پارلامەنت قاراۋىنا 32 زاڭ جوباسى ەنگىزىلدى
الدىمەن ادىلەت ءمينيسترى مارات بەكەتاەۆ بايانداما جاساپ, بۇعان دەيىن ۇكىمەتتىڭ زاڭ جوبالاۋ جۇمىستارىنىڭ 2019 جىلعا ارنالعان جوسپارى بەكىتىلگەن كەزدە 27 زاڭ جوباسىن ازىرلەۋ جانە پارلامەنتكە ەنگىزۋ كوزدەلگەنىن ايتتى. الايدا, ازىرلەۋشى ورگانداردىڭ ۇسىنىستارى نەگىزىندە ەنگىزىلگەن تۇزەتۋلەردى ەسكەرە وتىرىپ, 32 زاڭ جوباسىن ازىرلەۋ جوسپارلانىپ وتىر. ولاردىڭ بارلىعى پارلامەنت قاراۋىنا ەنگىزىلدى.
− مەملەكەت باسشىسى 3 زاڭ جوباسىنا قول قويدى. 29 زاڭ جوباسى پارلامەنت قاراۋىندا. جىل ىشىندە ءتيىستى جوسپارعا 10 رەت تۇزەتۋلەر ەنگىزىلدى. سونىڭ ىشىندە تۇزەتىلگەن 4 زاڭ جوباسى ەنگىزىلدى. 12 زاڭ جوباسى بويىنشا مەرزىمدەر اۋىستىرىلدى, ءبىر زاڭ جوباسى ەكى بولىمگە ءبولىندى, − دەدى م.بەكەتاەۆ.
ءمينيستردىڭ ايتۋىنشا, زاڭ جوبالارىنىڭ باستاپقى بەكىتىلگەن جوسپاردان كەشىگىپ ورىندالۋىنا بىرنەشە فاكتور ىقپال ەتكەن. مىسالى, زاڭ تۇجىرىمداماسىنىڭ ازىرلەۋ كەزەڭىندە تالداۋدىڭ ساپاسىز جۇرگىزىلۋى, سونداي-اق ازىرلەۋشى مەملەكەتتىك ورگاندار باسشىلارى تاراپىنان قاجەتتى باقىلاۋدىڭ بولماۋى سىندى ماسەلەلەر تۋىنداعانى بەلگىلى بولدى. جوسپارداعى زاڭ جوبالارىنىڭ جارتىسىنا جۋىعى باستاپقىدا بەكىتىلگەن مەرزىمنەن اۋىستىرىلىپ وتىر. ازىرلەۋشى مەملەكەتتىك ورگانداردىڭ زاڭ جوبالارىنداعى ەرەجەلەردى ماقساتتى توپتارمەن تالقىلاۋ بويىنشا ءتيىستى جۇمىس جۇرگىزبەۋى جوسپاردىڭ كەشىگۋىنە كەرى اسەر ەتكەن.
− ناتيجەسىندە, ءىى جارتىجىلدىقتا پارلامەنتكە 13 زاڭ جوباسى ەمەس, 25 زاڭ جوباسى ەنگىزىلدى, ياعني باستاپقىدا جوسپارلانعان سانىنان ەكى ەسە كوپ. بۇل جاعدايدى پارلامەنت دەپۋتاتتارى مەن پرەزيدەنت اكىمشىلىگى تاراپى سىنعا الدى, – دەدى م.بەكەتاەۆ.
مينيستر ءوز سوزىندە زاڭ جوبالاۋ ماسەلەلەرى بويىنشا دا بىرنەشە جينالىس وتكەنىن ايتتى. ونىڭ ايتۋىنشا, ادىلەت مينيسترلىگىمەن زاڭ جوبالاۋ قىزمەتىنە باقىلاۋدى كۇشەيتۋگە جانە شىعارماشىلىق جۇمىستىڭ ساپاسىن ارتتىرۋعا باعىتتالعان بىرقاتار شەشىمگە تۇزەتۋلەر ازىرلەندى. وندا تۇزەتىلەتىن زاڭنىڭ مەرزىمى اۋىستىرىلعان جاعدايدا ازىرلەۋشى-مەملەكەتتىك ورگاننىڭ جانە جاۋاپتى تۇلعالاردىڭ جاۋاپكەرشىلىگى قاتاڭ بولماق.
