىن تىركەلسە, اۋرۋحانانىڭ جالپى ەسەبىندە قازىر 11 مىڭ ادام بار.
اۋاسى ءوندىرىس ورىندارىنىڭ تۇتىنىمەن لاستانعان وڭىردە قاتەرلى ىسىك كورسەتكىشى جوعارى. بۇل جاعدايدى جەرگىلىكتى ونكولوگتار اۋرۋدى ەرتە باستان انىقتاۋ كورسەتكىشىنىڭ كوبەيۋى ناتيجەسىندە انىقتاعان. جاڭادان اشىلعان ورتالىقتا ەندى جىلىنا 1,5 مىڭنان استام وتا جاسالماق. ورتالىق قۇرىلىسىنا 7 ملرد تەڭگە, ال زاماناۋي قۇرال-جابدىقتارعا 4 ملرد تەڭگە قارجى جۇمسالعان.
جىلىنا مىڭنان اسا وتا جاساۋ ءۇشىن ورتالىققا كومپيۋتەرلىك توموگرافيا, ماگنيتتى رەزونانستى توموگرافيا, بەينە-لاپروسكوپيالىق سياقتى جاڭا زاماناۋي قوندىرعىلار ورناتىلدى. قاتەرلى ىسىك اۋرۋلارىن ەمدەۋدىڭ وزىق ۇلگىلەرى قولدانىسقا ەنگىزىلۋدە. ەندى بۇل اۋرۋعا دۋشار بولعان ادامداردىڭ ءومىر ءسۇرۋ ۇزاقتىعىن ارتتىرۋعا مۇمكىندىك بار.
ەڭ باستىسى, ونكولوگيالىق ورتالىق قۇرامىندا ەمحانا, ع.سۇلتانوۆ اتىنداعى وبلىستىق اۋرۋحانا, وفتالمولوگيالىق ءبولىم, دياگنوستيكالىق ورتالىق قىزمەت كورسەتەدى.
– ورتالىقتا 400-دەي ادام جۇمىس ىستەيدى. تاۋلىكتىك ستاتسيوناردا ناۋقاستار ەم قابىلدايدى. بۇرىن وتا جاساعاننان كەيىن ناۋقاس 12 كۇن اۋرۋحانادا قالسا, ەندى 3-5 كۇن عانا بولادى. ونكولوگيالىق دەرتكە شالدىعۋ كۇدىگىمەن تەكسەرىلۋ از قامتاماسىز ەتىلگەن, كوپ بالالى وتباسىلارعا, مۇگەدەكتەرگە, كەيبىر زەينەتكەرلەرگە تەگىن. تۇرعىندارعا مامانداندىرىلعان ونكولوگيالىق كومەكتىڭ كولەمىن كەڭەيتىپ, ساپاسىن ارتتىرۋ, ناۋقاستاردى وڭالتۋ ءۇشىن ونكوورتالىقتا ستاتسيونارلىق بولىمشەلەردى, جەكە وپەراتسيالىق-رەانيماتسيالىق بلوك, ەمحانا بولىمشەسىن, راديولوگيالىق بولىمشەنىڭ جەكە 4 كورپۋسىن اشۋ جوسپارلانۋدا, –دەيدى مۇرات سۇلەيمەنوۆ.
باس دارىگەردىڭ ايتۋىنشا, اۋرۋلاردىڭ ىشىندە ءبىرىنشى ورىندا ءسۇت بەزىنىڭ قاتەرلى ىسىگى تۇر. سونداي-اق تەرى, وكپە, اسقازان قاتەرلى ىسىگىنە شالدىققاندار دا ءجيى كەزدەسۋدە.
ەندى, مىنە جاڭا زاماناۋي ديسپانسەردە دياگنوستيكالىق زەرتتەۋلەردىڭ ساپاسى دا, ەمدەۋ ناتيجەسى دە جاقسارا تۇسپەك.
مىسالى, ساۋلەلى دياگنوستيكا تەراپياسىنىڭ دارىگەرى ءمادينا يبرايموۆانىڭ ايتۋىنشا, 64 كەسكىندى كومپيۋتەرلى توموگراف اعزانىڭ بىرنەشە قاباتىنان ءوتىپ, وتە تومەن ساۋلەمەن كورىنىستى ايقىن كورە الدى. جاڭا تەحنولوگيالار تولىق ساۋلەلى تەراپيانىڭ ناتيجەسىن ءۇش كۇن ىشىندە الۋعا مۇمكىندىك بەرەدى.
بۇل جونىندە وڭىرگە جۇمىس ساپارىمەن كەلگەن دەنساۋلىق ساقتاۋ ءمينيسترى ەلجان ءبىرتانوۆ «بۇل ونكولوگيالىق ديسپانسەر تەك جاڭا عيمارات ەمەس, جاڭا تەحنولوگيالاردىڭ شوعىرى» دەپ اتاپ وتكەن-ءدى.
– مىسالى, توموگراف ىسىكتىڭ ناقتى كولەمىن انىقتايدى, ال جەلىلىك ۇدەتكىش سول ىسىكتىڭ ناق ءوزىن عانا ساۋلەلەندىرەدى. ىسىكتىڭ اينالاسىنداعى ساۋ جاسۋشالارعا زيان كەلمەيدى. بىرنەشە كۇندە وڭ ناتيجەسىن بايقاۋعا بولادى. ەلىمىزدە ءدال وسىنداي ءتورت قۇرىلعى بار. زاماناۋي مەديتسينالىق قىزمەتتى پاۆلودارداعى ونكولوگيالىق ديسپانسەردە دە الۋعا بولادى, – دەگەن-ءدى مينيستر.
ء تىپتى قاۋىپتى دەرتتى ەرتە كەزدەن انىقتاپ, دەر كەزىندە ءتيىستى كومەك كورسەتۋ ءۇشىن كەلەسى جىلدان باستاپ وڭىردەگى كاسىپورىنداردا جۇمىس ىستەيتىن, جاسى 35-تەن اسقان ادامداردى سكرينينگتەن وتكىزۋ ماسەلەسى دە قاراستىرىلۋدا.
جالپى, وبلىس ورتالىعىنداعى «ونكولوگيالىق ديسپانسەردىڭ قۇرىلىسى» ينۆەستيتسيالىق جوباسىن ىسكە اسىرۋ ارقىلى ءوڭىر تۇرعىندارىن جوعارى تەحنولوگيالىق ەمدەۋ-دياگنوستيكالىق ادىستەمەلەردى پايدالانا وتىرىپ, قازىرگى زامانعى دەڭگەيدە مامانداندىرىلعان ونكولوگيالىق كومەك الا الادى. جاڭا جۇمىس ورىندارى قۇرىلىپ, مەديتسينالىق قىزمەتكەرلەردىڭ جۇمىس جاعدايى جاقسارادى. جاس دارىگەرلەر ونكولوگتاردى كۇتەدى.
جاڭا كەشەندى ىسكە قوسۋ «ونكولوگيالىق اۋرۋلارلى ەمدەۋدىڭ 2018-2022 جىلدارعا ارنالعان كەشەندى جوسپارىن» ورىنداۋ بويىنشا جول كارتاسىنىڭ ءىس-شارالارىن ىسكە اسىرۋعا مۇمكىندىك بەرەدى.
پاۆلودار وبلىسى
