القالى جيىنعا مەملەكەتتىك ورگانداردىڭ, حالىقارالىق جانە ۇكىمەتتىك ەمەس ۇيىمداردىڭ وكىلدەرى, گرانت الۋشىلار مەن جوبالاردىڭ بەنەفيتسيارلارى قاتىستى. ازاماتتىق باستامالاردى قولداۋ ورتالىعى – ۇكىمەتتىك ەمەس ۇيىمداردى گرانتپەن قارجىلاندىرۋ وپەراتورى سانالادى. بۇل ورتالىق مەملەكەتتىك گرانتتاردى ازاماتتىق قوعام ينستيتۋتتارىنىڭ مۇمكىندىگىن الەۋمەتتىك سالانىڭ دامۋ ماسەلەلەرىن شەشۋگە تارتۋ ماقساتىندا ۇسىنادى.
– اقپارات جانە قوعامدىق دامۋ مينيسترلىگى ۇكىمەتتىك ەمەس سەكتوردى قولداۋعا ۇنەمى دايىن. قولداۋ رەتىندە مەملەكەتتىك-الەۋمەتتىك تاپسىرىستى نەمەسە گرانتتىق قارجىلاندىرۋدى ايتۋعا بولادى. بيىل جاستار جىلى اياسىنداعى جوبالارعا ءمان بەرىلسە, الداعى ۆولونتەر جىلى اياسىندا دا اۋقىمدى جۇمىس اتقارىلارىنا سەنىمدىمىن. 2020 جىل ءار قازاقستاندىق ازاماتتان باستاپ, جەكەلەگەن ۇيىمداردىڭ دا ساناسىن جاڭعىرتۋ جىلى بولماق. سوندىقتان ۇكىمەتتىك ەمەس سەكتوردىڭ دا بەلسەندىلىك تانىتقانى ماڭىزدى. ەڭ باستىسى ءوزارا سىيلاستىق پەن جاۋاپكەرشىلىكتى سەزىنە ءبىلۋ قاجەت, – دەدى اقپارات جانە قوعامدىق دامۋ ۆيتسە-ءمينيسترى دانيار ەسين.
ازاماتتىق باستامالاردى قولداۋ ورتالىعىنىڭ بيىلعى جۇمىس قورىتىندىسىن تىڭداۋعا 40-تان استام ۇكىمەتتىك ەمەس ۇيىمنىڭ وكىلدەرى ات باسىن بۇردى. ايتا كەتەيىك, وسى جىلى 130-دان استام الەۋمەتتىك جوبا ۇسىنىلىپ, سونىڭ 128-ءى قولداۋ تاپتى. وسى باستامالاردى قارجىلاندىرۋ سوماسى 3,4 ملرد تەڭگەنى قۇرادى. جاستار جىلى اياسىندا ۇسىنىلعان 57 جوبا جۇزەگە استى.
– جوبالار جۇزەگە اسقانىمەن, وسى جىل اسا جاۋاپكەرشىلىكتى قاجەت ەتتى. جاۋاپكەرشىلىك جۇگى ازاماتتىق باستامالاردى قولداۋ ورتالىعىنا عانا ەمەس, ۇكىمەتتىك ەمەس ۇيىمدارعا دا تۇسكەنىن العا تارتار ەدىم. قيىندىقتار جوبالار كونكۋرسىن وتكىزۋ, بيۋدجەت قاراجاتىن يگەرۋ جانە ەسەپ بەرۋ كەزىندە ورىن العانىن العا تارتۋعا بولادى. اتالعان ورتالىقتى ترانسفورماتسيالاۋ قاجەتتىلىگىنە قاتىستى ۇكىمەتتىك ەمەس ۇيىمدار تاراپىنان كەلىپ تۇسكەن بارلىق ۇسىنىس-تىلەكتەر نازارعا الىندى. سونىمەن قاتار الەۋمەتتىك جوبالاردى جۇزەگە اسىرۋ بارىسىندا پايدا بولعان قانداي دا ءبىر ماسەلەلەرگە قاتىستى جەدەل شەشىم قابىلداي بىلدىك, – دەدى ازاماتتىق باستامالاردى قولداۋ ورتالىعىنىڭ باسقارما توراعاسى باتيما مۋكينا.
ب.مۋكينانىڭ ايتۋىنشا, وسى جىلى ازاماتتىق باستامالاردىڭ باسىم باعىتتارىن, جۇمىسىن, جۇيەسىن ايقىندايتىن بىرقاتار رەتتەۋشى قۇجات قابىلداندى. سوندىقتان بيىلعى وڭ باستامالار الداعى جىلداردا دا لايىقتى جالعاسىن تابادى.