− بۇل تۇزەتۋلەر بارلىق مينيسترلىكپەن كەلىسىلدى. ءتيىستى قاۋلى جوباسى پرەمەر-مينيستر كەڭسەسىنىڭ قاراۋىندا. بۇعان قوسا, زاڭداردى ازىرلەۋ, ولار بويىنشا قوعامدىق تالقىلاۋ جانە قابىلداۋ راسىمدەرىن جەتىلدىرۋ ماقساتىندا, ادىلەت مينيسترلىگى زاڭ شىعارۋ پروتسەسىن جەتىلدىرۋ ماسەلەلەرى بويىنشا زاڭنامالىق تۇزەتۋلەر توپتاماسىن ازىرلەدى. ءتيىستى زاڭ جوباسى ۇكىمەت وتىرىسىندا ماقۇلداندى جانە جاقىندا پارلامەنت قاراۋىنا ەنگىزىلدى. ءبىزدىڭ پىكىرىمىزشە, جوعارىدا اتالعان ۇستانىمدار ۇكىمەتتىڭ زاڭ جوبالاۋ جۇمىستارىن ساپالى جوسپارلاۋدى, سونداي-اق ۇكىمەتكە جانە پارلامەنتكە زاڭ جوبالارىن ۋاقىتىلى ەنگىزۋگە وڭ اسەر ەتەدى, − دەدى مينيستر.
سونىمەن قاتار م.بەكەتاەۆ ۇكىمەتتىڭ زاڭ جوبالاۋ جۇمىستارىنىڭ 2020 جىلعا ارنالعان جوسپار جوباسى تۋرالى ايتتى.
− ادىلەت مينيسترلىگى زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيا مۇشەلەرىمەن بىرلەسىپ ۇكىمەتتىڭ زاڭ جوبالاۋ جۇمىستارىنىڭ 2020 جىلعا ارنالعان جوسپار جوباسىن ازىرلەدى. بۇل جوسپاردا 17 زاڭ جوباسى ازىرلەنبەك. ونىڭ ىشىندە الەۋمەتتىك قامسىزداندىرۋ, دەنە شىنىقتىرۋ جانە سپورت, اسكەري قىزمەت جانە ارنايى مەملەكەتتىك ورگاندار قىزمەتكەرلەرى مەن اسكەري قىزمەتشىلەردىڭ تۇرعىن ءۇي قاتىناستارى ت.ب. سالالار قامتىلعان, − دەدى ادىلەت ءمينيسترى.
بەلگىلى بولعانداي, الداعى جىلى «ەرەكشە تاۋارلاردى باقىلاۋ تۋرالى», «وسىمدىكتەر الەمى تۋرالى» جانە «ارداگەرلەر تۋرالى» جەكەلەگەن جاڭا زاڭ جوبالارىن ازىرلەۋ كوزدەلىپ وتىر.
جوسپار جوباسىندا مەملەكەت باسشىسىنىڭ قازاقستان حالقىنا جولداۋىن, سونداي-اق پرەزيدەنتتىڭ سايلاۋالدى باعدارلاماسىن ىسكە اسىرۋعا باعىتتالعان بىرقاتار زاڭ جوبالارى كوزدەلگەن. ونىڭ ىشىندە مەملەكەتتىك ساتىپ الۋلار, دەنە شىنىقتىرۋ جانە سپورت, اۋداندىق, قالالىق جانە اۋىلدىق دەڭگەيدەگى بيلىكتىڭ دەربەستىگى مەن جاۋاپكەرشىلىگىن كەڭەيتۋ ماسەلەلەرى بويىنشا زاڭ جوبالارى بار. مىسالى, مەملەكەتتىك ساتىپ الۋلار ماسەلەلەرى بويىنشا زاڭ جوباسىن ازىرلەۋ ساتىپ الۋ راسىمدەرىن وڭايلاتۋ جانە وتكىزۋ راسىمدەرىن بىرىزدىلەندىرۋ ناتيجەسىندە مەملەكەتتىك ساتىپ الۋلاردى ءتيىمدى وتكىزۋ كوزدەلگەن. ازىرلەنەتىن زاڭ جوبالارىنىڭ ەڭ كوبى يندۋستريا جانە ينفراقۇرىلىمدىق دامۋ مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگىنە تيەسىلى. ءار مينيسترلىك 3 زاڭ جوباسىنان ازىرلەيتىن بولادى. قارجى, ۇلتتىق ەكونوميكا, سىرتقى ىستەر, مادەنيەت جانە سپورت, ەكولوگيا, گەولوگيا جانە تابيعي رەسۋرستار, مينيسترلىكتەرى ەكى زاڭ جوباسىنان ازىرلەسە, قورعانىس مينيسترلىگى ءبىر زاڭ جوباسىن ازىرلەيدى. وسىلايشا جوسپار جوباسىندا قاراستىرىلعان 17 زاڭ جوباسىنان 2020 جىلدىڭ
ءى جارتىجىلدىعىندا پارلامەنتكە 8 زاڭ جوباسىن, ال ءىى جارتىجىلدىقتا 9 زاڭ جوباسىن ەنگىزۋ كوزدەلگەن. جوسپار جوباسى بارلىق مەملەكەتتىك ورگاندارمەن جانە پرەزيدەنت اكىمشىلىگىمەن كەلىسىلدى.
