تۇرعىن ءۇي قۇرىلىس جيناق بانكىندەگى نەسيە مولشەرلەمەسىنىڭ تيىمدىلىگىنە بايلانىستى, ونداعى جيناقتاۋ شوتتارىنا دەگەن سۇرانىس كۇنبە-كۇن ارتىپ كەلەدى. بانك كليەنتتەرى تۇرعىن ءۇيدىڭ باستاپقى جارناسىنا قاجەتتى قاراجاتتى جيناقتاي وتىرىپ, بولاشاق باسپانالارىن جىلدىق 2-8,5% مولشەرلەمەمەن نەسيەگە الۋ مۇمكىندىگىنە يە. بيىلدىڭ وزىندە وسى مۇمكىندىكتى 48 414 قازاقستاندىق وتباسى ءتيىمدى پايدالانعان. رەسمي مالىمەت بويىنشا, كۇن سايىن بانكتىڭ كومەگىمەن كەمىندە 160 سالىمشى قونىس تويىن اتاپ وتۋدە. بۇل تۋرالى الماتىدا وتكەن قورىتىندى ءباسپاسوز ءماسليحاتىندا تۇرعىن ءۇي قۇرىلىس جيناق بانكىنىڭ باسقارما ءتورايىمى ءلاززات يبراگيموۆا مالىمدەدى.
بانك باسشىسىنىڭ ايتۋىنشا, 2019 جىلدىڭ قورىتىندىسى بويىنشا تۇرعىن ءۇي قۇرىلىس جيناق بانكىنىڭ نەسيەلىك پورتفەلى 1 تريلليون تەڭگەنى قۇرايدى. بۇعان قوسا, سالىمشىلار دەپوزيتتەرىنە تۇراقتى تۇردە قاراجات جيناقتاۋدا. بۇعان ءوز كەزەگىندە تومەنگى دەڭگەيدەگى, ياعني 0,18%-عا تەڭ NPL دالەل (90 كۇننەن اسقان مەرزىمى وتكەن زايمدار). 8%-دىق ورتاشا بانكتىك دەڭگەيمەن سالىستىرعاندا وتە جاقسى كورسەتكىش.
– تۇرعىن ءۇي قۇرىلىس جيناق بانكى ونىمدەرى قولجەتىمدى بولعاندىقتان, سونداي-اق حالىقتىڭ بانككە دەگەن ۇلكەن سەنىمدىلىگىنىڭ ناتيجەسىندە وسى ونىمدەرگە دەگەن سۇرانىس وتە جوعارى. ءبىز العا قويعان ماقساتتارىمىزدى تولىقتاي ورىنداپ شىقتىق دەپ سانايمىز. دالىرەك ايتساق, اعىمداعى جىلى اسا ماڭىزدى مەملەكەتتىك مىندەتتەردىڭ ءبىرى – تابىسى تومەن وتباسىلارعا ارنالعان «باقىتتى وتباسى» باعدارلاماسىن دايىنداپ, ىسكە قوستىق. قازىرگى ساتتە 4 053 وتباسى قونىس تويىن اتاپ ءوتتى. بۇدان بولەك تاعى 736 وتباسى جىبەرگەن وتىنىمدەرى بويىنشا وڭ شەشىم الىپ, قازىر وزدەرىنە لايىقتى ۇيلەردى ىزدەستىرۋ ۇستىندە. ياعني, ەندى مىڭداعان بالدىرعان باقىتتى بالالىق شاعىن جالدامالى پاتەردە ەمەس, ءوز ۇيلەرىندە وتكىزەتىن بولادى, – دەيدى ءلاززات يبراگيموۆا.
ال «باقىتتى وتباسى» باعدارلاماسىنىڭ تالاپتارىنا سايكەس كەلمەگەن وتباسىلار «نۇرلى جەر» باعدارلاماسىنا قاتىسۋعا مۇمكىندىك الىپ وتىر. ءاربىر التىنشى نەسيەنى بانك وسى باعدارلاما شەڭبەرىندە بەرگەن. جالپى اتالعان باعىت بويىنشا 2019 جىلى سەگىز مىڭ وتباسى باسپانالى بولىپ, ولارعا پاتەر كىلتى تابىستالعان.
مۇنىمەن قوسا, بانك 2019 جىلى «اسكەري باسپانا» تۇرعىن ءۇي باعدارلاماسىنىڭ جاڭارتىلعان شارتتارى بويىنشا اسكەري قىزمەتكەرلەرگە ارناپ 3 811 زايم بەرگەن. بۇل تۇرعىن ءۇي قۇرىلىس جيناق بانكىنىڭ ءوز جوباسى. وعان بيۋدجەتتەن ەشقانداي قاراجات بولىنبەگەن. بانك شامامەن 100 ملرد تەڭگە كولەمىندە ءوزىنىڭ جەكە جانە نارىقتان تۇسكەن قاراجاتىن پايدالانىپ, ەكى جىلدىڭ ىشىندە 6 592 اسكەري قىزمەتكەرگە باسپانالى بولۋ باقىتىن سىيلاعان.