ءتيىستى تاپسىرمالار جۇكتەلدى
تاقىرىپتى قورىتىندىلاۋ بارىسىندا پرەمەر-مينيستر اسقار مامين كەلەر جىلعا ارنالعان جوسپار جوباسىنا وزەكتى جانە ماڭىزدى ماسەلەلەردى شەشۋگە, تۇڭعىش پرەزيدەنت – ەلباسى نۇرسۇلتان ءابىش ۇلى نازارباەۆ پەن مەملەكەت باسشىسى قاسىم-جومارت كەمەل ۇلى توقاەۆتىڭ تاپسىرمالارىن ورىنداۋعا باعىتتالعان 17 زاڭ جوباسى ەنگىزىلگەنىن اتاپ ءوتتى. ۇكىمەت باسشىسى ءوز سوزىندە مەملەكەتتىك ورگانداردىڭ ءبىرىنشى باسشىلارىنا زاڭ جوبالاۋ جۇمىسىن جەكە باقىلاۋعا الۋدى تاپسىردى.
− جوسپارلى زاڭ جوبالارىن ەنگىزۋ مەرزىمدەرى بۇزىلعان جاعدايدا تىكەلەي ءبىرىنشى باسشىلاردىڭ جاۋاپكەرشىلىگى قارالاتىن بولادى, − دەدى ا.مامين.
ۇكىمەت باسشىسى كۇن تارتىبىندەگى ماسەلەدەن وزگە الداعى مەرەكە كۇندەرى وڭىرلەردىڭ اكىمدەرى بارلىق قىزمەتتەردىڭ كەزەكشىلىك كەستەسىن قاتاڭ ساقتاۋى قاجەت ەكەنىن اتاپ ءوتتى.
− جىلۋمەن جانە ەلەكترمەن جابدىقتاۋ تۇراقتى بولۋى كەرەك. الدىن الا بولجام بويىنشا, قاڭتار ايىندا اياز كۇتىلۋدە. سوندىقتان بارلىق پارامەترلەر نورمالارعا سايكەس بولۋى ءتيىس. اكىمدەر جىلىتۋ ماۋسىمىن جەكە باقىلاۋدا ۇستاۋى كەرەك. ەنەرگەتيكا مينيسترلىگىنە جىلۋ ورتالىقتارىنداعى قازاندىقتار مەن جاعارماي ستانسالارداعى وتىن قورىن باقىلاۋدى تاپسىرامىن, – دەدى ۇكىمەت باسشىسى. سونىمەن قاتار پرەمەر-مينيستر ىشكى ىستەر مينيسترلىگىنە كۇشەيتىلگەن رەجىمدە جۇمىس ىستەپ, ازاماتتاردىڭ تىنىشتىعى مەن قاۋىپسىزدىگىن قامتاماسىز ەتۋدى تاپسىردى.
− جاڭاجىلدىق ءىس-شارالار وتكىزۋ ورىندارىنداعى ءورت قاۋىپسىزدىگى جانە قوعامدىق ءتارتىپ ماسەلەلەرىنە مونيتورينگ جۇرگىزۋ قاجەت. سونىمەن قاتار اۆتوكولىكتەردىڭ جولداعى قاۋىپسىزدىگى بويىنشا الدىن الۋ شارالارىن ۋاقىتىندا قابىلداۋ قاجەتتىلىگىن تاعى دا ەسكەرتەمىن, – دەدى ا.مامين.