قازىرگى كەزدە بانكتە بولاشاق باسپانالارى ءۇشىن 1,5 ملن وتانداسىمىز قاراجات جيناقتاۋ ۇستىندە. ولاردىڭ 384 242-ءى بيىل اشىلعان دەپوزيتتەر. بۇگىنگى تاڭدا سالىمشىلاردىڭ باسپانالى بولۋىنا مەملەكەت تاراپىنان دا ۇلكەن قولداۋ كورسەتىلىپ وتىرعانىن ايتا كەتكەن ءجون. جىل سايىن تۇرعىن ءۇي قۇرىلىس جيناق بانكىنىڭ سالىمشىلارىنا 20% كولەمىندە بەرىلەتىن سىيلىقاقى تيىنىن تىرنەكتەپ جيناعاندار ءۇشىن اسا ءتيىمدى. اتالعان سىيلىقاقى 200 ايلىق ەسەپتىك كورسەتكىشتەن (505 000 تەڭگە) اسپايتىن سوماعا تولەنەدى. وسىلايشا, 2019 جىلدىڭ قورىتىندىسى بويىنشا ەڭ جوعارى مەملەكەت سىيلىقاقىسى 101 000 تەڭگەنى قۇراعان.
بۇگىندە تۇرعىن ءۇي قۇرىلىس جيناق بانكى ءوز سالىمشىلارىنا ساپالى قىزمەت كورسەتۋ ماقساتىندا بيزنەس-پروتسەستەردى وڭتايلاندىرۋ ءۇشىن ۇزدىكسىز جۇمىس ىستەپ, 2023 جىلعا قاراي ولاردىڭ 70%-ىن ونلاين-رەجىمدە ۇسىنۋعا بارىنشا جاعداي جاساۋدا. وسى ورايدا, بيىل ەنگىزىلگەن جاڭا جوبالاردىڭ ءبىرى – الدىن الا بانكتىك بىلىكتىلىكتى ىسكە قوسۋ جانە بانك كەڭەسشىلەرى ارقىلى قاشىقتىقتان نەسيەلىك وتىنىمدەردى قابىلداۋ.
ەندى تۇرعىن ءۇي قۇرىلىس جيناق بانكىنىڭ كليەنتتەرىنە نەسيە بويىنشا ءوز مۇمكىندىكتەرىن الدىن-الا باعالاۋ ءۇشىن بانك بولىمشەسىنە بارۋدىڭ قاجەتى جوق. ولار وزىنە ىڭعايلى ۋاقىتتا كەز كەلگەن جەرگە بانك كەڭەسشىسىن شاقىرتۋىنا بولادى. ارناۋلى ماماندار قاشىقتىقتان دەپوزيت اشۋمەن قاتار, سالىمشىنىڭ تولەم قابىلەتتىلىگىن شامالاپ ەسەپتەپ, الدىن الا ماقۇلدانعان نەسيە سوماسى كورسەتىلگەن ارنايى سەرتيفيكات تابىستاي الادى.
بۇل سەرتيفيكات 3 ايعا دەيىن جارامدى. وسى ۋاقىت ىشىندە سالىمشى ءوز مۇمكىندىكتەرىن بىلە وتىرىپ, وزىنە لايىقتى باسپانانى ىزدەپ, قارىز الۋ ءۇشىن بانككە حابارلاسۋىنا بولادى. اتالعان جوبا كليەنتتەردىڭ بانك بولىمشەسىنە بارۋىن ەكى ەسەگە قىسقارتۋعا مۇمكىندىك بەرمەك.
«تۇرعىن ءۇي قۇرىلىس جيناق بانكى تاعى ءبىر جوبانى ىسكە قوسۋدى جوسپارلاپ وتىر. بۇل «تۇرعىن ءۇي قۇرىلىسىن قارجىلاندىرۋدا گەندەرلىك تەڭدىكتى قولداۋ جونىندەگى جوبا» نەمەسە «ايەلدەر يپوتەكاسى» دەپ اتالادى. جوبانى ازيا دامۋ بانكى 38 ميلليارد تەڭگە كولەمىندە قارجىلاندىرادى. قازىر ەلىمىزدە 9,1 ميلليون ايەل تۇرادى. ونىڭ ىشىندە 4,4 ميلليونى جۇمىس ىستەيدى, ولاردىڭ جارتىسى ءوز وتباسىلارىن دەربەس قامتاماسىز ەتەدى. بۇل رەتتە ايەلدەر ورتاشا ەسەپپەن ەر ادامعا قاراعاندا ۇشتەن ءبىر بولىككە از جالاقى الادى. تابىس دەڭگەيىنىڭ تومەندىگى نازىكجاندىلاردىڭ ءۇي ساتىپ الۋ ءۇشىن قولجەتىمدى نەسيە الۋى ەر ادامدارعا قاراعاندا قيىن ەكەنىن كورسەتەدى. سول سەبەپتى ءبىز وسى جوبانى قولعا الۋدى جوسپارلاپ وتىرمىز», دەپ اتاپ ءوتتى «تۇرعىن ءۇي قۇرىلىس جيناق بانكى» اق باسقارما توراعاسىنىڭ ورىنباسارى ءاليا ايداربەكوۆا.
اتالعان باعدارلامانىڭ ناقتى قاي كەزدە باستالاتىندىعى تۋرالى اقپاراتتى بانك سالىمشىلارىنا قوسىمشا حابارلايتىن بولادى.
